Litanga 43

1Na inzala ya li yekihalatu mu kivala. 2Kunangwa lwa va mala kulagira ubuswage bwa va leta kutwula mu kivala kya Egepeti, dada wavo ya va volera, Mu tsie kandi kukugulira vyokulia vikekeke. 3Na Yuda ya mu volera, na a vola, Mundu uyu ya kweganehidza ligali, na a vola, Si mu li lola mumoni mwange bu'gira amwavo wenyu kuva halala na mwinye. 4Nu u va nu u hila amwavo wetu halala na kwinye, ku la sulunguta kukugulira vyokulia: 5navutswa nu u va nu u sula kumuhila, si ku la sulunguta mba; kigira mundu uyu ya ku volera, Si mu li lola mumoni mwange bugira kuva namwavo wenyu halala na mwinye. 6Na Israeli ya vola, Kigira ki mwinye mwa nkolera ubudamano kuli yibu, kuvolera mundu uyu mu veye namwavo wenyu wundi? 7Navo va mu volera, Mundu uyu ya ku teveridza ligali makuva getu, na ga ihiri yetu, na a vola, Dada wenyu a veye mwoyo? Na mu veye namwavo wundi? Na kwinye kwa mu tivulira kuli mateva yaga: kwinye kwa li ku nyale ndi kumanya a la ku volera, Mu sulungutidze amwavo wenyu hano? 8Na Yuda ya volera Israeli dada wewe, U sulungutidze mwana halala na inze, na ku la tsia; ku duke kuva mwoyo, ku vule kukudza, kwinye na ive, na avana vetu kandi. 9Na inze nda va kihambiriru kigira uyu; u la mu vanza ku mukono gwange: ni mba ni mbula kumuleta ku ive, nokumuvika imbiri wowo, hene yaho inze nda ginga likyenwa mihiga nemihiga: 10kigira bugira kulindagira nkano kwirani hali kaviri. 11Na dada wavo Israeli ya va volera, Ni ga va ni ga veye ndiyo, mu kole yaga: mu vugule makuyu malahi gekivala mu viju vyenyu, na mu hilire mundu uyu kihaanwa, hailubani inkekeke, nobwuki bukekeke, nomunyovo, na manemane, na tsinzoli tsyokulia, na tsinzoli tsyomulodzi; 12na mu hile ifetha i duka hali kaviri mu mukono gwenyu; kandi mu hile mu mukono gwenyu ifetha yiranywa mu tsimuya tsyenyu; mbula va vula kugilola: 13mu hile kandi amwavo wenyu, na mu vuke mu tsie kandi ku mundu uyu: 14na Nyasaye Wanyala Vyosi a mu he tsimbabasi imbiri womundu uyu, a duke kumubohololera amwavo wenyu wundi na Benjamini. Ni mbereridzwa ku avana vange, li la va livereridzwa. 15Na avandu yavo va vugula kihaanwa, na ifetha i duka hali kaviri mu mukono gwavo, na Benjamini; ni va vuka, ni va sulunguta Egepeti, ni va singira imbiri wa Yosefa. 16Na Yosefa lwa ya lola Benjamini halala navo, ya volera mulindi wenyumba yeye, Leta avandu yava mu inyumba, mwiite inyama nokulomba vyokulia; kigira avandu yava va la lia vyokulia halala ninze mbasu. 17Na mundu ya kola kuli Yosefa ya mu volera; na mundu uyu ya leta avandu yava nokuvavika mu inyumba ya Yosefa. 18Na avandu yava va tia, kigira va vikwa mu inyumba ya Yosefa; na va vola, Ku leteywi mu kigira if etha yiranywa mu tsimuya tsyetu ku matsyambiri; a nyole ku kwinye kivune, nokukugwira, nokukukola avatugwa veve, na tsisukiri tsyetu. 19Navo visunda himbi ku mulindi wenyumba ya Yosefa, ni va volerana naye ha muliango gwenyumba, 20ni va vola, O mwami wange, kwinye ligali kwa sulunguta matsyambiri kugula vyokulia: 21kunangwa, lwa kwa duka hokugona, kwa kunula tsimuya tsyetu, na henza, sa mulala ya lola ifetha yeye mu imuya yeye, neligerwa lyayo lyosi: na kwinye ku gi leti kandi mu mukono gwetu. 22Kandi ku letani ifetha yindi mu mukono gwetu kugula vyokulia: si ku manya ibwaha wa vika ifetha yetu mu tsimuya tsyetu. 23Naye ya vola, Mu ve nemirembe, mu ta tia mba: Nyasaye wenyu na Nyasaye wa dada wenyu, ya mu ha madanyi mu tsimuya tsyenyu: inze nda li nefetha yenyu. Naye ya va letera Simeoni. 24Na mundu ya leta avandu yava mu inyumba ya Yosefa, na a va ha amadzi na va savidza virenge vyavo; na a ha tsisukiri tsyavo vyokulia. 25Navo va lomba kihaanwa kyetegeke lwa Yosefa a duka mbasu hagati: kigira va hulira va la lia ho vyokulia. 26Na lwa Yosefa ya duka mu inyumba yeye, va mu letera mu inyumba, vihaanwa vya li mu mukono gwavo, nokwinama imbiri wewe kuduka hasi 27naye ya va teva makuva gavo, na a vola, Dada wenyu a veye mulamu, musakulu wa mwa mbolera makuva gege? Kuduka kalunu a veye mwoyo? 28Navo va mu volera, Mutumekiri wowo dada wetu a veye mulamu, a veye mwoyo kuduka lero. Na vinaminya mitwe ni va mu sigamira. 29Naye ya ginga tsimoni tsitsye, na a lola amwavo wewe Benjamini mwana wa mama wewe, na a teva Uyu niye mukogoti, wa mwa mbolera makuva gege? Naye ya vola, Nyasaye a ku vererere, mwana wange. 30Na Yosefa ya genda bwangu; kigira mwoyo gwigwe gwa ng'uswa ku amwavo wewe: naye yenya hokulilira; na yingira ubuliri, na a lilira yo. 31Ma yisava mumoni, na a tsia kyova; na yigalira, na a vola, Mu lete vyokulia. 32Na va mu vikira vivye yeng'ine, na vya yavo veng'ine, na vya Vaegepeti, ava lia halala naye, veng'ine: kigira Avaegepeti si va nyala kulia halala na Vahebraina; kigira nu mugyiru ku Vaegepeti. 33Navo vikala imbiri wewe, munene kuli ubunene bwelivulwa lilye, na mukogoti wavo kuli ubuke bwibwe: na avandu yava va genya avene na avene. 34Naye ya gavulira sa mulala kidieli kyevyokulia vya li imbiri wewe: navutswa kidieli kya Benjamini kya li kinene kuvita vidieli vya avamwavo veve hali katano. Ni va nwa, nokusangala halala naye.

Currently Selected:

Litanga 43: MBE

Highlight

Copy