LITANGA 30

1Lwa Raheli yalora ndi siyivulila Yakobo avana mba, yamanya nakendekera mukaana wavo. Kunangwa yavolera Yakobo, “Unzivulizi avana anoho inzi ndakuza.”

2Yakobo yasinyikira Raheli kandi navoora, “Inzi si nyara kuvugura vwiyangu vwa Nyasaye mba. Oyo niye wakola ivi kuvula konyoora avana.”

3Yavoola, “Aveeye hano Biliha mukaana mutugwa wange, ove harara naye, kunangwa yanzivulili mwana. Munzira kuli yiyi inzi ndagwa mama kuvitira muye.” 4Kunangwa yahaana Biliha ku musaza weve, kandi yaali harara naye. 5Biliha yavereka ma niyivulira Yakobo mwana muyaayi. 6Raheli yavoola, “Nyasaye umali kukalaga muliyaanzilira liange. Amali kuhulira lisaala liange kandi ambeeye mwana muyaayi.” Kunangwa yamugulika Dani. 7Biliha yavereka kandi ma niyiivulira Yakobo mwana muyaayi wa kaviri. 8Maku Raheli yavoola, “Inzi mali kulwaana vulwani vonene nu mukaana wiitu, kandi mali kuguuta.” Kunangwa yamugulika Nafutali.

9Lwa Lea yaamanyiriza ndi yalekera konyora avana, yahaana Ziliba mukaana weve mutugwa ku Yakobo kuli mukali weve. 10Maku Ziliba yivulira Yakobo mwana muyaayi. 11Maku Lea yavoola, “Inzi mbeeye ni ingavi!” Kunangwa yamugulika Gadi. 12Ziliba yivulira Yakobo mwana muyaayi wa kaviri, 13kandi Lea yavoola, “Inzi mbeeye nuvuyanzi ligali! Kalunu vakali valananga vuyanzi.” Kunangwa yamugulika Asheri.

14Ing'inga yiligesa lie ingano, Rubeni yazia mumilimi ma nanyoora makuyu guvuyaanzi aga yaleetera mama weve Lea. Raheli yavolera Lea, “Mwaza nuyanza mbe makuyu guvuyaanzi agumuyaayi woovo.”

15Lea yativura, “Si gaduuki ndi ivi umali kuvugura musaza wange? Kalunu ogerizaa kuvugura makuyu guvuyaanzi gu muyaayi wange.”

Raheli yavoola, “Niiva ulamba makuyu guvuyaanzi gumuyaayi woovo, ivi unyala kuva harara na Yakobo uvudiku vwakalunu.”

16Lwa Yakobo yaza hamugorova kutura mumilimi, Lea yazia kumwaganira kandi navoora, “Ivi ulava harara na inzi vudiku vwa kalunu, kigira mali kukugulaa amauwa gu vuyanzi gu muyaayi wange.” Kunangwa yaali harara naye uvudiku yivwo.

17Nyasaye yahulira lisaala lia Lea, na yavereka kandi niyiivulira Yakobo mwana muyaayi wakatano. 18Lea yavoola, “Nyasaye umali kumba madanyi gange, kigira inzi ndahaana mutugwa wange ku musaza wange.” Kunangwa yagulika muyaayi weve Isakari. 19Lea yavereka, kandi niyivulira Yakobo muyaayi wa sita. 20Yavoola, “Nyasaye ombeeye kihanwa kilahi. Kalunu musaza wange alambugilira, kigira inzi mali kumwivulira avayaayi sita.” Kunangwa yamugulika Zabuloni. 21Lwinyima yivula mwana mukaana namugulika Dina.

22Maku Nyasaye yizuliza Raheli. Yamutivulira lisaala lilie kandi naamukora konyoora avana. 23Yavereka kandi niyiivura mwana muyaayi ma navoora, “Nyasaye umali kunduliza muzisoni. 24Vwakaveeye vulahi Yahova yameda muyaayi wundi.” Kunangwa yamugulika Josefu.

Yakobo na Labani

25Inyima wa Josefu yaali niyakivulwa, Yakobo yavolera Labani, “Oleke zirane yengo wiitu. 26Ombe vakali vange navana vange ava inzi mali konyoora kigira miyinzi ja ndakokolera, na inzi ndazia. Ivi umanya kuli ndaakutumikira vulahi ligali.”

27Labani yamuvolera, “Inzi mali kumanya kuvitira muvusigitiri ndi Yahova umali kuungasiza kigira ivi. 28Vola mitungu jijo na inzi ndakutunga.”

29Yakobo yativura, “Ivi umanyia kuli ndaakuyinziliyaa kandi kuli mitugu jijo jameedeka kigira vulindi vwange. 30Vikekeke via waali navio inzi ni ngikiri kuuza, viameedeka ligali, kandi hoosi handasena Yahova yakugasiza. Kalunu ing'inga imali kuduuka inzi kulinda avandu vinyumba yange.”

31Labani yateva, “Kindiki chanyala kukutunga?”

Yakobo yativura, “Utandunga kindu choosi mba. Navuzwa niiva ulangolera kindu kilala yiki, inzi ndazizagilira kulinda mitugu jijo: 32Oleke mbenze mu mitugu jijo kalunu kandi mbuguli vuli ligondi limwamu na vuli imburi yuvubalabale. Yigi nijo mitungu josi jaanyenya. 33Mu madiku gaaza unyala kumanyiriza niiva ndaali musuuvirifu. Lwa waza uzi kohenzeriza mitungu jange, niiva ndakave ni imburi yoosi itaveeye nuvubalabale anoho ligondi litaveeye limwamu, ivi ulakamanye ndi limali kwivwa.”

34Labani yavoola, “Vulahi! Leka gave kuli ovooye.” 35Navuzwa lidiku yilio Labani yaatuliza zimburi zisaza ziali nuvubalabale kandi nizingali ziosi ziali nuvubalabale anoho vulavu muzio. Yaatuliza kandi magondi mamwamu. Gaali muvulindi vwa vayaayi veve, 36kandi yatura ku Yakobo ni mitugu yigi nazia logendo lwamadiku gavaga. Yakobo yalinda mitugu jindi josi ja Labani ijaatigala.

37Yakobo yatema zisia kutura ku musaala gwumutaave, migusa kandi kutura kumusaala gwumuseverenze muvisi vuli kazozo. Yaakuvula ku magodo kandi nakora zisia ni ziva ni midindi imilavu. 38Yavika zisia yizi imbiri wi mitugu ahimbi ha zianwera mazi. Yaazivika ho kigira mitugu jaganilaho lwa jenya kutuma, maku jiheriza lwa jaaza kunwa mazi. 39Kunangwa lwi mitugu jagana ma nijiheriza imbiri wi zisia, zivuula vimeme ving'ereng'anu, viovubalabale kandi viovong'orang'ore.

40Yakobo yavukanyia magondi kutura mu zimburi kandi naagakora nigahenza lovega lwi mitugu ja Labani jovong'erenganu nu vumwamu jiveeye. Yanenehiza chayo chiche kandi nakiviika halovega kutura ku cha Labani.

41Lwi mitugu jizinguru jaaganaa, Yakobo yavika zisia imbiri wa zio aha zianwera mazi, kunangwa zihambiri ahimbi ni zisia. 42Navuzwa si yavika zisia imbiri wi mitugu midedekere mba. Nonoho Labani yaali ni mitugu midedekere, na Yakobo yaali ni mitugu jizingulu josi. 43Yakobo yagwa mutugi ligali munzira kuli yiyi. Yaali niviayo vinyingi, vatumikiri vakali na vasaza, zing'amia kandi zibunda.

Currently Selected:

LITANGA 30: LOGOOLI

Highlight

Copy