Matayo 26

1Yesu lwa ya mala amakuva yaga gosi, ya volera avegidzwi veve, 2Mu manya inyima ya madi ku gaviri lipasaka li ladza, na Mwana wa Adamu a la zamwa mu mikono mwa vasigu veve, a bambwe. 3Hene yaho avasalisi vanene navakulundu vavandu va vugana hamgidzi ha musalisi munene, wa langwa Kaiafa; 4ni va kola kyina halala, va duke kugumira Yesu galaha va mwiite. 5Navutswa va vola, Ga ta va inyinga yelilia, gase liyoga li la twula mu vandu.

6Yesu lwa ya li mu Betani mu inyumbaya Simoni mugere, 7mkali yadza kuye wa li nechupa yamaguta ga funya mwayu aga gulwa buguli budinyu, na a mwitira ku mutwe, ha ya li yikaye ku vyokulia. 8Navutswa avegidzwi veve lwa va lola, va vihirirwa, ni va vola, Ligotidza yili li veye ki? 9Kigira ma guta yaga ga nyala kugulwa tsi shilling tsinyingi tsi hebwe avadaka. 10Navutswa Yesu ya manya na a vola, Kigira ki mu vereridza mkali? Kigira u nkoleye muyinzi mulahi. 11Kigira avadaka va veye halala nemwinye madiku gosi; navutswa inze si mbeye nemwinye halala madiku gosi. 12Muyinzi gwokutsuka maguta ku mubiri gwange u nkoleye ndi kunombera litebwa lyange. 13Ligali mmu volera, Hosi ha va lilwadzirwa ivangeli yiyi mu lirova lyosi, yigu gwomkali uyu a koli gu la volwa gu ve lidzulitswa lilye.

14Hene yaho mulala ku va li likumi na vaviri, wa langwa Yuda Iskarioti, ya tsia ku vasalisi vanene, 15na a vola, Mu nyala kumba ikindu ki, na inze mmu zamere mu mu gumire? Ni va mu gerera vidonye makumi gavaka vyefetha. 16Kutwula inyinga yeyo ya li ni yenya inyinga indahi yokumuzamera.

17Ku lidiku lyokutanga ku madiku gobukima bu ta li namamera, avegidzwi va tsia ku Yesu ni va mu volera, Wenya ku ku lombere ha li ki ha u lira lipasaka? 18Na a vola, Mu tsie mu lidala, mu duke ku inyu mba ya leve, mu mu volere, Mwegidzi a vola, Inyinga yange i veye himbi; nkola lipasaka mu inyumba yoyo halala navegidzwi vange. 19Avegidzwi va kola kuli Yesu ya va volera; ni va lomba lipasaka. 20Lwa gwa duka mgolova, yikala ku vyokulia halala navegidzwi va li likumi na vaviri; 21lwa va li ni va litsa ya vola, Ligali mmu volera, mulala ku mwinye a la nzama. 22Na va verera muno, ni va tanga kuteva sa mulala, Ninze naho, Mwa mi? 23Naye ya tivula na a vola, Uyu wa ku donyera naye mu ludavo, niye a la nzama. 24Mwana wa Adamu a tsia kuli ga ng'odwa kuye: navutswa Bayaye bu veye ku mundu uyo wa zama Mwana wa Adamu bu va bulahi nkano mundu uyo si ya livulwa. 25Yuda wa mzama, ya tivula na a vola, Ni inze naho, Mwegidzi? Ya mu volera, Ive u voye. 26Lwa va li ni va litsa, Yesu ya vugula ubukima, na a gasidza, na a megannya: na a ha avegidzwi, na a vola, Mu vugule, mu lagire; yibwo nu mubiri gwange. 27Kandi ya vugula kikornbe, na a gasidza, na a va ha, na a vola, Mu nwere ku yiki vosi; 28kigira yaga namasahi gange gelilagana, aga sundulirwa avanyingi kuduka ku busamehi bwobwoni. 29Navutswa mmu volera, Inze kutwula kalunu si nda nwa ku makuyu gemizabibu, nduhe nduke kumva mahya halala nemwinye mu bwami bwa Dada wange.

30Lwa va mala kwimba lwimbu, va twula ni va tsia mu kigulu kya Mizeituni 31Hene yaho Yesu ya va volera, Ubudiku bwa lero mwinye vosi mu la kolwa mu dunye kigira inze; kigira ga ng'odwa, Nda kuya mwayi, namagondi gekyayo ga la salannywa. 32Navutswa inyima we lisimuguka lyange, ndimirira imbiri wenyu kutsia Galilaya. 33Navutswa Petro ya tivula na a mu volera, Vosi ni va dunya kigira ive, inze si nda nyala kudunya ligali. 34Yesu ya mu volera, Ligali nku volera, ubudiku yibu, idaywa ni i kikiri kulagula, u la nyambakana hali kavaka. 35Petro ya mu volera, Kali nda duka kukudza nive halala, si nda kwambakana mba. Avegidzwi vosi va voia ndiyo kandi.

36Hene yaho Yesu yadza navo na a duka ha langwa Getsemane, na a volera avegidzwi veve, Mwikali hano, ntsie kusaavira hala. 37Na a vu gula Petro navandi vaviri, avana va Zebedayo, na a tanga kuverera nokuhenda mwoyo muno. 38Hene yaho ya va volera, Mwoyo gwange gu veye nobuvereri ligali kuduka kukudza: mu tigala hano mu linde halala ninze. 39Yisunda hambiri hakekeke, na a gwa mammama na a saala na a vola, Dada wange, ni ki nyalika, kikombe yiki ki mbite: navutswa ga ta va kuli ubulaliri bwange, navutswa ga ve kuli ubulaliri bubwo. 40Ya tsia ku ve gidzwi, na a va nyola ni va gona, na a volera Petro, Si mu nyala kulinda ninze isaa indala? 41Lindi mu saale, mu tingira mu ligeridzwa mba; mwoyo gwene gu yanza, navutswa mubiri si gu li netsingulu. 42Ya tsia kandi na a saala, na a vola, Dada wange, ni ga ta nyalika kikombe yiki ki mbite, mbule kukinwa, ubulaliri bubwo bu kolwe. 43Yadza kandi na a va nyola ni va gona, kigira tsimoni tsyavo tsya li tsinditu. 44Ya va leka na a tsia kandi, na a saala hali kavaka, na a vola amakuva malala mere kandi. 45Ma yadza ku avegidzwi na a va volera, Mu gone kalunu, mu sose: henza, isaa i duki, na Mwana wa Adamu a zamwa mu makono gavoni. 46Gendi, ku tsie: henza, u nzama nguyu u duki. 47Lwa ya li na a ki vola, henza, Yuda, wa li mulala ku va li likumi na vaviri, yadza halala nekiduma kinene ava li nevivavi netsimpimbo, va twula ku vasalisi vanene navakulundu va vandu. 48Kandi uyu wa mu zama ya va ha kilolekidzu, na a vola, Uyu wa na mbuse, niye: mu mgumire. 49Nonoho ya tsia ku Yesu na a mu volera, Mirembe, Rabi; na a mu busa. 50Yesu ya mu volera, Mulina, kigira ki uudzi? Hene yaho vadza ni va nyira makono ni va gumira Yesu. 51Henza, mulala ku yavo va li na Yesu halala, ya nyira mukono na a somola kivavi kikye, na a tema mu tugwa wo musalisi munene, na a mu kalaga gutu. 52Ma Yesu ya mu volera, Wirannye kivavi kikyo ha ki vedza: kigira vosi ava vugula kivavi va la dividzwa nekivavi. 53Kinga ive u ganagana inze si nyala kalunu ndi kusaava Dada wange, naye kali kalunu a la ndetera tsingelosi kuvita elfu likumi na gaviri? 54Navutswa ga duka ndi kukolwa mang'oda aga vola, yaga ga kolwe? 55Inyinga zana Yesu ya volera viduma, Mu ntwuliye kungumira nevivavi netsi mpimbo kuli mu londanga munuli? Madiku gosi ndikala mu litempeli ni nzegidza, na si mwa ngumira mba. 56Navutswa yaga gosi ga kolwa, mang'oda gavaprofeti ga duke kudukidzwa. Hene yaho avegidzwi vosi va mu leka ni viruka.

57Navo ava gumira Yesu va mu hila wa Kaiafa musalisi munene, ha vang'odi navakulundu va vugana halala. 58Navutswa Petro ya mu londerera ihale, kuduka hamgidzi homusalisi munene, ni yingira ni yikala halala navalindi, kulola age kiheri. 59Ma vasalisi vanene ne kyina kyosi venya ubugini kugina Yesu va mwiite. 60Kandi si va bu nyola mba, kali avaloli avobubehi vanyingi vadza. Navutswa avandi vaviri vadza inyima, 61ni va vola Mundu uyu ya vola, Nyala kwononnya litempeli lya Nyasaye no kulyombaka ku madiku gavaka. 62Musalisi munene ya singira na a mu volera, si u tivula kindu? Ni kindu ki kya yava va vola ku ive? 63Navutswa Yesu ya kiring'ana. Musalisi munene ya mu volera, Nkwisuhidza Nyasaye weliva mwoyo u ku volere ive niye Kristo, Mwana wa Nyasaye. 64Yesu ya mu volera, Ive u voye: navutswa mmu volera, Inyinga yidzanga mu la lola Mwana wa Adamu yikaye ku mkono mulungi gwo Wetsingulu, ni yadza kumalesi gomigulu. 65Hene yaho musalisi munene ya tandula tsingubo tsitsye, na a vola, U voye linyega: kwenyera ki avaloli avandi? Henza, kalunu mu huliye linyega lilye: 66Mu lola ndi? Ni va tivula, ni va vola, Nu bulahi a kudze. 67Hene yaho va mu tudzira amate mmoni mwimwe, ni va mu duya netsinkundi; avandi va mwala tsinzasaya tsitsye, 68ni va vola, U ku profetere, ive Kristo: ibwaha u ku duya?

69Petro ya li ni yikaye kyova hamgidzi: na mukana yadza kuye na a vola, Ive kandi wa li halala na Yesu wa Galilaya. 70Navutswa yambakana imbiri wa vosi, na a vola, Si manyi ga u vola mba. 71Naye lwa ya mala kutwula kutsia ku lusimbu, mukana wundi ya mu lola, na a volera avikala ho, Mundu uyu kandi ya li halala na Yesu wa Nazareti. 72Kandi yambakana ni yisuha, na a vola, Si mmanya mundu uyu. 73Inyima hakekeke ava singira himbi va tsia kuye ni va volera Petro, Ligali ive kandi, u veye mulala kuvo kigira livola lilyo li ku vuulira. 74Hene yaho ya tanga kulaama nokunyega, na a vola, Si mmanya mundu uyu. Nonoho idaywa ya lagula. 75Ma Petro yidzulitsa likuva lya Yesu ya vola, Idaywa i kikiri kulagula, ive u la nyambakana hali kavaka. Naye ya tsia kyova na a lira nobuvereri ligali.

Currently Selected:

Matayo 26: MBE

Highlight

Copy