Kutwula 40

1Na Yahova ya volera Musa, nokuvola, 2Ku hdiku lyokutanga lyomweli gwokutanga u la singeridza lihema lyokuvuganira mu. 3Na u la vika mu lisanduku lyelilolekidza, na u la kinga lisanduku nengubo yokukinga. 4Na u la leta mu imeza, na u la lohidza ku vindu vyayo; na u la leta mu kinara kye taya, na u la hambidza tsitaya tsyakyo. 5Na u la singeridza ubwali bwethahabu bwokuvuyidza kimuli imbiri welisanduku lyelilolekidza, nokuvika ingubo yokukinga mu kiliango kyelihema. 6Kandi u la vika ubwali bwokusamba kihaanwa imbiri wekiliango kyelihema lyokuvuganira mu. 7Na u la vika lwero hagati helihema na ubwali, na u la vika mu amadzi. 8Na u la singeridza mugidzi kukumbiridza tsimbega tsyosi, nokusunga ingubo yokukinga yekiribwa kyomugidzi. 9Na u la leta maguta gokuvaka, nokuvaka lihema, na vyosi vi veye mu nokulitakasa, na viju vyalyo: na li ia va litakatifu. 10Na u la vaka ubwali bwokusamba kihaanwa, na viju vyabwo vyosi, nokutakasa ubwali: na ubwali bu la va butakatifu ligali. 11Na u la vaka lwero nobwikaliru bwalwo, nokulukola lutakatifu. 12Na u la leta Haruni na avana veve ku kiliango kyelihema lyokuvuganira mu, na u la va singa na amadzi. 13Na u la vika ku Haruni tsingubo tsintakatifu; na u la mu vaka maguta, nokumutakasa, a ntumekire mu miyinzi gyobusalisi. 14Na u la leta avana veve, nokuvavika amakoti; 15na u la va vaka, kuli wa vaka dada wavo, na ntumekire mu miyinzi gyobusalisi: na livakwa lyavo li la va kuvo ubusalisi bemihiga nemihiga mu visukulwi vyavo vyosi. 16Musa ya kola yaga gosi: kuli vyosi vya Yahova ya mu laga, ya kola ndiyo.

17Kunangwa mu mweli gwokutanga muhiga gwa kaviri, ku lidiku lyokutanga mweli, lihema lya singeridzwa. 18Na Musa ya singeridza lihema, na ya vika vyokusingeridza ku vyalyo, na ya singeridza tsimbao tsyalyo, na ya vika tsinzidzi tsyalyo, na ya singeridza tsitiru tsyalyo. 19Na yaala lihema igulu wahatakatifu, na ya vika ku ingubo yalyo yokukunika igulu welihema; kuli Yahova ya laga Musa. 20Na ya vugula lilolekidza, na ya li vika mu lisanduku, na a vika misala gyokuginga, na a vika intebe yetsimbabasi igulu welisanduku: 21na ya vika lisanduku mu lihema, na a sunga ingubo yokukinga, na ya kinga lisanduku lyelilolekidza; kuli Yahova ya laga Musa. 22Na ya vika imeza mu lihema lyokuvuganira mu ku luvega lwa kasikasini, kyova wengubo yokukinga. 23Na ya lohidza ubukima bwokumanyira kuyo imbiri wa Yahova; kuli Yahova ya laga Musa. 24Na ya vika kinara kyetaya mu lihema lyokuvuganira mu kuhenza ku imeza, ku luvega lweiihema lwa kusini. 25Na ya hambidza tsitaya imbiri wa Yahova; kuli Yahova ya laga Musa. 26Na ya vika ubwali bwethahabu mu lihema lyokuvuganira mu imbiri wengubo yokukinga; 27na ya vuyidza kimuli kyevifunyanga mwayu kubwo, kuli Yahova ya laga Musa. 28Na ya sunga ingubo yokukinga ha kiliango kyelihema. 29Na ya vika ubwali bwokusamba vihaanwa ha kiliango kyelihema lyokuvuganira mu, na ya haana kubwo kihaanwa kyokusambwa, na kihaanwa kyobusie; kuli Yahova ya laga Musa. 30Na ya vika lwero hagati helihema lyokuvuganira mu nobwali, na a vika mu amadzi va duke kwisava ho. 31Na Musa na Haruni na avana veve visava makono gavo na virenge vyavo ha zana; 32lwa vingira mu lihema lyokuvuganira mu, na lwa visunda ku bwali, visava; kuli Yahova ya laga Musa. 33Na ya singeridza mugidzi gwokukumbiridza lihema na ubwali tsimbega tsyosi, na ya sunga ingubo yokukinga kiribwa kyomugidzi. Ma Musa ya mala miyinzi.

34Hene yaho lilesi lya kunika lihema lyokuvuganira mu, na ubukumi bwa Yahova bwizula lihema. 35Na Musa si ya nyala kwingira mu lihema lyokuvuganira mu, kigira lilesi lya menya ku, na ubukumi bwa Yahova bwizula lihema. 36Na lwa lilesi lya gingwa kutwula ku lihema, avana va Israeli va tsia imbiri mu tsingendo tsyavo tsyosi: 37Navutswa lilesi li vula kugingwa igulu, si va samula kuduka ku lidiku lyelilesi lya gingwa igulu. 38Kigira lilesi lya Yahova lya li ku lihema inyinga yombasu, na lwa li nomuliru mu inyinga yobudiku, imbiri wetsimoni tsya vosi avenyumba ya Israeli, mu tsingendo tsyavo tsyosi.

Currently Selected:

Kutwula 40: MBE

Highlight

Copy