VATUMWA 1

1Ku amiitu Muyanze Zeofilo: Mu kitabu change chu kutanga, ndang'oda makuva gi vindu viosi via Yeso yakola nu kwigiza kutura naata nga miyinzi jije 2kuduuka ku lidiku lia yavugurwa kuzia mwigulu. Kuvugulwa, yahaana amalago mu zinguru zia Roho Mutakatifu ku avatumwa va yaali natovoye. 3Ku ing'inga ya madiku arubaini inyima wi likuza lilie, Yeso yaloleka haali kanyingi kuvo mwene, kandi mu zinzira zialolekiza ndi ligali aveeye mwoyo inyima wuvusaliri vwivwe. Vamulola, na moloma navo kigira makuva gu Vwami vwa Nyasaye. 4Lwa yavugana harara navo yavaha lilaga yili: “Mutatula mu Jerusalemi, navuzwa mulindi kihanwa cha Baba yasuuviriza, cha ndamuvolera makuva gacho. 5Yohana yabatizaa na amazi, navuzwa mulabatizwa mu Roho Mutakatifu inyima wamadiku makekeeke.”

Yeso yavugurwa kuzia mwigulu

(Mar. 16:19-20; Luk. 24:50-53)

6Lwa avatumwa vavugana harara na Yeso, vamuteeva, “Mwami, ing'inga yiyi uliranyira Isiraeli Uvwami?”

7Navuzwa Yeso yavavolera, “Sigaveeye aginyu munyi kumanya zing'inga anoho madiku ga Baba yavika ho mwene mu zinguru zizie. 8Navuzwa lwa Roho Mutakatifu aliiza ku munyi, mulizurwa ni zinguru kandi mulava avalolekizi vange mu Jerusalemi, Ivuyuda, Samaria, kandi kuduuka ku keheri chi lirova.” 9Inyima wokovoola yaga, vavugulwa kuzia mwigulu, ni Lilesi liamukunika kutura mu zimoni ziavo.

10Lwa vaali nivachumiki mwigulu ing'inga Yeso yaali nazizaa, nonoho avandu vaviri avaari niviviiki ziganza zindavu, vasingira himbi navo. 11Vavavolera, “Munyi avandu va Galilaya! Kigira ki musingiyi ni muheezaa mwigulu? Yeso uyu, uvuguliywi kutura ku munyi kuzia mwigulu, alirana kandi kuli munyi mumuloli nazizaa mwigulu.”

Matia kotovolwa kuvugura vogono vwa Yuda Esikarioti

(Mat. 27:3-10)

12Maku avatumwa virana Jerusalemi kutura ha Kiguru cha Mizeituni, ichaali ahimbi ikilomita ndala kutura mu Lidaala lia Jerusalemi. 13Lwa vaduuka Jerusalemi, vazia munyumba yi yigulu, mwa vaali nivamenyi; navo vaali Petero, Yohana, Yakobo, Andereya, Filipo na Tomasi, Baturumayo na Matayo, Yakobo mwana wa Alufayo, Simoni mu Zelote na Yuda mwana wa Yakobo. 14Yava vosi vavugana harara kazozo mu lisaala, kuli muganda, harara na vakali kandi Maria mama wa Yeso, na avamwavo veve.

15Inyima wa madiku makekeeke, liali ho livugana lia vandu avasuuviraa, vaduuka ahimbi mia moja na sirini. Petero yasingira hagati haavo, 16navoora, “Avaamitu vange, Amang'oda Matakatifu genyekaa gadukizwi kuva gagiligali, aga Roho Mutakatifu yamoloma kuvitira mu Daudi, kigira Yuda uwimilira yavo avagumira Yeso. 17Yuda yaali mulala ku kunyi, kigira yatovolwa asange ni kunyi mu vutumwa vwitu.”

18Mumanyi kuli mundu uyu yaagula mulimi na mabese ka yanyoora kutura ku madanyi gu vwoni vwivwe. Yagwa hasi, naatulika, kandi viumunda vivie viosi viasalika. 19Avandu vosi mu Jerusalemi vahulira amakuva gaali nigekoleki ku Yuda, na ku lwa yago, vaagulika mulimi yigwo, mu lulimi lwavo “Akelidama,” liveeye kovora, “Mulimi gwa masahi.”

20Petero yavoola; “Gang'odwa mu kitabu cha Zaburi,

‘Leka hango hehe hang'anywi;

kandi mundu woosi atamenyaa ho kandi mba.’

Kandi gang'odwa,

‘Mundu wundi avuguli vwiyangu vwivwe mu vutumiki yivu.’

21“Kunangwa kuduuka kotovole mundu wundi, mulala ku yavo avaari harara ni kunyi zing'inga ziosi ziu Mwami Yeso yamenya hagati hiitu. 22Gamudukira ave uwahambana ni kunyi kutura ing'inga ya Yohana yabatizanga avandu kuduuka lidiku lia Yeso yavugurwa kutura ku kunyi kuzia mwigulu. Kuduuka ahambane ni kunyi, ave mulolekizi wi lisimuguka liu Mwami Yeso.”

23Maku, vaatala amita ga avandu vaviri; wu kutanga yaali Josefu uwalangwa Barisaba kandi yalangwa Jusito, uwa kaviri yaali Matia. 24Kunangwa, vasaala nivavoora, “Mwami, ivi umanya mioyo ja avandu vosi. Ku lwa yago ukumanyie ni uliha ku avandu vaviri yava wa ivi otovooye, 25avuguli vwiyangu uvwu vutumiki vu vutumwa yivu, vwa Yuda yaleka, nazia ha yenyeka ave.” 26Maku vakuba ikura kuvo, na ikura yagwira Matia; naye yameedwa ku avatumwa vandi likomi na mulala!

Liza lia Roho Mutakatifu ku avasuuviraa

Currently Selected:

VATUMWA 1: LOGOOLI

Highlight

Copy