LUKA 4

Ligerizwa lia Yeso

(Mat. 4:1-11; Mar. 1:12-13)

1Yeso yirana kutura mu mugera gwa Jorodani niyizuuyi Roho Mutakatifu, yimilirwa na Roho kuzia mwigendanyama, 2wa yagerizwa na Setani ku madiku arubaini. Ku madiku yago goosi si yaalia kindu mba. Inyima wa madiku yago yaali ninzara.

3Setani yamuvolera, “Niiva oveeye Mwana wa Nyasaye laga ligina yili ligwi mugadi.”

4Yeso yamutivulira, “Gang'odwa mu Mang'oda Matakatifu, ‘Mundu sianyala kuva mwoyo kigira mugadi gweng'ine mba.’ ”

5Setani yamuhira igulu ku kiguru kitambi ligali na mumanyia vwami vwosi vwilirova ku ing'inga engekeeke. Setani yamuvolera, 6“Ndakuha vunyali ku vwami yivu vwosi nu vukumi vwavwo kigira ndaheevwa yivi viosi nyara kuhaana ku mundu woosi wanyenyi. 7Niiva ulasigamira, yivi viosi vilava vindu vivio.”

8Yeso yamutivulira, “Gang'odwa mu Mang'oda Matakatifu, ‘Ulasigamira Mwami Nyasaye woovo kandi utumikiri oyo yeng'ine!’ ”

9Setani yamuhira Jerusalemi ku kesegese chi Litembeli namuvolera, “Niiva oveeye Mwana wa Nyasaye, tuma hasi. 10Kigira gang'odwa mu Mang'oda Matakatifu, ‘Nyasaye alalaga zingelosi veve vakulindi.’ 11Gavoora kandi, ‘Valakuginga mu makono gaavo gase ulikigitala kerenge kwigina.’ ”

12Navuzwa Yeso yamutivulira, “Gang'odwa mu Mang'oda Matakatifu, ‘Utageriza Mwami Nyasaye woovo mba.’ ”

13Lwa Setani yamala kugeriza Yeso muzinzira ziosi, yamuleka ku ing'inga engekeeke.

Yeso yaatanga miyinzi jije mu Galilaya

(Mat. 4:12-17; Mar. 1:14-15)

14Yeso yirana Galilaya niyizuuyi zinguru zia Roho Mutakatifu, kandi amakuva geege galaanda muzimbega ziosi zia vodong'ana kivala yicho. 15Naye yigiza avandu mumasinagogi gaavo kandi avandu vosi vamwizominya.

Yeso Yasuulwa ha Nazareti

(Mat. 13:53-58; Mar. 6:1-6)

16Kunangwa Yeso yazia Nazareti wa yavirukira ku lidiku lie Lisabato, yingira mu Lisinagogi kuli gwaali mwima gwigwe. 17 Yasingira Kosooma Mang'oda Matakatifu. 17Yahevwa kitabu chu muporofeti Isaya. Yakunula nanyoora aha gang'odwa ndi;

18“Roho wu Mwami aveeye ku inzi,

kigira umbaki maguta kwilwazira avadaka Makuva Malahi ga Nyasaye.

Yaanduma kulandizira avavofa ndi valanyora livoholorwa liavo,

avavoku valanyora lilora kandi kovoholora yavo avadambizwa.

19Kandi kulandiza muhiga mulahi

lwu Mwami alihonyia avandu veve.”

20Yeso ni yakamala kosooma, yakunika kitabu niyilanyira mutumikiri ma niyikara. Avandu vosi avaari mu Lisinagogi vamuhenza. 21Naye yaatanga kuvavoolera, “Kalunu Mang'oda Matakatifu yaga gaduukiziywi ku munyi kuli muhuliyi ni gasomwa.”

22Avandu vosi vayanzizwa naye ni vagenya kigira makuva malahi gayavoola. Vavoola, “Uyu siaveeye muyaayi wa Josefu?”

23Yavavolera, “Mbeeye na agiligali ndi mulambolera lugano yilu; ‘Wizinyasi, wehonyie mwene.’ Mulambolera kandi, ‘Amakuva goosi gakwahulira wakola Kaperinaumi ugakole hano kandi mu lidaala liilio mwene.’ ” 24Yaazizagilira kovora, “Agiligali muvooleraa, muporofeti siavugilirwaa mu lidaala lilie mba.

25“Mumbulirizi: gaveeye agiligali ndi vaali ho avakunzakali avanyingi mu kivala cha Isiraeli mu madiku ga Elija. Lwi imbura yavula kukuba ku mihiga jivaga ni mieli sita, inzara enene yaduuka mu kivala choosi. 26Navuzwa Elija, si yatumwa ku mundu wundi woosi, nitali ku mukali mulala mukunzakali wi lidaala lia Zerefazi, mu kivala cha Sidoni. 27Mu kivala cha Isiraeli mu madiku gu muporofeti Elisha vaali ho avagere vanyingi. Navuzwa siyaali ho watakaswa natali Naamani mundu wa Siria.”

28Lwa vahulira yaga, vosi avaari mu lisinagogi vizura uvutima. 29Vasingira ni vamulumba ichova wi lidaala liavo iliali ni liumbakwa ku kiguru, ni vamuhira ku lohongo lwe kiguru yicho Venya kumuluguta mulohongo yilwo. 30Navuzwa Yeso yaavitira hagatl haavo, nazia.

Mundu waali ni lidemoni

(Mar. 1:21-28)

31Kunangwa Yeso yasulunguta kuduuka Kaperinaumi, lidaala liveeye mu kivala cha Galilaya, yigiza avandu ku lidiku lie Lisabato. 32Vagenya kigira zinguru zia yaali nazio mu miigizu geege. Kigira yamoloma nuvunyari. 33Mu lisinagogi yimwo yaali mu mundu mulala uwaali ni yagumirwa ni lidemoni, yakuba zikwiri nu mwoyo munene, 34“Ai! Yeso wa Nazareti! Kigira ki ukwingilira? Uzi kukudiviza? Inzi ngumanyi, ivi oveeye vwaha. Ivi oveeye mutumwa Mutakatifu wa Nyasaye!”

35Navuzwa Yeso yaligondokera navoora, “Kiring'ana! Tula mu mundu uyu!” Kunangwa lidemoni lwa liamala kutuura mundu oyo hasi, liatura muye vugira kumusaliriza kali hakuzu.

36Avandu vosi vagenya ligali ni vavolerana, “Ni likuva lugano ki yili; kigira kuzingulu nuvunyari, akunga roho midamanu kutura najo jitula!” 37Lusuma lwa makuva geege lwalanda mu kivala yicho choosi.

Yeso Yahonyia avandu vanyingi

(Mat. 8:14-17; Mar. 1:29-34)

38Yeso yatura mu lisinagogi niyingira munyumba ya Simoni. Navizara Simoni yaali na agumiliywi nuvulwaye vonene. Vamuteeva amuhonyie. 39Yeso yazia nasingira ahimbi naye na gondokeraa vulwaye, kandi yahona nonoho kutura ku vulwaye. Na ahene yaho mukeere oyo yasingira, na avatumikiraa.

40Lwa liuvaliali niliyeraa, vosi avaari nivalwaye vaavo lugano nalugano vavaleeta kuye, yavika makono geege kuvo vosi navahonyia. 41Mademoni gaturaa kuvandu vanyingi nigahanzuka, nigavoora, “lvi oveeye Mwana wa Nyasaye!”

Navuzwa Yeso yagagondokera, siyagavugilira gamolome mba, kigira gaamanya aveeye Kristo.

Yeso yilwaza mu masinagogi

(Mar. 1:35-39)

42Lwa vwacha, Yeso yatura nazia aha avandu vatali. Avandu vaali nivamwenyaa ligali. Lwa vaduuka aha yaali, vageriza kumwigalira avuli kutura kuvo. 43Navuzwa yavavolera, “Gaduukanaa inzi nzilwaze Amakuva Malahi gu Vwami vwa Nyasaye mu madaala goosi kandi, kigira ndatumwa ku kivuni chene yiki.”

44Kunangwa Yeso yilwaza mu masinagogi mu Vuyuda mwosi.

Currently Selected:

LUKA 4: LOGOOLI

Highlight

Copy