LITANGA 31

Yakobo Yiruka Kutura kuabani

1Yakobo yahulira ndi avayaayi va Labani vavoola, “Yakobo amali kuvugura vindu viosi via baba wiitu. Yanyoora vutugi vwivwe vwosi kutura ku miandu ja baba wiitu.” 2Kandi Yakobo yalora ndi Labani si yamuyanza kuli maziambiri mba. 3Maku Yahova yamuvolera, “Wirane mukivala cha vaguuga vovo kandi aviiko vovo. Inzi ndava harara na ivi.”

4Kunangwa Yakobo yatumana Raheli na Lea vaze kumwaganira mu mulimi uwi chayo chiche chaali. 5Yavavolera, “Inzi ndolaa ndi baba winyu siaveeye nu vuyanzi ninzi kuli yaali maziambiri mba. Navuzwa Nyasaye wa baba wange aveeye harara ninzi. 6Munyi mumanya vulahi ndi, inzi ndaatumikira baba winyu nu mwoyo gwange gwosi kandi ni zinguru ziange ziosi. 7Navuzwa baba winyu uali kungada kandi uali kugirung'anyia mitungu jange haali likomi. Navuzwa Nyasaye siyaamuvugilira kusalirizwa mba. 8Lwa baba winyu avoora, ‘Chayo keveeye chu vubalabale kilava mitungu jijo, hene yaho, chayo choosi chiivulaa vimeme viu vubalabale.’ Lwa avoora, ‘Chayo keveeye novong'orang'orekilava mitungu jijo,’ hene yaho chayo choosi chiivulaa vimeme vio vong'orang'ore. 9Nyasaye amali kuvugura chayo cha baba winyu na yamali kuhaana ku inzi.

10“Ing'inga yi chayo chenya kutuuma, ndaloota ndi, zimburi zikole ziatuma chayo ziali ziu vubalabale kandi zio vong'orang'ore 11Maku engelosi wa Nyasaye yamoloma na inzi mu maloto nevoola, ‘Yakobo!’ Ndaativura, ‘Mbeeye hano.’ 12Yavoola, ‘Henza zimburi zikole ziosi izituuma chayo ziveeye ziu vubalabale kandi zio vong'orang'ore Inzi ngola yaga kokoleka kigira mali kolola goosi aga Labani akokoraa. 13Inzi mbeeye Nyasaye uwaloleka ku ivi ha Bezeli, ha ivi wavika ligina kandi witulura maguta ga muzeituni. Wahakola kuva hatakatifu, kandi hu walomba lilagana liilio ninzi. Kalunu wetegeke kwirana mukivala cha wiivulwamu.’ ”

14Raheli na Lea vaativulira Yakobo, “Kunyi si koveeye ku ni kindu choosi anoho miandu josi jitigaye kutulaku baba wiitu mba. 15Yaaokola kuva kuli avatugwa. Yaakuguliza, na kalunu amali kutumikira mabese goosi agayahevwa ku kunyi. 16Uvutugi yivu vwosi vwa Nyasaye yavugula kutura ku baba wiitu, voveeye miandu jiitu harara na vana viitu. Okole cha Nyasaye akovooleeye.”

17Kunangwa Yakobo yetegeka kwirana mukivala cha Kanaani harara na vakali veve. 18Yavika vana veve kandi avakali veve ku zing'amia, kandi navugura mitugu jije josi harara ni vindu viosi via yanyoora Mesopotamia, ma nazia mukivala cha Kanaani ku baba weve Isaka. 19Lwa Labani yaali naziiyi kukalaga vwoya vwa magondi geege, Raheli yiva avanyasaye vi inyumba ya baba weve. 20Yakobo yagada Labani ndi si yaali ni lienya kwiruka mba. 21Yavugula vindu viosi via yaali navio ma nazia vwangu. Yambuka mugera gwa Efurate ma nazia mu kiguru cha Gileadi.

Labani Yalondelera Yakobo

22Inyima wa madiku gavaga, Labani yamanya ndi Yakobo umali kwiruka. 23Yavugula vandu veve avasaza ni valondelera Yakobo ku madiku saba, kuduuka nimuvamunyoola mu kiguru cha Gileadi. 24Nyasaye yaloleka ku Labani mu maloto vudiku namuvolera, “Uhenze vulahi, utatiihiza Yakobo mba.” 25Labani yaduuka ku Yakobo uwaali nalombi lihema lilie ku kiguru, na Labani yalomba lihema lilie na vandu veve mu kiguru cha Gileadi.

26Labani yavolera Yakobo, “Kigira ki wangada kandi nuvugula vakana vange kuli avahambe vu vulwani? 27Kigira ki nungada kandi niwiruka mu vwivisu vugira kombolera? Ulava niwaambolera, ngano ndaakusiivula nuvusangali, nukwimba zinyimbu harara nu vukana kandi amarere. 28Kigira ki wavula koleka ndavuusa na vakana vange kandi na visukuru vange? Yiki ni kindu chu vusilu chumali kokora! 29Inzi mbeeye nuvunyari kusaliriza, navuzwa Nyasaye wa baba woovo amolomi na inzi mugolova vudiku, niyanziganihiza ndi mburi kukutihiza mba. 30Inzi manyi ndi wiruki kigira waali nuvuha kwirana hango ha baba woovo, navuzwa kigira ki wiva avanyasaye vi inyumba yange?”

31Yakobo yativura, “Inzi ndaali nuvuti kigira ndaaganagana ndi ivi ulavugula avakaana vovo kutura ku inzi. 32Navuzwa niiva ulanyora ndi mulala kukunyi aveeye na vanyasaye vovo, aliitwa. Imbiri wa viko viitu kuli avalorekizi, ohenzerizi na niiva ulanyora kindu choosi ekeveeye chicho uvuguli.” Hene yaho Yakobo si yamanya ndi Raheli yaali niyivi avanyasaye va Labani mba.

33Labani yazia kohenza mu mahema ga Yakobo; kandi nahenza mu lihema lia Lea, kandi nahenza mu lihema lia avatumikiri vakali vaviri, navuzwa si yanyoora vanyasaye veve mba. Maku yazia kohenza mu lihema lia Raheli. 34Raheli yaali navuguyi avanyasaye va Labani navavisi isi mu vwikaliru vwi ing'amia ma yaali niyikaye kucho. Labani yenyeleriza mu lihema liosi, navuzwa si yavanyoola mba. 35Raheli yavolera baba weve, “Utava nu vutima ninzi mba, mwami wange, kigira inzi sinduukani kusingira imbiri woovo mba; mbeeye mu madiku gange gu mu mweli.” Labani yenyeleriza vanyasaye veve navuzwa si yavanyoola mba.

36Maku Yakobo yasinyika nateeva Labani muvutima, “Vudamanu ki vwa inzi mali kokora? Vwoni ki vwa mali kokora uvugira ivi nonondelera, nukwenyeleriza mu mahema gange? 37Kalunu umali kwenyeleriza mu mahema gange goosi, viju ki via onyooye viveeye iviivio? Uviviiki havulavu imbiri wa vandu vovo kandi avandu vange vavilore, kunangwa vaduuki kukalaga hagati hiitu nivwaha oveeye mulungi. 38Inzi mali komenya na ivi ku mihiga 20; magondi googo kandi zimburi zizio si zia logosaku mba. Inzi si ndaaliaku magondi googo mamigu gi chayo chicho mba. 39Inzi si ndaleetaku ku ivi ligondi litiywi ni inyama yu muvulimu mba. Ndaavugilira kukutunga inzi mwene. Ivi wenyaa mitungu kutura ku inzi ku kindu choosi ichiivwa mbasu anoho vudiku. 40Haali kanyingi ndaali mu mulinyangana kigira luya lunyingi mu ing'inga yu muvasu, kandi vukindu vunyingi mu ing'inga yu vudiku. Si ndagonaku zindolo kali hakuzu mba. 41Ku mihiga 20 ja ndaamenya na ivi, ndaakutumikira mihiga 14 konyoora vakana vovo vaviri; na mihiga 6 ndalinda viayo vivio. Kali ndio Ivi wagirung'anyia mitungu jange haali likomi. 42Nyasaye wa baba wange, Nyasaye wa Aburahamu kandi Nyasaye wa Isaka alavula kuva harara ninzi, ngano wangunga vugira kindu choosi. Navuzwa Nyasaye umali kolola uvudinyu vwange kandi linyang'ana lie miyinzi jange. Uvudiku vwa mugolova, uhaani likalaga lilie lirungi.”

Lihulirizana hagati ha Yakobo na Labani

43Labani yativulira Yakobo, “Avakaana yava vaveeye avange; avana vaavo navange kandi viayo yivi viosi niviange. Vindu viosi via ololaa hano yivi ni miandu jange. Navuzwa kigira si mbeeye ni chanyala kokora ndigale na vakana vange yava harara na vana vaavo, 44Inzi nzetegeki kolomba livugilizana na ivi. Genda kolombe kitumi cha magina keve ekelolero hagati hiitu.”

45Kunangwa Yakobo yavugula ligina naalivika live kuli kelolero chu kwizulizilaku. 46Yavolera vandu veve vavungizi magina ma valombe kitumi cha magina. Maku valia chukulia ahimbi ni kitumi cha magina yicho. 47Labani yalanga havundu yaho Jegari Sahaduza#31:47 Jegari Sahaduza: Yili ni lieta liu Luharabu; liveeye kovora “Kitumi che kedeera chukwizuliza.”, navuzwa Yakobo yagulika havundu yaaha Galeedi#31:47 Galeedi: Yili ni lieta liu Luheburaina; liveeye kovora “Kitumi che kelolero chukwizuliza.”. 48Labani yavolera Yakobo, “Kitumi cha magina yiki kilava kelolero chu kwizulizilaku.” Yiki nicho chagira havundu yaaha nihalangwa Galeedi. 49Labani yavoola kandi, “Yahova ayaanze akulindi, kali niiva kulavukana.” Kunangwa havundu yaaha halangwa kandi, “Mizipa#31:49 Mizipa: Yili ni lieta liu Luheburaina; liveeye kovora, “Kitumi chu Kulindiraku.”.” 50Labani yaazizagilira kovora, “Niiva alakolera vakana vange vudamanu anoho oleete vakali vandi komeeda ku vakana vange, kali niiva sindavula kumanya, wizulizi ndi Nyasaye aveeye muloli hagati hiitu. 51Yiki ni kitumi cha magina cha inzi mali kuviika hagati hiitu, keve kuli kelolero chu kwizulizilaku. 52Kitumi cha magina yiki keveeye kelolero. Inzi sindasilaa kitumi cha magina yiki kuza ku kwingilira mba; anoho ivi si ulasilaa kitumi cha magina yiki kuza kunyingilira mba. 53Nyasaye wa Aburahamu, kandi Nyasaye wa Nahori alahaana likalaga lirungi hagati hiitu.” Maku Yakobo yisuha kulinda lilagana yili mu lieta lia Nyasaye wa baba weve Isaka yaasigamiraa. 54Yakobo yahaana kisiuviriru ku kiguru, ma naagenihiza aviiko veve mu lilia. Inyima wa vaali ni vakalia, vaali mu lilinda uvudiku vwosi ku kiguru. 55Mugambazuri lidiku lialondaku, Labani yavusa aviisukulu veve harara na vakana veve ma navagasiza. Maku yasivulana navo ma niyirana yengo.

Currently Selected:

LITANGA 31: LOGOOLI

Highlight

Copy