Litanga 29

1Kunangwa Yakobo ya simuka, na a tsia ku lugendo, na a duka ku kivala kya avana va ivugwe. 2Kandi ya ginga tsimoni, na henza, kidaho mu mulimi, na henza vyayo vivaka vya magondi vya gona himbi ne kidaho zana; kigira va li va nwehidza vyayo ku kidaho zana: na ligina lya kunika kidaho lya li linene 3na ha zana vyayo vyosi vya vungidzwa: na va gomagominya ligina li twule ku kidaho, na va nwehidza magondi, ni viranya ligina kandi ku kidaho mbugono bwalyo. 4Na Yakobo ya va teva, Avamitu, mu twula haliha? Navo va vola, Ku veye va Harani. 5Naye ya va volera, Mu manya Labani mwana wa Nahoro? Navo va vola, Ku mu manyi. 6Naye ya va teva, A veye mulahi? Navo va vola, A veye mulahi: na henza, mwana wewe Raheli yadzanga na magondi gege. 7Na ya vola, Henza, gu kiri mbasu, si i veye inyinga yokuvungidza vyayo: mu nwehidze magondi, ma mu ga hile kandi kwaya. 8Navo va vola, si ku nyala kuduka lwevyayo vyosi vi vungidzwa, na va gomagominya ligina li twule ku kidaho, ma ku nwehidza magondi. 9Lwa ya volerana navo, Raheli yadza na magondi ga dada wewe; kigira yaya magondi. 10Kunangwa, Yakobo lwa ya lola Raheli mwana wa Labani mbotso wa mama wewe, na magondi ga Labani mbotso wa mama wewe, Yakobo yisunda himbi, na a gomagominya ligina li twule ku kidaho, na a nwehidza kyayo kya Labani mbotso wa mama wewe. 11Na Yakobo ya busa Raheli, na a ginga mwoyo gwigwe na a lira. 12Na Yakobo ya volera Raheli a veye amwavo wa dada wewe, na kandi a veye mwana wa Rebeka: naye ya nyagula, na a tsia kuvolera dada wewe.

13Kunangwa, Labani lwa ya hulira makuva ga Yakobo mwana wa mbotso wewe, ya nyagula na a tsia kumwaganira, na a mu kumberera, na a mu busa, na a mu leta mu inyumba yeye. Naye ya volera Labani vindu yivi vyosi. 14Na Labani ya mu volera, Ligali ive u veye kigumba halala na inze, nenyama halala na inze. Na ya menya halala naye mweli mulala. 15Na Labani ya volera Yakobo, Kigira ive u veye amitu wange, u nyala kuntumekira vutswa kigira yiki? U mbolere madanyi gogo ga la va kindu ki? 16Na Labani ya li na vakana vaviri: munene ya langwa Leah, na muke ya langwa Raheli. 17Na tsimoni tsya Leah tsya li tsindedekere; navutswa Raheli ya li mulahi na ligondo lilye lilahi. 18Na Yakobo ya yanza Raheli; na ya volera Labani, Inze nda ku tumekira mihiga gyitano na gyiviri kigira Rahelimwanamuke. 19Na Labani ya vola, Nubulahi kumuha ive, kuvita kumuha wundi mundu: u menye halala na inze. 20Na Yakobo ya tumika mihiga gyitano na gyiviri kigira Raheli; na gya li kuye kuli madiku makekeke, kigira liyanza lya ya li nalyo kuye.

21Na Yakobo ya volera Labani, Mbe mukali wange, kigira madiku gange ga fweye, nduke kuva naye. 22Na Labani ya vungidza avasatsa vosi velidala, na a lomba lilia. 23Kunangwa mgolova ya vugula Leah mukana wewe, na a mu leta kuye, na a va naye. 24Na Labani ya ha Leah mutugwa wewe Zilipa, a ve mutugwa wewe. 25Kunangwa mugamba, nkani a veye Leah: naye ya volera Labani, U nkoleye ki? Si nda tumekira ive kigira Raheli? Kunangwa kigira ki u ngadi? 26Na Labani ya vola, Si gyi li miima gya hano kuserera muke imbiri womunene. 27U malilidze lisidza lilye, na ku la ku ha wundi kandi kigira ubutumiki bwa u li ntumika bwemihiga gyitano na gyiviri kandi. 28Na Yakobo ya kola ndiyo, na a malilidza lisidza lilye: naye ya mu ha Raheli mwana wewe kuva mukali wewe. 29Na Labani ya ha Raheli mwana wewe mukana mutugwa wewe ya langwa Bulha kuva mutugwa wewe. 30Na ya va halala na Raheli, naye ya yanza Raheli kuvita Leah, na a mu tumekira mihiga gyindi gyitano na gyiviri.

31Na Yahova ya lola Leah ya li kudunyirwa, na a mu ha lwivulu: navutswa Raheli ya li mugumba. 32Na Leah ya vereka, na yivula mwana muyai, na a mu gulika Rubeni: kigira ya vola, Yahova u loli ubunyankani bwange; kigira kalunu musatsa wange a la nyanza. 33Naye ya vereka kandi, na yivula mwana muyai, na a vola, Kigira Yahova u huliye ndunyirangwa, kigira yaga u mbeye muana uyu kandi: na a mu gulika Simeoni. 34Na ya vereka kandi, na yivula mwana muyai; na a vola, Kalunu, inyinga yiyi musatsa wange a la hambanywa na inze, kigira mmwivuliye avayai vavaka: kigira yaga lieta lilye lya langwa Levi. 35Na ya vereka kandi, na yivula mwana muyai: nave ya vola, Inyinga yiyi nda kuminya Yahova: kunangwa ya mu gulika Yuda; na ya leka kwivula.

Currently Selected:

Litanga 29: MBE

Highlight

Copy