Kutwula 20

1Na Nyasaye ya vola makuva yaga gosi, na a vola, 2Inze mbeye Yahova Nyasaye wowo, wa ku twulidza mu kivala kya Egepeti, mu inyumba yobutugwa.

3U ta va na vanyasaye avandi imbiri wange mba.

4U telombera kifwananyi kya vadzwa mba, kali kifwananyi kyekindu kyegulu, kinga kyomu lirova hasi, kinga kyomu amadzi isi welirova: 5u ta vi sigamira mba, u ta vi tumekira mba; kigira inze Yahova Nyasaye wowo mbeye Nyasaye wokukendeka, u vikanga ubudamano bwavadada ku avana, kuduka ku likula lyakavaka kinga lya kane ku yavo ava dunyira inze, 6kandi mba vera tsimbabasi ava yanza inze ni va gumira malago gange, kuduka tsielfu.

7U ta tala vutswa lieta lya Yahova Nyasaye wowo; kigira Yahova si a la vula kulola mahyolo ku uyu u talanga vutswa lieta lilye.

8Widzulitse lidiku lyelisabato kulitakasa. 9Madiku gatano na lilala u yinzire, na u kole miyinzi gyigyo gyosi; 10navutswa lidiku lya gatano na gaviri li veye lisabato lya Yahova Nyasaye wowo: kulyo u ta kola miyinzi gyigyo mba, ive, kinga mwana wowo muyai, kinga mwana wowo mukana, kinga mutugwa wowo muyai, kinga mutugwa wowo mukana, kinga mitugu gyigyo, kinga mu geni u veye hango hoho: 11kigira mu madiku gatano na lilala, Yahova ya lomba ligulu na lirova, na inyanza, na vyosi vi veye muvyo, na a sosa ku lidiku lya gatano na gaviri: kigira yaga Yahova ya gasidza lisabato, na a li takasa.

12Widzominye dada wowo na mama wowo, madiku gogo ga ve manyingi mu kivala kya Yahova Nyasaye wowo a ku ha.

13U tiita mba.

14U ta heya mba.

15U tiba mba.

16U ta gina wakyo mba.

17U ta kayirwa inyumba yowakyo mba, u ta kayirwa mukali wowakyo mba, kinga mutugwa muyai wewe, kinga mutugwa mukana wewe, kinga ing'ombe yeye, kinga isukiri yeye, kinga kilala ku vyosi vya a veye navyo.

18Na avandu vosi va hulira tsinkupa, nokulola tsimpeni, nokuhulira mwoyo gwekisiliva, na kigulu kya vuva mwoki: na lwa avandu va lola yivi va degera, ni va singira ihale. 19Na va volera Musn, U volerane na kwinye, na ku la ku hulira; navutswa Nyasaye a ta volerana na kwinye mba, gase ku la kudza. 20Na Musa ya volera avandu, Mu ta tia mba: kigira Nyasaye a duki ku minye kumugeridza, kandi litibwa lilye li ve imbiri wenyu mu vule kukola ubwoni. 21Na avandu va singira ihale, na Musa yesunda ku kisundi kinene ha Nyasaye ya li.

22Kandi Yahova ya volera Musa, U volere avana va Israeli likuva yili, Mwinye avene mu loli kuli inze mbolerani nemwinye kutwula migulu. 23Mu ta lomba avanyasaye avandi halala na inze mba; avanyasaye vefetha, kinga avanyasaye vethahabu, mu telombera mba. 24U la nombera ubwali bwamarova, na u liitira tsisadaka tsyvokusambwa kubwo, na tsisadaka tsyemirembe tsitsyo, magondi, na tsing'ombe tsitsyo: hosi ha mbika lidzulitswa lyelieta lyange, hene yaho nda duka ku ive na nda ku gasidza. 25Nu u va nu u nombera ubwali bwamagina, u ta bwombaka namagina ga vadzwa; kigira nu u va nu u ginga kiju kikyo kugavadza, ula bwononya. 26Kandi u ta nina ku bwali bwange ku vikaa, kyahonyo kikyo ki vule kuloleka kubwo.

Currently Selected:

Kutwula 20: MBE

Highlight

Copy