Marko 1

1Litanga lya ivangeli ya Yesu Kristo, Mwana wa Nyasaye.

2Kuli ga ng'odwa mu makuva ga Isaya mprofeti,

Henza, ntuma mutumwa wange imbiri wetsimoni tsitsyo

U li lomba inzira yoyo

3Mwoyo gwomulala a gamba mwigendanyama,

Mu lombe inzira yo Mwami

Mu lungikidze mihanda gyigye;

4Yohana yadza, wa batidza mwigendanyama, ni yilwadza libatidza lyelyeganira kuduka ku busamehi bwobwoni. 5Ni va twula mu kivala kyosi kye Buyuda, nave Yerusalemi vosi; na a va batidza mu mu gera gwa Yordani, ni veyama bwoni bwavo. 6Na Yohana yivika ingubo yobwoya bweng'amia, nolukova lwe lisero mu kikenge kikye, na a lia tsisigi nobwuki bwomulitu. 7Ni yilwadza, na a vola, U nondanga u veye netsingulu kuvita inze, wa nta du kana kwinama kuboholola tsinkova tsyevilatu vivye. 8Inze nda mu batidza mu madzi; navutswa a la mu batidza mu Roho Mtakatifu.

9Mu madiku gene yago, Yesu ya manya ni yadza na a twula Nazareti lidala lye Galilaya, na Yohana ya mu batidza mu Yordani. 10Lwa ya twula mu madzi, nonoho ya lola ligulu li gulika, na Roho kuli likuulu yika kuye: 11na mwoyo gwa twula mu ligulu, Ive nu Mwana wange umyanze ku ive nyanza ligali.

12Nonoho Roho ya mu hila mwigendanyama. 13Na a li mwigendanyama madiku amakumi gane, Setani na a mu geridza; kandi ya li halala netsinyama tsyo ubulimu; kandi tsingelosi va mu tumekira.

14Kandi Yohana lwa ya mala kuzamwa, Yesu yadza Galilaya ni yilwadza ivangeli ya Nyasaye, 15na a vola, Inyinga i duki, nobwami bwa Nyasaye bu veye himbi: mweganire, mu suuvire ivangeli.

16Lwa ya li na a vita kuluginga lwenyanza ya Galilaya, ya lola Simoni na Andreya amwavo wewe ni vinika muluvo munyanza; kigira va li ni va veye valuvi. 17Kandi Yesu ya va volera, Hambi, mu nonde, na nda mu kola mu gwe avaluvi vavandu. 18Nonoho va leka miluvo ni va mu londa. 19Lwa ya li ni yisunda hambiri hakekeke ya lola Yakobo wa Zebedayo na Yohana amwavo wewe, kandi va li mu liato va lukanga miluvo. 20Nonoho ya va langa: ni va leka Zebedayo, ise wavo mu liato halala navayinziri, ni va mu londa.

21Ni va tsia Kapernaume, kandi nonoho ku lidiku lyelisabato yingira mu lisomero ni yegidza. 22Ni va genya lyegidza lilye: kigira ya li ni yegidza kuli wetsingulu, si yegidza kuli avang'odi mba. 23Kandi no noho ya li mu lisomero lyavo mundu wa li nomwoyo rnudamano; na a hanzuka, 24na a vola, Ku veye ndi nive, Yesu Munazareti? U dzi kukwononnya? Nku manya u veye Mutakatifu wa Nyasaye. 25Yesu ya mu gaya, na a vola, Kiring'ana, u twule kuye. 26Lwa gwa mala kumugova, nokulira nomwoyo munene, mwoyo mudamano gwa twula kuye. 27Ni va genya vosi, ni va tevana, ni va vola, Ni kindu ki yiki? Migidzo mihya A haana munwa netsingulu, nemyoyo midamano gyi mu hulira. 28Nonoho bukumi bwibwe bu landa mu kivala kyosi kya li himbi Galilaya.

29Nonoho lwa ya twula mu lisomero, va duka munyumba ya Simoni na Andreya, halala na Yakobo na Yohana. 30Nivizala wa Simoni ya li na a gona na a lwala uluhuudza; nonoho va mu volera amakuva gege: 31yadza na a mu gumira ku mkono, na a mu vukidza; uluhuudza lwa mu leka, na a va tumekira.

32Mgolova liuva lwa lya yera, va mu letera avakvaye vosi, na va mademone ga gumira. 33Lidala lyosi lya vunga ha kiliango. 34Na a honnya vanyingi va li ni va lwala tsinkudzo lugano lugano, na a twulidza amademone manyingi; kandi yambakannya amademone ga ta vola mba, kigira ga li ni ga mu manya.

35Mugamba ya vuka na a twula mabwebwe ligali, na a tsia ha vandu a va ta li, na a saalira ho. 36Na Simoni navakye veve va mu londe rera; 37kandi va mu nyola ni va mu volera, Vosi va kwenya. 38Na a va volera, Ku gende, ku tsie mu madala ga veye himbi hano, nzilwadze ho kandi; yiki ni kigira nda twula. 39Na a tsia ni yingira mu masomero gavo ga li mu Galilaya mwosi, ni yilwadza na a twulidza amademone.

40Yadza kuye mugere na a mu saala, na a mu sigamira na a mu volera, Nu u va nu u wenya u nyala kumbonnya. 41Yesu ya mu vererera, na a nyira mukono na a mu dira, na a mu volera, Nyenya, u hone. 42Nonoho lwa ya vola ndi, ubugere bwa twula kuye na a honnywa. 43Na a mweganehidza, na a vola, U tsie, na a mwambakanya ligali; 44na a mu volera, Henza bulahi u ta volera mundu kindu mba; navutswa u tsie kwimannya ku musalisi, u haanere kigira ubuhonnyi bubwo vindu vya Musa ya laga, vi ve kilolekidzu kuvo. 45Navutswa ya twula na a tanga kwilwadza muno nono nokulandidza amakuva, kali kuva Yesu si a nyala kandi kwingira midala habulavu, navutswa ya li kyova mwigendanyama: kandi vadza kuye va twula mu kivala kyosi.

Currently Selected:

Marko 1: MBE

Highlight

Copy