MATAYO 23

Yeso yiganihiza avigizi vi Lilaga na Avafarisayo

(Mar. 12:38-39; Luk. 11:43,46; 20:45-46)

1Maku Yeso yamoloma ku viduma kandi ku aviigi veve, 2“Avigizi vi Lilaga kandi Vafarisayo vahevwa uvunyali vwu kwigiza nukwivaala Malago ga Musa. 3Kunangwa gamuduuka mugagumiri nokokola viosi via vamuvolera. Navuzwa mutakola kuli vakora mba; kigira sivakora agavilwazaa mba. 4Yee, vavoha imisigo imiliduhu ligali ku migongo ja vandu, navuzwa aveene sivenyaa kunyiira ekedete chavo vajigingi mba. 5Vakora imiyinzi jaavo josi avandu vavalore. Kigira vevoha imisibi mivambalaru ja mang'oda gi Lilaga gaveeye ku, ku vweni nu ku makono gaavo. Kandi vatambihizaa zingigiti zie zinguvu ziavo. 6Vayaanza kwikala mu zindeve ziu luyali mu masavo kandi mu masinagogi. 7Vayaanza kuchelizwa nu luyali mu iviitu kandi kulangwa ‘Mwigizi.’ 8Navuzwa munyi mutalangwa Mwigizi mba, kigira mwigizi winyu ni mulala vuzwa, na munyi mwosi muveeye avamwavo. 9Anoho mutalanga umundu woosi ‘Baba’ mu lirova muno mba, kigira Baba winyu aveeye mulala yenyine vuzwa oveeye mwigulu. 10Kandi mutalangwa avami kigira Mwami winyu ni mulala vuzwa, naye ni Kristo. 11Oveeye munene hagati hinyu gamudukira ave umutumikiri winyu. 12Oyo wenenehizaa, alagehizwa; naye uwegehizaa alanenehizwa.

Yeso yavagaya kigira uvugadi vwavo

(Mat. 12:40; Luk. 11:39-42,44,52; 20:47)

13“O, vayaye, kilaamo keveeye ku munyi, avigizi vi Lilaga kandi Avafarisayo! Avagaadi munyi! Kigira muhanaa ikiliango chingira mu Vwami vwu mwigulu mu zimoni zia avandu, navuzwa munyi aveene si mwingira mu mba, anoho si muhaanaa uvwiyangu ku yavo avagerizaa kwingira mu mba! 14O, vayaye, kilaamo keveeye ku munyi avigizi vi Lilaga na Avafarisayo! Avagaadi munyi! Mwonogonyia zinyumba zia avakunzakali nukuvanuula viosi, kandi mwekora avalahi ku lisaala masaala matambi! Kigira yaga, mulanyola amaduywa manene ligali kuvita.”

15“O, vayaye, kilaamo keveeye ku munyi, avigizi vi Lilaga na Avafarisayo! Avagaadi munyi! Mwambukaa izinyanza kandi muvodong'anaa ilirova liosi muduuki konyoora umundu mulala ahambane ni lisuuvira lienyu. Navuzwa lwa mumunyoola, mumukolaa ave udukana kuzia mu gehena haali kaviri kuli munyi aveene muveeye.

16“O, vayaye, kilaamo keveeye ku munyi aviimiliri vavoku! Munyi mwigizaa, ‘Niiva mundu yisuha ku Litembeli, liesuuha lilie silimuvohi mba. Navuzwa ni yisuha ku izahabu yu mu Litembeli, iliesuuha lilie limuvohi.’ 17Avavoku vasiru munyi! Ekenene ku ni kiliha, izahabu anoho Litembeli likora izahabu eve indakatifu? 18Munyi kandi mwigizaa, ‘Mundu ni yisuha ku uvwali, uvudamanu vuvura ho. Navuzwa ni yisuha ku kihanwa kivikiywi ku vwali, iliesuuha lilie limuvohi.’ 19Avavoku vasiru munyi! Ekenene ku ni kiliha, isadaka anoho uvwali vokolaa isadaka eve indakatifu? 20Kunangwa, uyu wisuhaa ku vwali, yisuhaa ku vwali kandi ku vindu viosi iviveeye ku. 21Uwisuuhaa ku Litembeli, yisuhaa ku Litembeli kandi ku Nyasaye omenya mulio; 22kandi lwa mulala yisuhaa ku ligulu, yisuhaa ku endeve yu Vwami ya Nyasaye, kandi ku uyu wikala kuyo.

23“O, vayaye kilaamo kenene keveeye ku munyi, avigizi vi Lilaga kandi Avafarisayo! Avagaadi munyi! Muhaanaa ku Nyasaye kidieli chi likomi kali izaka yi vitagwa vifunya mwayu ni vimuli, nu mudalasini, navuzwa muleki kugumira amigizu gaveeye amanene agi Lilaga kuli uvulungi, livelererwa, kandi uvusuuvirifu. Agene yaga nigo agamuduukira mukore vugira koleka agandi. 24Aviimiliri vavoku munyi! Mulomba kichungiru kwigalira inji mu chu kunwa chiinyu, navuzwa mumiraa ing'amia!

25“O, vayaye kilaamo kenene keveeye ku munyi avigizi vi Lilaga na Avafarisayo! Avagaadi munyi! Mwogizaa ichova we kekombe ni sahani, navuzwa mugati mwavio mwizuyi ivindu via munyooye kuzinguru ne mbodoka. 26Ivi Mufarisayo muvoku! Wogize mugati mwe kekombe kutanga maku ichova nayo ilava inifu kandi.

27“O, vayaye kilaamo kenene keveeye ku munyi avigizi vi Lilaga na Avafarisayo! Avagaadi munyi! Muveeye kuli vilindwa vivakiywi ichoka, vifanaa vulahi kwigulu, navuzwa mugati vizuyi vigumba kandi uvugundu vwi miviri ja vakuzu ijiguundaa. 28Kandi ndio, munyi muloleka kuva avalungi ichova ku vandu, navuzwa mugati mwizuyi uvugadi nu uvwoni.

Yeso yamanyia amaduywa gaavo

(Luk. 11:47-51)

29“O, vayaye kilaamo keveeye ku munyi, avigizi vi Lilaga kandi Avafarisayo! Avagaadi munyi! Mwumbakaa vilindwa vilahi via vaporofeti, kandi musiahaa ivifananyi viavazwa kwizuliza avalungi; 30navuzwa muvooraa, ‘Kunyi kulava ni kwaali ho mu madiku ga vaguuga viitu, ngano sikwaali kokole agavaakola ulwa vita avaporofeti mba.’ 31Ku yaga mwiyamaa aveene ndi muveeye ivisukulurwi via yavo aviita avaporofeti. 32Muzizagiliri kumaliriza imiyinzi ja vaguuga vinyu vatangiza iju uvwoni! 33Zinzoka munyi! Avana vi vihirigoma munyi! Mu lihononoka ndi ku likalagirwa liu muliru gwe gehena? 34Kigira yaga, inzi nziza kuvatumira avaporofeti, avageri na avigizi; munyi muliita valala, muvambe avandi, kandi avandi mulavakubagira mu masinagogi ginyu nu kuvadambiza mu madaala goosi. 35Kulwa yaga, amaduywa goosi galava ku munyi kigira amasahi ga valungi agaatahizwa mu lirova. Yee, kutura ku liitwa lia Habili utaali na mahiolo kuduuka ku liitwa lia Zakaria, umwana wa Berekia, wa mwitira hagati hi Litembeli nu vwali. 36Muvooleraa agiligali, likula yili lilanyoola amaduywa yaga goosi kigira iliitwa lia vandu yava.

Vuyanzi vwa Yeso ku lidaala lia Jerusalemi

(Luk. 13:34-35)

37“Jerusalemi, O, Jerusalemi! Ivi uwiita avaporofeti, nukulasa amagina va Nyasaye atumaa ku ivi. Ni haali kanga niingerizaa kuvuungiza avana vovo harara, kuli engoko inyavuli ivungizaa ivimiinyu viayo mu zimbaha ziayo, navuzwa siwenya mba? 38Kalunu henza, Litembeli liilio lilatigala mang'anye. 39Kutura kalunu ngovolera agiligali, si ulandola kandi kuduuka lwa ulivoola, ‘Nyasaye agaasizi uyu uzaa mu lieta liu Mwami.’ ”

Currently Selected:

MATAYO 23: LOGOOLI

Highlight

Copy