Litanga 27

1Na ga duka, Isaka lwa ya li musakulu, na tsimoni tsitsye tsya tsengera, kuduka si ya nyala kulola, ya langa Esau mwana wewe munene, na a mu volera, Mwana wange: naye ya bugira, Mbeye hano. 2Na ya vola, Henza, kalunu mbeye musakulu, si mmanya lidiku lyelikudza lyange. 3Kunangwa, mwadza, nkugoonya u vugule vyuma vivyo, imodia yoyo, na ubuta bubwo, u tsie mu bulimu, u nyolere inyama; 4u nombere vyokulia vilahi, kuli vya nyanza, u ndetere, ndie; mwoyo gwange gu ku gasidze ni nkikiri kukudza.

5Na Rebeka ya hulira lwa Isaka ya volera Esau mwana wewe. Na Esau ya tsia mu bulimu kuhima inyama nokugileta. 6Na Rebeka ya volera Yakobo mwana wewe, na a vola, Henza, nda hulira dada wowo na a volera Esau amwavo wowo, na a vola, 7U ndetere inyama yombulimu, u nombere vyokulia vilahi, ndie, nku gasidze imbiri wa Yahova imbiri welikudza lyange. 8Kalunu, mwana wange, u hulire mwoyo gwange kuli nku laga. 9U tsie mu kyayo, u ndetere vimeme vilahi viviri; na inze nombere dada wowo vyokulia vilahi, kuli vya a yanza: 10na ive u la letera dada wowo yivyo, a lie, a ku gasidze imbiri welikudza lilye. 11Na Yakobo ya volera mama wewe Rebeka, Henza, Esau amitu wange a veye mundu wa amaswa manyingi, na inze mbiri gwange gu veye muterere. 12Mbula dada wange a la mbavatidza, na inze nda manyekana kuye mbeye mugadi; na ndenyolera likyenwa, mbule kunyola ligasidzwa. 13Na mame wewe ya mu volera, Likyenwa lilyo li ve ku inze, mwana wange; u hulire mwoyo gwange, u tsie kundetera vimeme. 14Naye ya tsia, na a vi vugula na a vi leta ku mama wewe: na mama wewe ya lomba vyokulia vilahi, kuli vya dada wewe ya yanza. 15Na Rebeka ya vugula tsingubo tsindahi tsya Esau mwana wewe munene, tsya ya li natsyo mu inyumba, na a vika ku Yakobo mwana wewe muke; 16kandi ya mu vika tsingubo tsyevimeme ku makono gege, noku ligoti lilye: 17na vyokulia vilahi nobukima vya ya li kulomba, ya vi vika mu mukono gwomwana wewe Yakobo.

18Naye ya tsia ku dada wewe, na a vola, Dada wange: naye ya bugira, Mbeye hano; U veye ibwaha, mwana wange? 19Na Yakobo ya volera dada wewe, Inze mbeye Esau, mwana wowo munene; Nkoli kuli wa ndaga: mwadza, u vuke, wikale u lie inyama yange yombulimu, mwoyo gugwo gu ngasidze. 20Na Isaka ya teva mwana wewe, Ga li ndi ive u gi nyoye bwangu ndi, mwana wange? Naye ya vola, Kigira Yahova Nyasaye wowo ya nkonya. 21Na Isaka ya volera Yakobo, Mwadza, wisunde himbi, nku havitidze, mwana wange, nu u va nu u veye mwana wange ligali, Esau, naho mba. 22Na Yakobo yisunda himbi ku dada wewe; naye ya mu havitidza, na a vola, Mwoyo gu veye mwoyo gwa Yakobo, navutswa makono ga veye makono ga Esau. 23Naye si ya mmanya mba, kigira makono gege ga li namaswa, kuli makono ga amwavo wewe Esau: ma ya mu gasidza. 24Na ya vola, Ive u veye mwana wange, Esau, ligali? Naye ya vola, Ni inze. 25Naye ya vola, U ndetere himbi, na nda lia ku inyama yombulimu yo mwana wange, mwoyo gwange gu ku gasidze. Na a gi leta kuye himbi, naye ya lia: kandi ya mu letera iwaini, na a nwa 26Na Isaka dada wewe ya mu volera, Wisunde himbi, u mbuse, mwana wange. 27Naye yisunda himbi m a mbusa: naye ya hulira malusu getsingubo tsitsye, na a mu gasidza, na a vola,

Henza, malusu gomwana wange

Gu veye kuli malusu gomulimi gwa Yahova a gasidzi:

28Kandi Nyasaye a ku he vyelime lyomigulu,

Na vyobunulu bwelirova Nobunyingi

bwobuswage, newaini indoto:

29Avandu va tumekire ive,

Na tsihiri tsi ku sigamire:

Ive u ve mwami ku avamwavo vovo:

Kandi avana va mama wowo va ku sigamire:

Ku vosi a laama ive, a laamwe,

Noku vosi a gasidza ive, a gasidzwe.

30Na ga duka, nonoho, lwa Isaka ya mala kugasidza Yakobo, na Yakobo lwa a veye mitwula imbiri wa Isaka dada wewe, Esau amwavo wewe yingira na a twula mu lihima lilye. 31Naye kandi ya lomba vyokulia vilahi, na a letera dada wewe na ya volera dada wewe, Dada wange a vuke, a lie inyama yomwana wewe, mwoyo gugwo gu ngasidze. 32Na Isaka dada wewe, ya mu volera, U veye ibwaha? Naye ya vola, Mbeye mwana wowo munene, Esau. 33Na Isaka ya degera ligali muno, na a vola, Ni bwaha wa vugula inyama yombulimu, na ya ndetera, na inze mmali kulia ku vyosi nive nu u kikiri kuduka, na mmu gasidzi? Yee, naye a la gasidzwa. 34Na Esau, lwa ya hulira makuva ga dada wewe, ya hanzuka, na a lira lilira linene lyobululu, na a volera dada wewe, U ngasidze, inze kandi, O dada wange. 35Naye ya vola, Amwavo wowo yadza nobugadi nokwigulira ubugasu bubwo. 36Naye ya vola, Si ya gulikwa lieta lilye Yakobo nobulungi? Kigira hali kaviri wingiye mbugono bwange: ya vugula miyandu gyobunene bwelivulwa lyange, na henza, kalunu u vuguye ubugasu bwange. Ya vola, Si u tigaye nobugasu bu ve bwange? 37Na Isaka ya tivula na a volera Esau, Mmu koleye munene ku ive, navamwavo veve mmu heye kuva avatumekiri veve; mmwigutidzi nobuswage newaini: na kalunu nda ku kolera ki, mwana wange? 38Na Esau ya teva dada wewe, U veye neligasidza lilala lyeng'ine, dada wange? U ngasidze, inze kandi dada wange. Na Esau ya ginga mwoyo gwigwe na a lira. 39Na Isaka dada wewe, ya tivula na a mu volera

Henza, limenya lilyo li la va lyobunulu bwelirova,

Na lyelime lyomigulu;

40U la hindira nekivavi kikyo, na u la tumekira amwavo wowo;

Na ga la duka, lwa u li twula kuye,

U la vunanya inira yeye ku ligoti lilyo.

41Na Esau ya dunyira Yakobo kigira ligasidza lya dada wewe ya mu gasidza: na Esau ya vola mu mwoyo gwigwe, Madiku gelisyomera dada wange ga veye himbi; inyinga zana ndiita Yakobo amwavo wange. 42Na Rebeka ya volwa makuva ga Esau mwana wewe munene; naye ya langa Yakobo mwana wewe muke, na a mu volera, Henza, Esau amwavo wowo yeleminya mwoyo gwigwe ku ive, yenya kukwiita. 43Kalunu, kigira yaga, mwana wange, u hulire livola lyange; singira, wiruke kutsia ku Labani mbotso wange, ku Harani; 44u menye yo naye madiku makekeke, ubutima bwamwavo wowo bu luhe bu kalike; 45kuduka livihirirwa lyamwavo wowo li twuli ku ive, na yivirira aga wa mu kolera: inyinga zana nda ku leta u twule yo: kigira ki mu gota ku inze mwombi lidiku lilala?

46Na Rebeka ya volera Isaka, Ubuhindiri bwange bu luhi kigira avakana va Hethu; ni i va Yakobo a vugula mukali ku vakana va Hethu, kuli avakana yava vekivala, ubuhindiri bwange bu la va nobulahi ki?

Currently Selected:

Litanga 27: MBE

Highlight

Copy