Luka 12

1Mu inyinga yeyo, viduma lwa vya duka tsielfu tsinyingi va duvagana, ya tanga kuvolera avegidzwi veve, Kyembiri mu gelieh ku mamera ga Vafarisayo aga veye ubugadi. 2Si ha li nekindu ki kunikwa ki li vula kukunulwa; kandi ki viswa ki li vula kumanyekana. 3Kigira yaga ku gosi aga mwa vola mu kisundi ga la hulirwa ha bulavu; naga mwa monyana ha gutu mu bwasi ga lilwadzirwa ku visegese. 4Kandi inze mmu volera, mwinye avalina vange, Mu ta tia aviita mubiri, navutswa lwanyima si va veye nagandi ga va nyala kukola. 5Navutswa nda mu gelihidza ku uyu wa mu li tia: Mu tie uyu, na a mala kwiita, a veye netsingulu kuta mu igehena; yee, mmu volera, Mu tie uyu. 6Amatonderidzi gatanu si ga gulwa tsitsenti tsiviri? Kandi si givirirwa imbiri wa Nyasaye kali lilala. 7Navutswa kali lisu lyene lyoku mitwe gyenyu li mali kuvalidzwa lyosi. Mu ta tia: mwinye mu veye avalahi kuvita amatonderidzi manyingi. 8Kandi inze mmu volera, Vosi va mbugirira imbiri wavandu, yava Mwana wa Adamu a la va bugirira imbiri wetsingelosi va Nyasaye: 9navutswa u nyambakana imbiri wavandu a lambaka nwa imbiri wetsingelosi va Nyasaye. 10Ku vosi u li vola likuva ku Mwana wa Adamu a la samefwa: navutswa u nyega Roho Mutakatifu si a li samefwa mba. 11Kandi lwa va li mu hila imbiri wavamavugana navanene navetsingulu, mu ta henda mwoyo kuganagana litivula kandi kuli wa mu li tivula kandi aga mu li vola: 12kigira Roho Mutakatifu a la mwegidza mu isaa zana aga li mu dukira kuvola.

13Mundu mulala ku kiduma ya mu volera, Mwegidzi, u he amwavo wange munwa a ngavulire ku miyandu gyetu. 14Navutswa ya mu volera, Mundu ive, ibwaha ya mbika kuva mukalagi kinga mugavuli ku mwinye? 15Kandi ya va volera, Mwelinde ku likayirwa lyosi: kigira liva mwoyo lyomundu si li veye ku vindu vinyingi vya a veye navyo. 16Kandi ya va kupa lugano, na a vola, Mulimi gwomundu mulala mutugi gwama ligali: 17naye ya ganagana mu mwoyo gwigwe, na a vola, Nda kola ndi, kigira si mbeye na ha mbika liama lyange? 18Kandi ya vola, Nda kola ndi: nda sambula amagungi gange, nzombake agandi amanene; kandi nda vungidza mu ubuswage bwange bwosi nevindu vyange vyosi. 19Kandi nda volera mwoyo gwange, Mwoyo, u veye nevindu vinyingi vikeywi vyemihiga minyingi; u lie, u nwe, u sangale. 20Navutswa Nyasaye ya mu volera, Ive wobusiru, ubudiku yibu nu bwoku twulidza liva mwoyo lilyo; kandi vindu vya wa lomba vi la va vya bwaha? 21A veye ndiyo wivikira vindu, navutswa ku Nyasaye si a veye nobutugi.

22Kandi ya volera avegidzwi veve, Kigira yaga mmu volera, Mu ta henda mwoyo ku liva mwoyo lyenyu, ku vya mu li lia, kinga ku mubiri, vya mu li vika. 23Kigira liva mwoyo li vita vyokulia, nomubiri gu vita tsingubo. 24Mu henze amajikolo, si ga midza, kandi si ga gesa; kandi ga ta li nekideera, kinga ligungi; navutswa Nyasaye a ga hedza vyokulia: na si ndi mwinye mu vita amanyonyi 25U li ha ku mwinye u nyala kumeda ubuhindiri bwibwe kali inyinga inkekeke nelihenda mwoyo? 26Ni mu ta nyala kukola ni vikekeke ligali, kigira ki mu nyankana ku vindi? 27Mu henze amadanya, kuli ga viruka: si ga yinzira, kandi si ga sita; navutswa mmu volera, Kali Solomoni mu bukumi bwibwe bwosi, si ya li yavalwa kuli lilala kugo. 28Navutswa Nyasaye na a va ni yavala ubulimu bwomulimi bu veye ho lero, na mugamba bu tebwa mu kisambiru; na si ndi mwinye, mwinye avelisuuvira likekeke? 29Kandi mu tenya vya mu li lia, kinga vya mu li nwa, kandi mu ta hayahayidza. 30Kigira vindu yivi vyosi, tsihiri tsyomu lirova tsyenyanga: navutswa Dada wenyu a manya mu daka vindu yivi. 31Navutswa mwenye ubwami bwi bwe, nevindu yivi vyosi mu la medwa. 32Mu ta tia, mwinye kyayo kikekeke; kigira Dada wenyu a yanza kumuha ubwami. 33Mu gulidze vya mu veye navyo, mu tunge tsisadaka; mwelombere avene tsimuya tsi ta kunguha, akiba yomigulu i ta hendeka, homwivi a tisunda himbi, kandi hetsisere tsi tononnya. 34Kigira ha akiba yenyu i veye, mwoyo gwenyu gu ve ho kandi.

35Vikenge vyenyu vi bofwe, kandi tsitaya tsyenyu tsyaake; 36kandi mwinye avene mu ve kuli avandu va linda mwami wavo, lwa a lirana kutwula mu kiserero; lwa a duka ni yigulihidza, va mwigulire nonoho. 37Va veye nobugasu avatugwa avomwami a li nyola va linda lwa a duka: ligali mmu volera, a leboha a la vikalidza ku vyokulia, a ladza na a vihula. 38Ni yadza mu bulindi bwa kaviri, kinga mu bwa kavaka, na a va nyola ndi, yava va veye nobugasu. 39Navutswa mu manye yaga, mwene inyumba a va u manya inyinga mwivi a lidza, nkano ya linda, kandi nkano si a leka inyumba yeye i fulwe. 40Mwinye kandi mwetegeke: kigira Mwana wa Adamu a lidza inyinga ya mu ta ganagana.

41Petro ya vola, Mwami, lugano yilu u kupi kwinye kweng'ine, naho vosi? 42Naye Mwami ya vola, Ibwaha ni mulindi mulahi nomugeeri, womwami wewe a li vika ku avenyu mba yeye kuvaha vyokulia vyavo vya kase? 43A veye nobugasu mutugwa uyu womwami a li nyola na a kola ndi lwa a lidza. 44Ligali mmu volera, a la mu vika ku vindu vyosi vya a veye navyo. 45Navutswa mutugwa uyu na a va na a vola mu mwoyo gwigwe, Mwami wange u lindagiye; na a tanga kukuya avatugwa avayai navatugwa avakana, na a lia na a nwa, na a hambika; 46mwami womutugwa zana a ladza ku lidiku lya a ta ganagana, kandi ku isaa ya a ta manya, a la mu kalannya ligali, na a mu ha kidieli kikye halala na vatasuuvira. 47Mutugwa uyu wa manya ubulaliri bwomwami wewe na a tetegeka, kandi na a ta kola kuli ubulaliri bwomwami wewe a la kuywa ligali. 48Navutswa uyu wa vula kumanya na a kola vindu vi dukani nobukinduki, a la kuywa hakekeke. Ku vosi u hebwa vinyingi a la tevwa vinyingi: naye u hebwa vinyingi, va la mu teva vinyingi kuvita.

49Ndadza kutsuka muliru ku lirova; nyenya ki ni gu mali kwaaka? 50Navutswa mbeye nelibatidza lya ndi batidzwa nalyo; nigeywi ndi ku duka ku li nyole 51Mu ganagana ntsitsi kuha lirova mirembe? Mmu volera, Auwa: navutswa lyavukannya: 52kigira kutwula kalunu va la va avandu vatanu mu inyumba indala, va lavukana vavaka na vaviri, kandi vaviri na vavaka. 53Va lavukana ise nomuyai, kandi muyai na ise; kandi mama nomukana, kandi mukana na mama wewe; navizala na navizala, kandi navizala na navizala.

54Kandi ya volera viduma, Lwa mu lola lilesi li singiye madioli, nonoho mu vola, Imbula i ladza; ma ga va ndiyo. 55Lwa mu lola imbuudza yekusini ni i huudza, mu vola, Gu la va mbasu mululu; ma ga va ndiyo. 56Mwinye avagadi, mu manya kugera mmoni mwelirova neligulu; navutswa kigira ki si mu manya kugera inyinga yiyi? 57Kandi kigira ki mwinye avene si mu duka kuganagana ga li bulungi? 58Kigira inyinga u veye ku inzira halala nomuhangalidzi wowo kutsia wa mukalagi, widinyiridze u duke ku bohololwa kuye ku inzira; gase a la ku hila wa mukalagi, kandi mukalagi a la ku hila ku musikari, kandi musikari a la ku vika mu inyumba yavahambe. 59Nku volera, Si u twula mu ligali, u luhe u duke kutunga u malilidze isenti impelelidzi.

Currently Selected:

Luka 12: MBE

Highlight

Copy