MATAYO 14

Likuza lia Yohana Mubatizi

(Mar. 6:14-29; Luk. 9:7-9)

1Ing'inga yeyo, Herodi, mwamihi wa Galilaya yahulira lusuma lwa Yeso. 2Yavolera avatumikiri veve, “Mundu uyu ligali niyie Yohana Mubatizi asimuguki kutura mu vakuzu! Yiki ni kigira aveeye ni zinguru yizi kokora vilolekizu.”

3Herodi yaali nalagi Yohana agumirwi, kandi avofwi ni minyororo ma naviikwa muvuhambe. Yaali naakori agene yaga kigira Herodia, umukali wa Filipo amwavo weve. 4Kigira Yohana yavolera Herodi, “Ni vudamanu ivi koleta Herodia, mukali wa amwavo woovo!” 5Herodi yenya kwita Yohana, navuzwa yatia ikiduma cha vandu kigira kuvo, Yohana yaali muporofeti.

6Lwi lidiku lie lilia lie livulwa lia Herodi liaduuka, umukana wa Herodia yaasievera avageni. Herodi yayanzizwa ligali. 7Yalagana mu liesuuha ukuhaana ku mukaana oyo ikindu choosi icha amuteeva.

8Naye, kigira yaagerihizwa na mama weve, yateeva, “Nyenya umutwi gwa Yohana Mubatizi ku isahani.”

9Herodi yavelera ligali, navuzwa kigira ku liesuuha lilie, kandi kigira avageni vaali mu lilia harara naye, yaatuliza lilago umukana ahevwe icha yenya. 10Kunangwa, Herodi yatuma umundu, nakalaga umutwi gwa Yohana muvuhambe. 11Umutwi gwigwe gwaleeterwa ku isahani, ni vaaha mukaana, naye na ahilira mama weve. 12Aviigi va Yohana vaza ni vaavugura umuviri gwigwe ni vaaguyavira; ma nivazia ni vavoolera Yeso.

Yeso yalihiza vandu zielefu zitano

(Mar. 6:30-44; Luk. 9:10-17; Yoh. 6:1-14)

13Lwa Yeso yahulira amakuva ga Yohana, yatura hazana yaho naniina mu liato, nazia mu vwivisu aha avandu vatali. Navuzwa lwa avandu vahulira, vaamulonda kutura mu madaala. 14Yeso yatura mu liato, kandi lwa yalora ikiduma kenene cha vandu, umwoyo gwigwe gwizura ovovereri, kandi yahonyia vosi avaari avalwaye.

15Lwa gwaduuka mugolova, aviigi veve vaza kuye ni vamuvolera, “Hano ni mu kiziimi, kandi ing'inga iviti ovoolere avandu vazie mu madaala viguliri iviukulia aveene.”

16Navuzwa Yeso yavavolera, “Vatazia mba, munyi muvahe viukulia.”

17Navuzwa vamuvolera, “Kunyi koveeye hano ni milaango jitano ji migadi jenyine, ni zisuzi ziviri vuzwa.”

18Yeso yavavolera, “Vileeti hano.” 19Yahaana lilago ndi avandu viikare mu kiguti; navugura imilaango jitano ni zisuzi ziviri, nahenza mwigulu, nahaana ilizominya ku Nyasaye kuvigasiza. Yaavimeganyia, naha aviigi veve, vahane ku avandu. 20Avandu vosi avaalia, kandi niviguta. Aviigi vavungiza amadonye gaatigala nigizula ivihinda likomi na viviri. 21Vosi harara vaali avasaza izielefu zitano, vugira kuvaliza avakali na avana.

Yeso Yagenda ku amazi

(Mar. 6:45-52; Yoh. 6:15-21)

22Yeso yavolera aviigi veve vanini mu liato, viimili imbiri weve kuzia engereka winyanza, naye nakisiivula avandu. 23Lwa yamala kuvasiivula, yanigira mu kiguru yenyine kuzia kusaala. Lwa gwaduuka mugolova, yaali ahene yaho yenyine. 24Ing'inga yene yeyo, liato liali ni limali kuduuka ihale hagati hinyanza ni lihunzulanyianywa yiyi na yiyi ni viguvuli kigira imbuza enene yahuuza nukuligoyaanyia. 25Nivuchezaa, ahimbi hagati hizisa tisa ni zisa likomi na ziviri zia mugambazuri, Yeso yazia ku aviigi veve, nagenda ku amazi.

26Lwa aviigi veve vamulola nagenda kunyanza vaatia ligali nivavoora, “Ni kigiingi!” Vaakuba zikwiri kigira uvuti.

27Nonoho Yeso yamoloma kuvo navoora “Muleme mwoyo! Ninzi! Mutatia mba!”

28Maku Petero yamuvolera, “Mwami, naava naveeye ni ivi ligali, mbe munwa ng'ende ku amazi nzizi ku ivi.”

29Yeso yavoola, “Vulahi, Hamba.” Petero yika natura mu liato, nagenda ku mazi kuzia ku Yeso. 30Navuzwa lwa yalora imbuza nemeedekaa, yatia, ma natanga kwiyina. Yanira nu mwoyo munene navoora, “Mwami mbonyia!”

31Ahene yaho Yeso yanyira mukono gwigwe, namugumira, namuvolera, “Ivi wilisuuvira likekeeke! Kigira ki nuhayahayiza?”

32Lwa vombi vanina mu liato, imbuza yakiring'ana. 33Vosi avaari mu liato vaasigamira Yeso, ni vavoola, “Ligali ivi oveeye Umwana wa Nyasaye.”

Yeso yahonyia avalwaye mu kivala cha Genesareti

(Mar. 6:53-56)

34Lwa vaambuka inyanza, vaduuka mu kivala cha Genesareti, 35aha vandu vamanya Yeso. Kunangwa vaahira amakuva hvundu hoosi mu zimbega ziali ahimbi, nivaleeta avalwaye vosi ku Yeso. 36Vamugoonya aleke vadiiri vuzwa ku lukigiti lwi inguvu yeeye; navo vosi avaludiira vahonywa.

Currently Selected:

MATAYO 14: LOGOOLI

Highlight

Copy