LUKA 5

Yeso yalanga aviigi vukutanga

(Mat. 4:18-22; Mar. 1:16-20)

1Lidiku lilala Yeso yaali nasingiyi kulujinga lwinyanza ya Genesareti, kiduma cha avandu vanyingi vamukumbiriza, kandi nivahulirizaa likuva lia Nyasaye. 2Yalora amato gaviri nigasingiyi ku lujinga zana. Valuvi vaali nivatuli mu, nivogizaa miluvo jaavo. 3Lwa Yeso yanina mu liato lilala iliali lia Simoni, yavolera Simoni alisundi mumazi hakekeke lituli kulujinga. Yikala, mu niyigiza kiduma.

4Lwa yaali niyakamara kwigiza, yavolera Simoni, “Hila liato kuduuka mululiva lwa mazi ma muviiki miluvo jinyu mu mazi muluvi zisuzi.”

5Simoni yamutivulira, “Mwami kokoli miyinzi ju kuluva vudiku vwosi vugira konyoora kindu choosi. Navuzwa kigira ivi ovooye ndaviika miluvo mumazi.” 6Lwa vaali nivakakola ndio, vaaluva zisuzi zinyingi kali miluvu jaavo jatanga kutanduka. 7Vasima avaluvi vache vaavo avaari mu liato lindi vaze kuvakonya. Vaza nivizuliza zisuzi mu maato goosi gaviri kuduuka nigava ahimbi kwiyina. 8Lwa Simoni Petero yalora ndio, yagwa hasi mam'mama imbiri wa Yeso navoora, “Tula ku inzi, kigira inzi mbeeye umwoni, O, Mwami!”

9Simoni harara na avache veve vosi vagenya konyoora zisuzi zinyingi kuli ndio. 10Yakobo na Yohana avana va Zebedayo vaali avasangi mu vuluvi harara na Simoni. Yeso yavolera Simoni, “Utatia mba, kutura kalunu ulava muluvi wukuluva avandu.”

11Lwa vaali nivakamara koleta amato gaavo kulujinga lwinyanza, vaagaleka goosi nivamulonda.

Yeso Yahonyia Mugere

(Mat. 8:1-4; Mar. 1:40-45)

12Lwa Yeso yaali mu lidaala lilala, mundu musaza mulala yaali mu wovogere vwali nivwamala umuviri. Lwa yalora Yeso, yagwa mam'mama imbiri weve nasaara navoora; “Mwami nuyanza unyala kundakasa!”

13Yeso yanyira mukono gwigwe, namudiira navoora, “Nyanza! Takaswa!” Ahene yaho ovogere vwatula ku mundu oyo 14Maku Yeso yaamwiganihiza navoora, “Utavoolera mundu kali mulala mba, navuzwa uzie ku musaalisi akohenze, ma uhaane isadaka yilitakaswa liilio kuli Musa yalaga, kumanyia avandu ndi umali kohona.”

15Navuzwa amakuva ga Yeso gameeda kulanda havundu hoosi. Viduma vinyingi via vandu viza kuye kumuhuliriza nokohonywa vulwaye vwavo. 16Navuzwa Yeso yiyahulaa nazia ahivisu kusaala.

Yeso yahonyia mundu wafogoya

(Mat. 9:1-8; Mar. 2:1-12)

17Lwa Yeso yaali niyigizaa, Avafarisayo na avigizi vi Lilaga kutura mutudaala twosi twa Galilaya, Ivuyuda na Jerusalemi, vaali nivikaye ho. Zinguru ziu Mwami ziali harara na Yeso kohonyia valwaye. 18Henza, avandu vaza nivagingiyi mundu wafogoya ku vogono. Vageriza kumwingiriza vamuviki imbiri wa Yeso, 19navuzwa kigira avandu vaali vanyingi, sivalola inzira yukwingirizira mu mba. Kunangwa vanina kunyumba igulu ni vagifudula mani vikizira ho uwafogoya ku vogono vwivwe, nivamuviika imbiri wa Yeso. 20Lwa Yeso yalora lisuuvira liavo linene, yavolera mundu oyo, “Mulina wange, vwoni vuvwo vusamiihiywi.”

21Avigizi vi Lilaga na Vafarisayo vatanga kotevana nivavoora, “Ni mundu ki uyu ovola manyego? Ivwaha unyala kusamiiha uvwoni natali Nyasaye yenyine?”

22Lwa Yeso yamanya zing'anagani ziavo yateeva, “Muganaganaa ki mu mioyo jinyu? 23Ekeveeye kedoto ligali ni kiliha; kovora, ‘Usamihiywi vwoni vuvwo’ anoho kovora ‘Singira ogeende?’ 24Navuzwa nyenya mumanye ndi Mwana wa Adamu aveeye ni zinguru kusamiiha uvwoni mu lirova” Kunangwa yavolera mundu wafogoya oyo, “Ngovolera! Singira vugula vogono vuvwo uzie yengo.”

25Nonoho mundu wafogoya oyo yasingira imbiri wavo vosi, navugura vogono vwivwe, nazia yengo, niyizominya Nyasaye. 26Vosi vagenya niviizura uvuti, nivakuminya Nyasaye nivavoora, “Kumali kolola vindu viokogenyia lero!”

Yeso Yalanga Matayo amulonde

(Mat. 9:9-13; Mar. 2:13-17)

27Inyima wayaga Yeso yatura ichova nalora musololi wu vusuuru uwalangwa Levi niyikaye mu ofisi. Yeso yamuvolera, “Nonda” 28Levi yaleka viosi naamulonda.

29Levi yalombera Yeso lilia linene munyumba yeeye. Kiduma kenene cha vasololi vuvusuuru na avandu vandi avaari nivikaye harara navo. 30Mu lilia, Avafarisayo valala na avigizi vi Lilaga valala vihambihiza Yeso nivavoora, “Kigira ki mulizaa nukunwa harara na vasololi vuvusuuru kandi na avoni?”

31Yeso yavativulira, “Vandu vaveeye avalamu sivenyaa mwahi wi zinyasi mba; navuzwa avamwenyaa nivaveeye avalwaye. 32Sindaaza kulanga avalungi, navuzwa avoni vaduuki kwiganira.”

Amateeva kigira lihonga lilia

(Mat. 9:14-17; Mar. 2:18-22)

33Avandu vavoolera Yeso, “Aviigi va Yohana Mubatizi vahonga lilia haali kanyingi nivasaara, kandi aviigi va Avafarisayo vakora ndio; navuzwa aviigi vovo valiza vuzwa nivanwa.”

34Yeso yavavolera, “Munyala kokora avalangiywi mukeselero vahonge lilia lwa mwene keserero aveeye harara navo? 35Navuzwa amadiku galaduuka lwu mwami osereraa alitulizwa kuvo. Lwene yilwo nilwo lwa valihonga lilia.”

36Yeso yavavolera lugano yilu: “Avandu sivakalaa kilavi chinguvu imbia nukukinavira kunguvu ingulu mba. Niiva vakora ndio valava nivatanduyi inguvu, kandi ikilavi kihia sikilaleng'ana ninguvu ingulu mba. 37Avandu sivazukaa iwaini imbia mu zimuya zie visero vikulu mba; kigira iwaini imbia ilatandula zimuya zie visero yizio, na iwaini ilasunduka, ni zimuya zie visero zilononywa. 38Lwaini imbia izukwaa mu zimuya zievisero zimbia! 39Si haali kandi numundu ukayilangwa iwaini imbia namali kunwa iwaini ingulu mba, kigira avoora, ingulu nindahi.”

Currently Selected:

LUKA 5: LOGOOLI

Highlight

Copy