Luka 11
11
1Ya li na a saala ha luvega lulala, kandi lwa ya leka, mulala ku vegidzwi veve ya mu volera, Mwami, u kwegidze kusaala, kuli Yohana yegidza avegidzwi veve. 2Naye ya va volera, Lwa mu saala mu vole; Dada, Lieta lilyo lidzominywe. Ubwami bubwo budze. 3Madiku na madiku u ku he vyokulia vyetu vi duki. 4U ku samehe ubwoni bwetu; kigira kwinye avene ku sameha avoni vetu. U ta ku hila mu ligeridzwa.
5Kandi ya va volera, U li ha ku mwinye u li va nomulina, naye a la ka tsie kuye ubudiku hagati, a la mu volera, Mulina u mbe kevete milango gyivaka; 6kigira mulina wange u duki hange a twula ku lugendo, na inze si mbeye ne kya mmu sundira; 7naye a la tivula mu inyumba, na a vola, U ta nya ngidza: kiliango ki hani, kandi avana vange va gona ninze ku kitali; si nyala kuvuka ntsitse kukuha? 8Mmu volera, Kali si a nyala kuvuka a mu he kigira a veye mulina wewe, navutswa kigira ubuhombi bwibwe a la vuka na a mu he gyosi gya a daka. 9Kandi mmu volera, Mu saale, mu la hebwa, mwenye, mu la nyola; mwigulihidze, mu ligulirwa. 10Kigira ku vosi u saala, a hebwa nowenya, a nyola; kandi wigulihidza, yigulirwa. 11U li ha ku mwinye u veye ise, mwana wewe na a mu saava ubukima a mu he ligina? Kinga isudzi a mu he inzoka? 12Kinga na a saaya libuyu a mu he tsing'e? 13Mwinye ava veye avadamano, ni mu manya kuha avana venyu vihaanwa vilahi, na si ndi Dada wenyu u veye migulu a la vitira kuli ha kuhaana Roho Mutakatifu kuvo ava mu saala?
14Ya li na a twulidza lidemone lya li idimbidi. Lwa lya twula mundu wa li idimbidi ya vola; na viduma vya genya. 15Navutswa avalala va vola, A twulidza amademone na Beelzebuli munene wamademone. 16Kandi avandi, va mu geridza, ni va mu teva kilolekidzu ki twula migulu. 17Navutswa ya manya tsiganagani tsyavo na a va volera, Ubwami bwosi ni bwavukana bwene, bwoneka; avenyumba ni vavukana avene, va gwa. 18Kandi Setani ni yavukana mwene, ubwami bwibwe bu nyala ndi kusingira? Kigira mwinye mu vola ntwulidza amademone na Beelzebuli. 19Inze ni mba ni ntwulidza amademone na Beelzebuli, avana venyu va ga twu lidza na bwaha? Ku yaga va la gwa avakalagi venyu. 20Navutswa inze ni mba ni ntwulidza amademone nekidete kya Nyasaye, ubwa mi bwa Nyasaye bu mali kuduka ku mwinye. 21Mundu wetsingulu na a vugula vyuma vivye vyosi, na a linda inyumba yeye, vindu vivye vi veye vilahi: 22navutswa wundi wa mu sira tsingulu lwa a duka na a mu guuta, a mu nyaga vyuma vivye vyosi vya a lemera mwoyo, a la gavannya vilanye vivye. 23Uyu u ta li halala ninze a hing'ana ninze u ta sannya ninze, a salannya. 24Roho mudamano lwa gu mali kutwula ku mundu, gu genda ha ta li namadzi, gwenya ha gu sosera, ni gu vula kunyola, ma gu vola, Ndirana mu inyumba yange ya ntwuli mu. 25Lwa gu duka gu gi nyola ni yeyeywi na i homeywi. 26Kunangwa gu tsia kuleta roho gyitanu na gyiviri gyindi midamano kusira gwene; ni gyingira ni gyi menya mu: vyanyima vyomundu uyu ni vidamano kusira vyambiri.
27Inyinga ya vola vindu yivi, mukali mulala ku kiduma ya hanzuka na a mu volera, I veye nobugasu inda yivula ive, netsimbeere tsya wa nuna. 28Navutswa ya vola, Yee, navutswa va veye nobugasu ava hulira likuva lya Nyasaye, na va li gumira.
29Viduma lwa vya li ni vi mu vuganira, ya tanga kuvola, Likula yili ni likula lidamano: lyenya kilolekidzu; navutswa si li li hebwa kilolekidzu navutswa kilolekidzu kya Jona. 30Kigira kuli Jona ya gwa kilolekidzu ku Vanineve, kandi ndiyo Mwana wa Adamu a la va ku likula yili. 31Mwami wekikali wekusini a la singira mu likalaga halala navasatsa velikula yili kandi a la va kalagira: kigira ya twula ku kiheri kyelirova kuhulira ubugeeri bwa Solomoni; kandi henza, u vita Solomoni a veye hano. 32Avasatsa va Nineve va la singira mu likalaga halala navasatsa velikula yili, kandi va la li kalagira: kigira veganira ku lilwadza lya Jona; kandi henza, u vita Jona a veye hano.
33Si ha veye nomundu lwa a hambidza itaya a gi vika mu livisa, kinga a gi kunikira mu kihinda, navutswa a gi vika ku imeza, vosi vingira mu inyumba va duke kulola ubulavu. 34Itaya yomubiri gugwo ni imoni yoyo: imoni yoyo ni i veye ing'ima mubiri gugwo gwosi gu veye nobulavu; navutswa ni i veye inda mano mubiri gugwo gwosi gu veye nekisundi. 35Kigira yaga, henza bulahi ubulavu bu veye mu ive bu ta va kisundi. 36Nu u va nobulavu mu mubiri gugwo gwosi, ni gu ta li na ha kisundi, gu la va nobulavu gwosi, kuli itaya i ku mulikira nobulavu ubunene bwayo.
37Na a ki vola ndi Mufarisayo ya mu langa a tsie kulia naye vyokulia: naye yingira ni yikala ku vyokulia. 38Mufarisayo lwa ya lola ya genya kigira si ya tanga kwisava na a kikiri kulia. 39Kandi Mwami ya mu volera, Mwinye Vafarisayo, mwogidza kikombe igulu, kandi isahani; navutswa mugati mwenyu mwizuye ubunyagi nobudamano. 40Mwinye avobusiru, u lomba vye igulu si a lomba kandi vyomugati. 41Navutswa mu twulidze isadaka ku vyomugati; kandi henza, vindu vyosi vi veye vilahi ku mwinye.
42Mwinye Avafarisayo, O bayaye bu veye ku mwinye kigira mu tunga lizaka lyenaana nesadhabu? Netsingutsa tsyosi, na mu leka amakuva gobulungi nagobuyanzi bwa Nyasaye: navutswa nu bulahi kukola yivi, kandi kuvu la kuleka yivi vindi. 43Mwinye Vafarisayo, O bayaye bu veye ku mwinye kigira mu yanza visako vyokwegingira mu masomero nokuchelidzwa mu vitu. 44O bayaye bu veye ku mwinye kigira mu fwana vilindwa vi ta loleka, vya vandu va vita ku va ta manya.
45Mulala ku vegidzi velilaga ya tivula na a mu volera, Mwegidzi, nu u vola ndi u ku nyega kandi. 46Kandi ya vola O bayaye bu veye ku mwinye kandi avegidzi velilaga kigira mu dwika avandu imisigu gyi va mina, gya mwinye avene mu ta dira ku, kali kidete kilala. 47O bayaye bu veye ku mwinye kigira mwinye mwombaka vilindwa vyavaprofeti, kandi avaguga venyu va viita. 48Na ndiyo mu veye avalolekidzi na mu bugirira miyinzi gyavaguga venyu: kigira navo ava viita, na mwinye mwombaka vili ndwa vyavo. 49Kunangwa Ubugeeri bwa Nyasaye bwa vola, Nda tuma avaprofeti navatumwa kuvo; va liita kandi va la kupidza kivi avalala kuvo; 50likula yili li duke kutevwa amasahi gavaprofeti vosi aga sunduka kutwula inyinga muse gwelirova gwa vikwa; 51kutwula ku masahi ga Habili kuduka ku masahi ga Zekaria, wa kudzera hagati hobwali nahatakatifu. Ligali mmu volera, ga la tevwa ku likula yili. 52O bayaye bu veye ku mwinye avegidzi velilaga kigira mwinye mwa hila lufunguo lwelimanya: mwinye avene si mwingira, navo ava li ni vingira mwa va gaya.
53Lwa ya twula mu, avang'odi na Vafarisayo va tanga kuvihirirwa ligali, nokumuteva vindu vinyingi; 54va duke kunyola likuva li twula mu munwa gwigwe.
Currently Selected:
Luka 11: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
