Marko 6

1Ya twula ho, ni yadza mu v kivala kikye; avegidzwi vsve va mu londa. 2Lwa lisabato lya duka, ya tanga kwegidza mu lisomero: navanyingi va mu hulira ni va genya, ni va vola, Mundu uyu a twulidza ha li ha vindu yivi? Kandi, yibu nubugeeri ki bwa a hebeywi? Kandi kigira ki miyinzi minene ndi gyi koleywi nemikono gyigye. 3Uyu si ya li mbadzi, mwana wa Maria, amwavo wa Yakobo na Yose na Yuda na Simoni? Kandi vabotso veve si va li hano halala na kwinye? Ku, va mu vihirirwa. 4Navutswa Yesu ya va volera, Muprofeti si a vula kwidzominywa, navutswa mu kivala kikye, nomu viko veve, nomu inyumba yeye yeng'ine. 5Si ya nyala kukola ho miyinzi minene, navutswa ya vika mikono gyigye ku vandu va lwalanga vakekeke na a va honnya. 6Ya genya kigira va vula kusuuvira. Na a vodonkana mu madala ni yegidza.

7Ya langa ava li likumi na vaviri na a tanga kuvahila si vaviri si vaviri; na a va ha tsingulu ku myoyo midamano. 8Kandi ya va ha munwa va ta vugula kindu kyokugendera navutswa impimbo yeng'ine; va ta vugula ubukima, nemuya, netsishilling mu musigo; 9navutswa va tsia viviki vilatu: kandi va tivika makoti gaviri mba. 10Na a va volera, Hosi ha mu li duka kwingira mu inyumba, mu menye mu mu luhe mu duke kutwula ho. 11Kandi hosi ha va ta mwingiridza nokuvula kumuhulira, lwa mu twula ho, mu vungulule lugukyi lu veye mu tsi nduvatiru, lu ve lilolekidza kuvo. 12Ku, va twula ni vilwadza ni va vola, avandu veganire. 13Ni va kunga amademone manyingi, ni va vaka vanyingi avalwalanga maguta, ni va va honnya.

14Herodi mwami ya ga hulira, kigira lieta lilye lidzominywa mu kivala; na a vola, Yohana Mbatidzi u simuguki, yiki ni kigira tsingulu yitsi tsinene tsi veye kuye. 15Navandi va vola, Uyu ni Elija. Navandi va vola, Numuprofeti, kuli mulala ku vaprofeti. 16Navutswa Herodi lwa ya hulira ya vola, Yohana wa nda kalaga mutwe gwigwe, u simuguki. 17Kigira Herodi mwene ya li na a tumi mundu kugumira Yohana, na a mu vika mu inyumba yavahambe kigira Herodiya, mukali wamwavo wewe Filipu; kigira ya mu hila. 18Kigira Yohana ya li na a volera Herodi, Si bu li bulahi ive u ve nomukali wamwavo wowo. 19Na Herodiya ya mu dunyira, ni yenya kumwiita; navutswa si ya nyala mba. 20Kigira Herodi ya tia Yohana na a manya a veye mundu mulungi nomutakatifu; ya mu Iinda bulahi. Kandi lwa ya mu hulira ya genya ligali; navutswa a mu hulira nobuyanzi. 21Lwa lya duka lidiku lyobwiyangu, Herodi, ku lidiku lilye lyokwivulwa, ya dekera avanene veve, navanyampara veve, navakulu ndu ve Galilaya. 22Kandi mkana wa Herodiya mwene lwa yingira na a vina, ya sangalidza Herodi nava vikala naye ku vyokulia; mwami ya volera mkana, U nteve ku vyosi kya u yanza, ninze nda ku ha. 23Ya mwisuhira na a vola, Ku vyosi kya u nteva nda ku ha, kali ku bwami bwange luvega lulala. 24Ya twula na a teva mama wewe, Nda mu teva ki? Ya mu volera, Mutwe gwa Yohana Mbatidzi. 25Nonoho yingira bwangu womwami, na a teva, na a vola, Nyenya u mbe bwangu ndi mutwe gwa Yohana Mbatidzi ku ludiigi. 26Mwami ya verera munonono; navutswa kigira lyesuha lilye, kandi kigira avikala ku vyokulia, si ya yanza kumwambakannya. 27Nonoho mwami ya tuma mulala ku vasi kari ava mu linda na a mu ha munwa kuleta mutwe gwigwe. Uyu ya tsia na a mu kalaga mutwe mu inyumba yavahambe, 28na a leta mutwe gwigwe ku ludiigi, na a ha mka na; nomkana ya ha mama wewe. 29Navegidzwi veve lwa va ga hulira vadza ni va vugula mubiri gwigwe ni va gu ta mu kilindwa.

30Kandi avatumwa va vugana ku Yesu; kandi va mu volera vyosi vya va kola, na gosi ga vegidza. 31Na a va volera, Mudze mwinye mweng'ine mu kyangalangwi, mu sose hakekeke. Kigira vanyingi vadza ni va tsia, navo si va nyola ubwiyangu kali bwokulagira. 32Va twula ni va tsia mu kyangalangwi galaha mu liato. 33Na vandu va va lola, vanyingi va va manya, ni va nyagula ni va twula mu madala gosi, ni va vugana ho, va va vita. 34Na Yesu ya twula, na a lola kiduma kinene, na a va vererera, kigira va iwana magondi ga ta li nomwayi: ya tanga ku vegidza vindu vinyingi. 35Isi lwa ya mwama, avegidzwi veve vadza kuye ni va mu volera, Hano ni kyangalangwi, kandi kalunu isi i viti; 36u va sendukidze, va tsie mu kivala nomu madala ga veye himbi, vegulire vyokulia. 37Navutswa ya tivula na a va volera, Mu va he vyokulia. Na va mu volera, Ku tsie kugula ubukima bwetsishilling mia tsiviri ku va he va lagire? 38Ya va volera, Mu veye nemilango gyanga? Mu tsie kulola. Lwa va manya va vola, Gyi veye gyitanu, netsisudzi tsiviri. 39Ya va volera, vikalidze vosi viduma neviduma mu kiguti. 40Vikala ni va kola tsimbaso sa lulala mia, netsindi makumi gatano. 41Ya vugula milango gyitanu ne tsisudzi tsiviri, na a henza igulu, na a santidza, na a megannya milango, na a ha avegidzwi va gyi vike imbiri wavo; kandi tsisudzi tsiviri ya gavulira vosi. 42Va lagira vosi ni viguta. 43Va vungidza vihinda likumi na viviri ni vi zuye amadonye ga tigala, nevyetsisudzi. 44Navo ava lagira milango va li tsielfu tsitanu, vasatsa.

45Nonoho ya ha avegidzwi veve munwa vingire mu liato va tsie imbiri ku lwangereka lundi kuduka Betsaida, na a ki sendukidza kiduma. 46Lwa ya mala kusivulana navo, mwene ya tsia mu kigulu kusaala. 47Isi lwa ya mwama, liato lya li munyanza hagati, naye ya li yeng'ine ku luginga. 48Ya va lola ni va nyankana kugendidza liato, kigira imbuudza ya va hinulannya. Mu lilinda lya kola kane lyobudiku yadza kuvo na a genda ku madzi. Ni yenya kuvavita: 49navutswa lwa va mu lola na a genda ku madzi, va ganagana ni kigingi, ni va lira: 50kigira vosi va mu lola, ni va henda myoyo. Navutswa nonoho ya va volera, na a vola, Mweleminye; ni inze: mu ta tia mba. 51Na a nina ha va li mu liato; kandi imbuudza ya kiring'ana: ni va genya munonono; 52kigira va vula kumanya amakuva gemilango, navutswa myoyo gyavo gya li midinyu.

53Lwa vambuka va duka mu kivala kya Genesareta, ni va boha liato ku luginga. 54Lwa va mala kutwula mu liato, nonoho avandu va mu manya, 55ni va nyagula mu kivala yikyo kyosi, ni va tanga kuleta mu vitali avalwaye ha va hulira a veyo. 56Hosi ha yingira mu tudala, kinga mu madala, kinga mu kivala, va vika avalwaye mu vitu, ni va saala va dire lukigiti lwengubo yeye lweng'ine: na vosi ava mu dira va honnywa.

Currently Selected:

Marko 6: MBE

Highlight

Copy