VATUMWA 2

1Lwa liaduuka lidiku lia Pendekote, vandu avasuuviraa vosi havundu harara. 2Nonoho, vahulira muhuumu kutura mwigulu gwahulirika kuli imbuza enene, ni gwizura inyumba yoosi mwa vaali ni vikaaye. 3Maku, valora ichaloleka kuli zinimi ziu muliru nizilandaa kandi zidiira mundu sa mulala uwaali mu nyumba yeyo. 4Vosi vizura Roho Mutakatifu, kandi ni vatanga komoloma mu zinimi zindi, kuli Roho yavaha livoora.

5Kunangwa vaali ho Avayuda avamenya mu Jerusalemi, avandu vaali ni vaatia Nyasaye ligali muno avaari nivatuli muvivala viosi vie lirova. 6Lwa vahulira muhuumu yigwo, kiduma kenene chavugana harara. Vosi vagenya kigira mundu sa mulala yahulira avasuuviraa yavo ni vamoloma lulimi lwilwe. 7Vagenya kandi vahuga ligali, ni vavoola, “Avandu avamolomaa yava vosi, si vaveeye Avagalilaya? 8Gaali ndi kunyi sa mulala ahuliraa nivamoroma lulimi lwilwe mwene? 9Avalala ku kunyi vaveeye Avaperezi, Avamedi na avandi ni avandu va Mesopotamia, Ivuyuda, Kapadokia, Ponto na Asia, 10Furija na Pamufilia, Egebeti ni zimbega zia Libia ahimbi na Kurene; avandi ku kunyi na vageni kutura Rumi, 11Avayuda navandu vizamira lisuuvira lia Vayuda; avandi vaatura Kerete na Arebia. Kunyi kwosi ku vahulira ni vavoola mu zinimi zietu, iviveeye vikolwa vinene via Nyasaye.” 12Kandi vosi vagenya ni vahuga, ni vateevana, “Yaga goosi gaveeye kovora ki?”

13Navuzwa avandi vakolera avasuuviri kehenyahenye, ni vavoola, “Avandu yava vakuhambika malwa mahia!”

Limoloma lia Petero

14Maku Petero yasingira harara na avaari likomi na mulala, natanga kwilwaza nu mwoyo munene, na avolera kiduma, “Avayuda vache kandi munyi mwosi avamenyaa mu Jerusalemi, mumbulirizi kandi muleke inze muvoolere icha yaga gavoora. 15Avandu yava si vahambiki kuli muganaganaa kigira zisa ni zivaga vuzwa zia mugamba. 16Yaga na gu muporofeti Joeli yavoola,

17‘Mu madiku ge keheri, Nyasaye avoora:

Ndazuka Roho wange ku avandu vosi.

Avana vinyu, avayaayi na vakana,

valaporofeta makuva gange;

vasoleri vinyu valalola malola,

na vasakulu vinyu valalota maloto.

18Yee, kali avatumikiri vange, avayaayi na vakana,

ndazuka Roho wange kuvo, mu madiku yago

kandi valaporofeta makuva gange.

19Ndakora vilolekizu yigulu mwigulu,

na viokogenyia hasi mu lirova;

galava ho amasahi, muliru nu mwoki munene;

20liuva lilava kisundi,

na umweli gulava mwakanyu kuli amasahi;

lidiku linene liu vukumi vwa Nyasaye nilikikiri kuduuka.

21Kandi galava ndio, ku avandu vosi ulianira ku lieta liu Mwami, alakahonywi.’

22“Munyi avandu va Isiraeli, muhulirize amakuva yaga! Yeso wa Nazareti, yaali mundu wa Nyasaye yalang'aminya ku munyi ku vikolwa viokogenyia, na vie zinguru ni vilolekizu. Nyasaye yakolera vindu yivi muye hagati hinyu kuli munyi aveene mumanyi. 23Kolondekana ni lilohiza lilie mwene, Nyasaye yaali ni yatovola ndi Yeso ahaanwi mu makono ginyu. Navuzwa munyi mwamwita kigira mwalekela avandu avoni navadamanu kumuvaamba. 24Navuzwa Nyasaye yamusimugukiza kutura mu vakuzu na muvoholora kutura mu vusaliri vwi likuza, kigira si ganyalika ndi likuza limuvohe mba. 25Kigira Daudi yavoola kuye ndi,

‘Ndaalora Mwami imbiri wange kazozo;

kigira aveeye ninzi, ha mukono mulungi gwage,

kunangwa mburi kodengeyizwa mba.

26Kigira yaga, mwoyo gwange gwayaanza;

kandi lulimi lwange lwasangala.

Kali ndio muviri gwange gulamenye mu lisuuvirizwa

27kigira si ulileka mwoyo gwange mu kihadisi,

kandi si ulivugilira Mutakatifu woovo kuguunda.

28Ivi umali kumanyia zinzira ziu kuduuka mu livamwoyo,

ivi unzizulizi vuyanzi imbiri wi zimoni zizio!’

29“Avaamitu vange, nyanza kumuvolera havulavu amakuva gaaduuka ku Daudi, guuga wiitu. Yakuza, naatevwa kandi kilindwa chiche keveeye hano harara ni kunyi kuduuka lero. 30Navuzwa kigira Daudi yaali muporofeti, yamanya ndi Nyasaye yamwisuuhila liesuuha ndi alakola mulala ku visukululwi veve ave mwami mu vogono vwivwe. 31Daudi yalora yaga imbiri kandi namoloma kigira lisimuguka lia Kristo lwa yavoola:

‘Si yalekala mu kivala cha vakuzu mba;

muviri gwigwe si gwagundira mu kilindwa mba.’

32Nyasaye umali kusimugukiza Yeso uyu kutura mu likuza, na kunyi kwosi koveeye avalolekizi ku likuva yili. 33Yeso umali konenehizwa kuduuka ha mukono mulungi gwa Nyasaye, Baba weve, kandi umali konyoora Roho Mutakatifu kutura kuye, kuli yaali niyasuuviriza. Icha munyi muloraa kandi muhulira kalunu keveeye kihanwa chiche ichamali kuzuka ku kunyi. 34Siyaali Daudi mwene uwanigira mwigulu, navuzwa oyo yavoola,

‘Mwami yavolera Mwami wange;

Wikale hano ha mukono gwange mulungi,

35kuduuka lwa nguuta avasigu vovo vave hasi ha malago googo.’

36“Avandu vosi ava Isiraeli gavadukiraa vamanye ligali ndi Yeso uyu wa munyi mwavamba, niyie wa Nyasaye amali kokora ave Mwami kandi Mesia.”

37Lwa avandu vahulira yaga, vatumitwa mu mioyo jaavo, nivateeva Petero na avatumwa vandi, “Avaamitu, kokora ki?”

38Petero yavativulira, “Mwiganiri mwosi, mubatizwi mu lieta lia Yeso Kristo, musamiifwi uvwoni vwinyu, kandi mulanyola kihanwa cha Roho Mutakatifu. 39Kigira lisuuvirizwa lia Nyasaye lialomberwa munyi, nu ku avana vinyu, kandi ku vosi avamenyaa ihale, nuku vosi avu Mwami Nyasaye wiitu alaangaa vaze kuye.”

40Petero yiganihiza avandu na amakuva gandi manyingi, na avanigaa, navoora, “Mwehonyie ku likula lidamanu yili.” 41Kunangwa avanyingi vasuuvira amakuva geege, nivabatizwa lidiku liene yilio. Avandu vaduuka ahimbi zielefu zivaga komeeda livaliza liu muganda gwa avasuuviri. 42Yava vosi vamenya harara nivigaa ku avatumwa, komenya harara mu vuhambani mu vusangi, komeganyia mugadi kandi mu lisaala.

Limenya lia vandu vasuuvira

43Viokogenyia kandi vilolekizu vinyingi viakolwa na avatumwa, kuduuka avandu vosi ni vaava nuvuti mu mioyo jaavo. 44Avasuuviri vosi vazizagilira kuva nuvuhambani, ni vagavulana vindu viavo viosi harara. 45Vaguliza uvutugi vwavo ni vindu viavo ni vagavulana mabese vosi, samulala kuli yenya. 46Amadiku goosi vahongera kuvugana mu Litembeli, navuzwa ing'inga yo komeganyia mugadi, vavugana mu zinyumba ziavo, ni vasanga viukulia viavo nu vuyanzi kandi ni mioyo jaali ligali. 47Vizominya Nyasaye, na vandu vosi vavyaanza. Vuli lidiku Mwami yavameedaa ku muganda yigu vandu vandi vahonywa.

Petero na Yohana vahonyia mulema

Currently Selected:

VATUMWA 2: LOGOOLI

Highlight

Copy