Kyavalevi 13

1Na Yahova ya volera Musa na Haruni, nokuvola, 2Mundu na a veye nelivimba ku ligodo lyombiri gwigwe, kinga ligamba, kinga ubufwiriru bwokung'ereng'ana, ni bu gwa lilwala lyobugere mu ligodo lyombiri gwigwe, hene yaho a la letwa ku Haruni musalisi, kinga ku mulala ku avana veve avasalisi: 3na musalisi a la henza ku lilwala lyeligodo lyombiri: ni i va amaswa aga veye mu bufwiriru ga girunkana kuva malavu, na liloleka lyobufwiriru li tsiye liduku kuvita ligodo lyombiri gwigwe, li veye lilwala lyobugere; na musalisi a la mu henza, nokuvola a veye mudamano. 4Na ubufwiriru bwokung'ereng'ana ni bu veye bulavu mu ligodo lyombiri gwigwe, na liloleka lyabwo ni li ta tsia liduku kuvita ligodo, na amaswa gabwo ni ga ta girunkani kuva malavu, hene yaho musalisi a la mu vika haluvega madiku gatano na gaviri: 5na musalisi a la mu henza ku lidiku lyagatano na gaviri: na henza, naye na a lola lilwala li vuli kumedeka mu ligodo lilye, ma musalisi a la mu vika haluvega madiku gatano na gaviri kandi: 6na musalisi a la mu henza kandi ku lidiku lya gatano na gaviri kandi; ni i va lilwala zana li tangi kuniala, na lilwala li vuli kumedeka mu ligodo lilye mba, hene yaho musalisi a la vola a veye mulahi: li veye ligamba vutswa: naye a logidza tsingubo tsitsye, nokuva mulahi. 7Navutswa ligamba ni li medeka mu ligodo, inyima welyemannya lilye ku musalisi ku linyola litakaswa lilye, a lemannya ku musalisi kandi: 8na musalisi a la henza; na henza, ligamba li medeka mu ligodo, hene yaho musalisi a la vola a veye mudamano: bu veye ubugere.

9Lilwala lyobugere lwa li va ku mundu, a letwe ku musalisi; 10na musalisi a la henza; na henza, ni ha veye nelivimba lilavu mu ligodo, ni li girukanyi amaswa kuva malavu, na inyama imbisi ni i veye mu i livimba, 11bu veye ubugere bwa kale mu ligodo lyombiri gwigwe, na musalisi a la vola a veye mudamano: si a la mu vika ha luvega; kigira a veye mudamano. 12Na ubugere ni bu kira kumeda mu ligodo lilye na ubugere ni bu kunika ligodo lyosi lya uyu u veye nelilwala kutwula ku mutwe kuduka ku virenge vivye, kuli musalisi a lola; 13hene yaho musalisi a la henza; na henza, ni i va ubugere bu kuniki mbiri gwigwe gwosi, a la vola a veye mulahi uyu a veye nelilwala yilyo: bu girunkani kuva ubulavu bwosi: a veye mulahi. 14Navutswa lwenyama imbisi i loleka kuye, a la va mudamano. 15Na musalisi a la henza inyama imbisi, na a vola a veye mudamano: inyama imbisi i veye indamano: bu veye ubugere. 16Kinga inyama imbisi ni i girunkana kandi kuva indavu hene yaho a la tsia ku musalisi; 17na musalisi a la mu henza; na henza, lilwala ni li girunkanywa kugwa lilavu, hene yaho musalisi a la vola a veye mulahi uyu a veye nelilwala: a veye mulahi.

18Na mbiri lwa gu veye nelisunguti mu ligodo lyagwo, na li honi, 19na ha lisunguti lya li, ni ha veye nelivimba lilavu, kinga ubufwiriru bwokung'ereng'ana, bwakanyu hakekeke, hene yaho a la bu mannya ku musalisi; 20na musalisi a la henza; na henza, na liloleka lyaho ni li va nellina lyokutsia liduku mu ligodo lyene, na amaswa gaho ni ga girunkana kuva malavu, hene yaho musalisi a la vola a veye mudamano: bu veye lilwala lyobugere, bwa twulira mu lisunguti. 21Navutswa musalisi na a lola ha zana ni ha veye bugira amaswa malavu kandi si ha veye nellina lyokutsia liduku mu ligodo, navutswa ha tangi kuniala; hene yaho musalisi a la mu vika ha luvega madiku gatano na gaviri: 22na ni ha va ni ha landa mu ligodo, hene yaho musalisi a la vola a veye mudamano: li veye lilwala. 23Navutswa ubufwiriru bwokung'ereng'ana bu singiye ha bwa li, na bu vula kulanda, bu veye imbala yelisunguti; na musalisi a la vola a veye mulahi.

24Kinga mbiri ni gu veye mu ligodo lyagwo na homuliru gwa samba, na inyama imbisi ya hasambwa ni i gwa ubufwiriru bwokung'ereng'ana bwakanyu hakekeke kinga bulavu; 25hene yaho musalisi a la henza ha zana; na henza, amaswa gomu ubufwiriru ga girunkani kuva malavu, na liloleka lyaho li veye nellina lyokutsia liduku mu ligodo; bu veye ubugere, bu twuliye ha sambwa: na musalisi a la vola a veye mudamano: li veye lilwala lyobugere. 26Navutswa musalisi na a henza ha zana, na amaswa malavu si ga li mu ubufwiriru, kandi si ha veye nellina lyokutsia liduku mu ligodo, navutswa ha niaye; hene yaho musalisi a la mu vika ha luvega madiku gatano na gaviri: 27Na musalisi a la mu henza ku lidiku lyagatano na gaviri: ni ha landa mu ligodo, hene yaho musalisi a la vola a veye mudamano: li veye lilwala lyobugere. 28Na ubufwiriru ni bu singira ha bu veye, ni bu vula ku landa mu ligodo, navutswa ha niaye; li veye livimba lya ha sambwa, na musalisi a la vola a veye mulahi: kigira i veye imbala yelisambwa.

29Na mundu musatsa kinga mukali na a va nelilwala ku mutwe kinga ku tsinderu tsitsye, 30hene yaho musalisi a la henza lilwala zana; na henza liloleka lyalyo ni li va liduku mu ligodo, na amaswa ha zana ga veye malaviriru, na mayerere, hene yaho musalisi a la vola a veye mudamano: bu veye ubufuma, bu veye ubugere bwomutwe, kinga bwetsinderu. 31Na musalisi na a va na henza lilwala zana lyobufuma, na henza, liloleka lyalyo ni li vula kuva neliduku mu ligodo, na amaswa ni ga vula kuva mu mamwamu, hene yaho a la mu vika ha luvega madiku gatano na gaviri: 32na ku lidiku lya gatano na gaviri musalisi a la henza lilwala; na henza, na ubufuma ni bu vula kumedeka, na amaswa amalaviriru ni ga ta li mu, na liloleka lyobufuma ni li ta veye neliduku mu ligodo, 33hene yaho a la vegwa, navutswa ubufuma bu la vula kuvegwa; na musalisi a la mu vika ha luvega madiku gatano na gaviri kandi: 34na ku lidiku lya gatano na gaviri a la henza bufuma; na henza, bufuma ni bu vula kulanda mu ligodo, na liloleka lyabwo ni li vula kutsia liduku mu ligodo; hene yaho musalisi a la vola a veye mulahi: naye a logidza tsingubo tsitsye, na a la va mulahi. 35Navutswa bufuma ni bu landa mu ligodo lilye inyima weliva mulahi, 36kunangwa musalisi a la mu henza; na henza, ubufuma ni bu landa mu ligodo,, musalisi si a lenya amaswa malaviriru; a veye mudamano. 37Navutswa na a lola bufuma bu leki kulanda, na amaswa mamwamu ni ga mera mubwo; ubufuma bu honi, a veye mulahi: na musalisi a la vola a veye mulahi.

38Na lwa musatsa kinga mukali a veye nobufwiriru bwokung'ereng'ana, mu ligodo lyombiri, tsimbala tsyo kung'ereng'ana tsindavu; 39hene yaho musalisi a la henza; na henza, ubufwiriru ni bu veye bulavu hakekeke, lu veye lwiyage, lu siruki ku ligodo; a veye mulahi.

40Kandi lisu lyomundu ni li twula ku mutwe gwigwe, a veye wekyavusu; navutswa a veye mulahi. 41Na lisu lilye ni li va ni li twula ku mutwe mbweni, a veye wekyavusu mbweni; navutswa a veye mulahi. 42Navutswa mutwe gwekyavusu, kinga gwekyavusu kyombweni, ni li loleka mu lilwala lilavu na lyakanyu; bu veye ubugere bu twuliye mu mutwe gwigwe gwekyavusu, kinga mu kyavusu kyombweni. 43Hene yaho musalisi a la mu henza; na henza, livimba lyelilwala ni li va lilavu na lyakanyu mu mutwe gwigwe gwekyavusu, kinga mu kyavusu kyombweni, kuli liloleka lyobugere mu ligodo lyombiri; 44uyu a veye wobugere, a veye mudamano: ligali musalisi a la vola a veye mudamano; lilwala lilye li veye ku mutwe gwigwe.

45Na mugere u veye nelilwala yili, tsingubo tsitsye tsi la tandulwa, na lisu lyoku mutwe gwigwe li la yunguvala, na a la boha munwa gwigwe gwegulu, na a la hanzuka, Mbeye mudamano, mbeye mudamano. 46Ku madiku gosi gelilwala yili li veye muye a la va mudamano; a veye mudamano: a la menya yeng'ine; bumenyo bwibwe bu la va kyova wa hokusosa.

47Na ingubo yelilwala lyobugere li veye muyo, ni i va ni veye ingubo yobwoya bwamagondi, kinga ingubo yekatani; 48ni li va ni li veye mu tsimbusi tsyobulungi, kinga tsyobugika; ni i va ni i veye yekatani, kinga lyobwoya bwamagondi; ni li va ni li veye mu lisero, kinga mu tsyosi tsya lombwa nelisero; 49na lilwala zana ni li va ni li veye nelifwana lyobulimu, kinga lyakanyu mu ingubo, kinga mu lisero, kinga mu tsimbusi tsyobulungi, kinga tsyobugika, kinga mu kyosi kyelisero; li veye lilwala lyobugere, na li la mannywa ku musalisi. 50Na musalisi a la henza lilwala zana, na a la vika ha luvega yikyo ki veye nelilwala kuduka madiku gatano na gaviri: 51na ku lidiku lya gatano na gaviri a la henza lilwala zana: na lilwala ni li landa mu ingubo ni bu va mu tsimbusi tsyobulungi kinga tsyobugika, kinga mu lisero, ubutumiki ku bwosi bwelisero li tumikangwa mubwo; lilwala li veye ubugere bululu; i veye indamano. 52Na a la samba ingubo zana ni tsi veye tsimbusi tsyobulungi kinga tsyobugika, mu ingubo yobwoya bwamagondi kinga yekatani, kinga ku kyosi kyelisero, yelilwala li veye mu: kigira bu veye ubugere bululu; ingubo yiyi i la sambwa nomuliru.

53Na musalisi na a va na a lola na henza, lilwala ni li ta landa mu ingubo, kinga mu tsimbusi tsyooulungi, kinga mu tsyobugika, kinga mu kyosi kyelisero; 54hene yaho musalisi a la haana munwa vogidze yikyo kya li nelilwala, na a la ki vika ha luvega madiku gatano na gaviri kandi: 55na musalisi a la henza, inyima welyogidzwa lyelilwala; na henza, ni li vula kugirunkana lifwana lyalyo, na lilwala li vula kulanda, ki veye kidamano; u la ki samba mu muliru: bu veye bwoneku, ni bu va ni bu veye kyahonyo kyomusi naho kyiguhl.

56Na musalisi na a lola, ni i va lifwana lyelilwala li gehi inyima welyogidza lyalyo, hene yaho a la tandula lilwala li twule mu ingubo, kinga ku lisero, kinga mu tsimbusi tsyobulungi, kinga tsyobugika: 57kandi ni li va ni li loleka mu ingubo, mu tsimbusi tsyobulungi, kinga mu tsyobugika, kinga mu kyosi kyelisero, li veye lilwala li lolekanga: yikyo kyelilwala li veye mu u la ki samba nomuliru. 58Na ingubo kinga tsimbusi tsyobulungi kinga tsyobugika, kinga kyosi kyelisero, kyogidzwe, na lilwala li twula kukyo, hene yaho i logidzwa hali kaviri, na ki la va kilahi.

59Yili ni lilaga lyelilwala lyobugere mu ingubo yobwoya bwamagondi, kinga yekatani, kinga mu tsimbusi tsyobulungi, kinga tsyobugika, kinga mu kyosi kyelisero, kuvola vi veye vilahi, kinga kuvola vi veye vidamano.

Currently Selected:

Kyavalevi 13: MBE

Highlight

Copy