Litanga 28

1Na Isaka ya langa Yakobo, na a mu gasidza, na a mu laga, na a mu volera, U ta vugula mukali ku vakana va Kanani. 2Vuka, u tsie Padan-aram, ku inyumba ya Bethueli dada wa mama wowo; u vugule muku vakana va Labani mbotso wa mama wowo. 3Kandi Nyasaye Wa Nyala Vyosi a ku gasidze, a ku kole kuva nolwivulu iunyingi, nokukumeda ligali, u duke kuva kiduma kyetsihiri; 4kandi a ku he ubugasu bwa Abrahamu, ku ive noku kisukululwi kikyo halala na ive; ive u duke kunyola mivandu gyekivala kya u menyanga mu, kya Nyasaye ya ha Abrahamu. 5Na Isaka ya siivulana na Yakobo: naye ya tsia Padanaram ku Labani mwana wa Bethueli Musiria, mbotso wa Rebeka, mama wa Yakobo na Esau. 6Kunangwa Esau ya lola Isaka u gasidzi Yakobo nokumuhila Padan-aram, kuvugula yo mukali; kandi lwa ya mu gasidzanga ya mu laga, na a vola, U ta vugula mukali ku avakana va Kanani; 7kandi Yakobo ya hulira dada wewe na mama wewe, naye u mali kutsia Padan-aram: 8na Esau ya lola dada wewe si ya yanzidzwa navakana va Kanani; 9ma Esau ya tsia ku Ishmaeli, na a vugula Mahalathu mwana wa Ishmaeli, mwana wa Abrahamu, mbotso wa Nebaiothu, kuva mukali wewe wundi, ku vakali va ya li navo.

10Kunangwa Yakobo ya twula Beersheba, na a henza ku luvega lwa Harani. 11Ya duka hango halala, na a gona ho ubudiku, kigira liuva lya li kuyera; na a vugula ligina lilala lya ha zana, na a vika kulyo mutwe gwigwe, na a gona tsindolo ha zana. 12Na ya lota maloto, na henza, ingasi i singeridzeywi ku lirova na isonga yayo i duka migulu: na henza, tsingelosi wa Nyasaye va ninanga nokwikira kuyo. 13Na henza, Yahova u singiye igulu kuyo, na a vola, Inze mbeye Yahova, Nyasaye wa dada wowo Abrahamu, na Nyasaye wa Isaka: kivala kya u goni mu, nda ku ha, na kisukululwi kikyo; 14kandi kisukululwi kikyo ki la va kuli lugukyi lwelirova, na ive u la landa ku luvega lwemadioli, noku luvega lwevugwe, noku luvega lwekasikasini, noku luvega lwekusini: kandi avandu vosi velirova va la gasidzirwa mu ive nomu kisukululwi kikyo. 15Kandi henza, mbeye halala na ive, na nda ku linda hosi ha u tsitsanga, kandi nda ku leta kandi ku kivala yiki; kigira si nda ku leka mba, kuduka nduhe nku kolere gosi ga nda ku volera. 16Na Yakobo ya vuka mu tsindolo tsitsye, na a vola, Ligali Yahova a veye hango hano, na inze si nda manya. 17Na ya tia, na a vola, Hano ha tihidzanga ndi si ha la vula kuva inyumba ya Nyasaye, kandi yiki ni kiribwa kyomigulu.

18Na Yakobo ya vuka mabwebwe, na a vugula ligina lya ya vika ku mutwe gwigwe, na a li singeridza li ve munara, na tsuka kulyo maguta. 19Kandi lieta lya ha zana ya gulika Beth-eli; navutswa lieta lya ha zana ku matsyambiri lya li Luz. 20Na Yakobo ya singeridza lilagana, na vola Nyasaye na a va na a veye halaia na inze, nokuninda mu inzira ya ntsitsanga, nokumpa ubukima bwokulagira, ne tsingubo tsyokwivika, 21nduke kwirana nemirembe mu inyumba ya dada wange, hene yaho Nyasaye a la va Nyasaye wange 22na ligina lya nsingeridzi kuva munara, li la va inyumba ya Nyasaye: kandi ku vyosi vya u la mba, inze ligali nda ku ha kidieli kyelikumi.

Currently Selected:

Litanga 28: MBE

Highlight

Copy