MATAYO 20

1Yeso yavoola, “Uvwami vwu mwigulu voveeye kuli mundu mwene mulimi gwi mizabibu, uwatula mugambazuri kwenya avayinziri vu mu mulimi gwigwe. 2Yalagana navo kuvatuunga idinari ndala eveeye umutungu gwi lidiku lilala, ma naavatuma mu mulimi gwigwe gwikizabibu. 3Yatura zisa zivaga zia mugamba, nalora avandi nivasingiyi mu chiitu nivagunzaa vuzwa vugira miyinzi. 4Maku yavavolera, ‘Munyi kandi, muzie kokora miyinzi mu mulimi gwange gwi mizabibu, inzi ndamuha mutungu gwinyu vulahi kuli gaduukanaa! Navo vazia. 5Mwene mulimi yatura, kandi zisa tisa, naakora ndio.’ 6Kali lwa yaduuka zisa likomi na ndala zia mugolova, yatura kandi, nanyoora avandu vandi nivasingiyi mu chiitu zana. Yavateva: ‘Kigira ki musingiyi hano lidiku liosi vuzwa vugira miyinzi?’ 7Navo vaamutivulira. ‘Kigira sikoveeye nu mundu okoheeye miyinzi mba.’ Naye yavavolera, ‘Kali munyi muzie muyinziri mu mulimi gwange gwi mizabibu.’

8“Lwa gwaduuka mugolova, umwene kizabibu yavolera mulindi wi vindu vivie, ‘Langa avayinziri, uvatungi mitungu jaavo. Utangiri ku avasamuyi inyima, kuduuka ku avaari vukutanga.’ 9Maku vaza avasamulizwa zisa likomi na ndala, na vuli mulala kuvo yanyoora mutungu gwi lidiku liosi idinari ndala. 10Navuzwa lwa avatanga mbiri vaza, vaganagana ndi yavo valadaswa mitungu kuvita avandi. Navuzwa yava kandi vanyoola sa mulala umutungu gwi idinari ndala vuzwa. 11Lwa vaavugura mabese gaavo, vatanga kwililira ku mwene mulimi 12ni vavoola, ‘Avandu vasamuyi inyima yava vakoli miyinzi ku isa ndala vuzwa. Kigira ki koheveywi mutungu mulala navo, na kunyi kwikuziyi ku mbasu mululu lidiku liosi ni kuyinzira?’ 13Navuzwa umwene kizabibu yativulira mulala kuvo, ‘Mulina, singokoleye ku uvudamanu vwosi mba! Ivi siulagani ninzi mutungu gwi lidiku liosi? 14Vugula mutungu gugwo uzie. Nyaanzi kuha winyima uyu kuli mbezaa ivi. 15Sivoveeye vulahi inzi ngole kuli nyanza ku vindu viange? Anoho ongendekeraa kigira inzi mbeeye umuhaani mulahi?’ ”

16Yeso yamaliriza makuva geege ku livoora ndi, “Avaveeye avinyima valava avimbiri, navo avimbiri valava avinyima.”

Yeso Yamoloma ulwa kavaga kigira likuza lilie

(Mar. 10:32-34; Luk. 18:31-34)

17Lwa Yeso yaali niyaanigiraa kuzia Jerusalemi, yavugula aviigi likomi na vaviri na yavahila haloveganaamoloma navo mu vwivisu kunzira navoora, 18“Huliri! Kuziiza Jerusalemi na uwene yeyo Umwana wa Adamu alazamwa ku vasaalisi vanene na avigizi vi Lilaga, navo valamukalagira yiitwi. 19Valamuhaana ku avandu vizihiiri zindi, akolerwe kehenyahenye, akuywi kandi avaambwi. Navuzwa ku lidiku lia kavaga, alasimugukizwa.”

Liteeva lia Mama wa Yakobo na Yohana ku Yeso

(Mar. 10:35-45)

20Maku mama wa avana va Zebedayo yaza ku Yeso, harara na vana veve, namwinamira, kandi naamusava kindu kilala.

21Yeso yamuteeva, “Wenyaa ki?” Mukeere oyo yamuvolera, “Uhaane lilagana ku avana vange vaviri yava ndi, mulala aliikale ku mukono mulungi, nu wundi ku mukono mumosi mu Vwami vuvwo.”

22Yeso yativulira avayaayi zana, “Mumanyi cha muteeva mba. Munyi munyala kunwa ekekombe chu vusaliri icha mbeeye ahimbi kunwa?”

Navo vamutivulira, “Kunyala.”

23Yeso yavavolera, “Agiligali mulanwera mu kekombe change, navuzwa kwikala ku mukono mulungi anoho ku mukono mumosi gwange, siaveeye inzi uhaanaa mba. Navuzwa vwiyangu yivwo voveeye ku yavo, ava Baba wange yalombera.”

24Lwa aviigi vandi avaari likomi vahulira yaga, vaavihilira avamwavo vaviri yavo. 25Kunangwa, Yeso yavalanga harara, navavoolera, “Munyi mumanyi avami vi zihiiri vamiiha avandu vaavo kuzinguru, kandi aviimiliri vazio vavamanyia vaveeye nu vunyali vwosi kuvatuga. 26Navuzwa munyi mutava kuli ndio mba. Niiva mulala ku munyi yenya kuva munene hagati hinyu, kuduuka ave umutumikiri winyu vosi, 27kandi niiva mulala ku munyi yenya kuva mwimiliri hagati hinyu, kuduuka ave mutugwa winyu, 28kuli Umwana wa Adamu, siyaaza kutumikirwa, navuzwa kutumika nu kuhaana livamwoyo lilie kohonyia avandu vanyingi.”

Yeso yahonyia avavoku vaviri

(Mar. 10:46-52; Luk. 18:35-43)

29Lwa Yeso harara na aviigi veve vaali nivaturaa Jeriko, ikiduma ekenene cha vandu chavalonda. 30Vaaliho avavoku vaviri ni viikaye kunzira. Lwa vahulira Yeso aviitiraa ahene yaho, vaahanzuka, nivamwanira nivavoora, “Mwami, Umwana wa Daudi, okoveere zimbavasi!”

31Kiduma chaavagondokera ni kivagaya vakiring'ane. Navuzwa vameeda ligali kuhanzuka, ni vavoola: “Mwami, Umwana wa Daudi! Okoveere zimbavasi!” Kiduma cha vandu chavagaya kandi vakiring'ane. Navuzwa vazizagilira ligali kuhanzuka nivamwanira nivavoora, “Mwami, Umwana wa Daudi! Okovererere zimbavasi!”

32Maku Yeso yasingira navalaanga kandi navateeva, “Mwenya mukolere ki?”

33Vaamutivulira, “Mwami, kwenyaa, izimoni zietu zi lole.”

34Yeso yaavavererera, navadiira ku zimoni ziavo; ahene yaho, valora kandi ni vamulonda.

Currently Selected:

MATAYO 20: LOGOOLI

Highlight

Copy