MATAYO 22
22
Lugano lwi lilia lie keserero
(Luk. 14:15-24)
1Yeso yatumikira kandi izing'ano lwa yamoloma ku avandu. 2“Uvwami vwu mwigulu voveeye kuli mwami uwaalombera umwana weve iliilia lie keserero. 3Yatuma avatumikiri veve avaari nivagerihiziywi kuuza mu keserero. Navuzwa si venya kuuza mba. 4Yatuma kandi avatumikiri vandi, navoora: Muvoolere yavo avagenihiziywi, ‘Inzi mali kolomba iviukulia viange; izigiriki ni zing'ombe ziange zing'omeru zimali kwitwa. Vindu viosi vitegeki. Hambi mu keserero!’ 5Navuzwa sivavugula mu ologendo mba. Vihambira imiyinzi: mulala mu mulimi gwigwe, wundi mu liduka lilie; 6avandi vagumira avatumikiri veve zana ni vaavakuya ma nivaviita. 7Mwami oyo yavihilirwa, natuma avasikari veve nivadiviza aviiti yavo, nivasamba lidaala liavo. 8Kunangwa yavolera avatumikiri veve: ‘Iliilia lie keserero lietegeki ligali, navuzwa avaari ni vamali kogenihizwa sivadukanaa mba. 9Kalunu muzie mu vwavukaniru vwi zinzira, na vosi avamunyoola, muvagenihizi vaze mu keserero.’ 10Avatumikiri vaatura nivazia mu zinzira, nivaleeta avandu vosi avavanyooraa, avadamanu na valahi. Maku inyumba ye keserero yizula avageni du.
11“Lwu mwami yingira kolola avageni, yanyoora mundu mulala uwavula kwivika inguvu ye keserero. 12Mwami ya muteeva, ‘Mulina, wingiyi ndi muno nutaveeye ninguvu ye keserero?’ Naye yakiring'ana. 13Hene yaho mwami yavolera avatumikiri veve: ‘Muvohi amakono ni virenge, mu siuvi mu kisundi ichova. Uwene yeyo alalira nu kudiedieyiza amiinu.’ ” 14Yeso yamaliriza ni livoora, “Avanyingi valangwa, navuzwa avakeekeke vaatovoleywi.”
Amateeva kigira kulitunga uvusuru ku Kaisari
(Mar. 12:13-17; Luk. 20:20-26)
15Avafarisayo vazia kovolerana kuli vanyara kogeriza Yeso na mateeva. 16Kunangwa, vaatuma kuye valala ku aviigi vaavo harara na avasangi vu muganda gwa Herodi. Vamuteeva, “Mwigizi, kumanyia ivi oveeye umundu wiligali, kandi wigiza uvulariri vwa Nyasaye mu agiligali. Ivi siutiizaa mundu woosi mba, kigira ovonene vwu mundu anoho iligondo si viveeye ikindu ku ivi mba. 17Kunangwa kovolere, uganagana ndi? Ni vulahi kutunga uvusuru ku Kaisari#22:17 Kaisari: Idalaja yu Mwami munene wu uvwamihi vwa Varumi., anoho mba?”
18Navuzwa Yeso yamanya uvudamanu vwi zing'anagani ziavo navavoolera, “Avagaadi munyi, kigira ki mungerizaa? 19Mumanyie mabese gu kutunga uvusuru.” Navo vamuleetera idinari. 20Yeso yavateva “Kifananyi yiki kandi iling'oda yili ni via vwaha?”
21Vaamutivulira, “Ni via Kaisari.” Ahene yaho Yeso yavavolera, “Muhe Kaisari ivindu via Kaisari, na Nyasaye ivindu via Nyasaye.”
22Lwa vahulira amativuli yago, vagenya. Na vamuleka nivazia.
Liteeva kigira lisimuguka
(Mar. 12:18-27; Luk. 20:27-40)
23Ku lidiku zana yilio, avalala ku Avasadukayo avavooraa lisimuguka lia vakuzu siliveeye ho, vazia ku Yeso nivamuteeva: 24“Mwigizi, Musa yavoola ndi, ‘Mundu naleta umukali maakuzi vugira koleka avana, gadukanaa amwavo weve yiranyie umukunzakali oyo umwandu, ma yivuliri amwavo weve avana.’ 25Vaali ho avamwavo saba. Wu kutanga yaleeta umukali ma nakuza vugira avana. Yalekera amwavo weve ukwilanyia mukunzakali weve mwandu. 26Gaali ndio kandi ku amwavo wa kaviri uwa kavaga, kali kuduuka ku uwa saba. 27Inyima wa avamwavo yavo vosi kukuza, mukunzakali oyo naye kandi yakuza. 28Kunangwa ku lidiku lwa vakuzu valisimuguka, mukunzakali oyo aliva mukali wa vwaha ku avamwavo saba yavo? Vosi vaali naye kuli mukali wavo.”
29Yeso yavativulira, “Agiligali munyi muveeye avadamanu, kigira si mumanyi Mang'oda Matakatifu, anoho zinguru zia Nyasaye mba. 30Lwa avakuzu valisimuguka, si valiselera avakali kandi sivaliselerwa mba. Valakave kuli zingelosi mwigulu. 31Navuzwa ku makuva gi lisimuguka lia vakuzu, mukikiri kosoma aga Nyasaye yamuvolera? Yavoola, 32‘Inzi mbeeye Nyasaye wa Aburahamu, Isaka Nyasaye wa Yakobo?’ Ku, siaveeye Nyasaye wa avakuzu, navuzwa aveeye Nyasaye wa avaveeye mwoyo.”
33Lwi Viduma viahulira yaga, vagenya ligali ku amigizu geege.
Lilago linene
(Mar. 12:28-34; Luk. 10:25-28)
34Lwa Avafarisayo vahulira ndi Yeso umali kukiring'anyia Avasadukayo, vaavungizana harara. 35Mulala kuvo, mwigizi wi Lilaga lia Musa yaageriza Yeso ni liteeva. 36Yateeva “Mwigizi, ni lilago ki iliveeye linene ku Malago ga Musa goosi?”
37Yeso yamutivulira, “Uyaanze Mwami Nyasaye woovo nu mwoyo gugwo gwosi, ni livamwoyo liilio liosi, no vogeri vuvwo vwosi. 38Yili nilio lilago linene liu kutanga. 39Lia kaviri liveeye kuli ndio: ‘Uyaanze mutende woovo kuli wiyanza mwene!’ 40Malago goosi aga Musa, harara na miigizu ga vaporofeti, gidiira ku malago gaviri yaga.”
Liteeva kigira Mesia
(Mar. 12:35-37; Luk. 20:41-44)
41Lwa Avafarisayo valala vaavungizana harara, Yeso yavateva, 42“Munyi muvooraa ki ku makuva ga Mesia? Aveeye wi kisukururwi cha vwaha?”
Vaamutivulira, “Aveeye wi kisukururwi cha Daudi.”
43Yeso yavateva, “Kigira ki lwa Daudi yaali mu zinguru zia Roho Mutakatifu, yamulanga ‘Mwami?’ Daudi yavoola,
44‘Mwami yavolera Mwami wange:
Yikala hano ku mukono gwange mulungi
kuduuka lwa mbikaa avasigu vovo kuva isi wi virenge vivio.’
45Niiva Daudi yaalanganga Mesia ‘Mwami,’ Mesia anyala ndi kuva kisukururwi cha Daudi?”
46Sihaali ho nu mundu uwanyala kumutivulira ilikuva mba. Kutura lidiku yilio, sihaali ho nu mundu uwaluvilira kandi kumuteeva iliteeva mba.
Currently Selected:
MATAYO 22: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
