Vikolwa 7

1Musalisi munene ya teva Stefano, Ni ndiyo amakuva yaga? 2Ya tivula.

Mwinye avamitu navadada, mu hulire: Nyasaye wobukumi ya loleka ku guga wetu Abrahamu, lwa ya li mu Mesopotamia, inyinga ya li na a kikiri kumenya Harani, 3na a mu volera, Twula mu kivala kikyo, u leke avandu vovo, u tsie mu kivala kya ndi ku mannya. 4Ku, ya twula mu kivala kya Vakalidei, na a menya Harani: na kutwula yaho inyima welikudza lya dada wewe, Nyasaye ya mwadikidza na a mu leta mu kivala yiki kya mwinye mu menya mu kalunu: 5kandi si ya mu ha mu miyandu, kali gya a vika ku kirenge: na a lagana naye a la mu ha kivala yiki ki ve kikye kandi kyavana veve venyima, lwa ya li na a ta li nomwana. 6Nyasaye ya vola kuli yaga, avana veve va la menya mu kivala kyobugeni, navo va la va kola avatugwa vavo, na va la va dambidza mihiga tsimia tsine. 7Kandi Nyasaye ya vola, Avandu vehiri yiyo, i la va kola avatugwa vayo, nda va kalagira amakuvagavo: kandi inyima ya yaga va la twula navo va la ntumekira hano. 8Kandi ya va ha lilaga lyokukebwa: ku, Abrahamu yivula Isaka, na a mu keva ku lidiku lya gatanu na gavaka; Isaka yivula Yakobo, na Yakobo yivula avaguga vetu likumi na vaviri. 9Avaguga vetu yavo va li nembodoka ku Yosefa, ni va mu gula a tsie Egepeti: kandi Nyasaye ya li halala naye, 10na a mu twulidza mu busaliri bwibwe bwosi na a mu ha ubulahi nobugeeri imbiri wa Farao, mwami we Egepeti; na Farao ya mu kola munyampara mu Egepeti nomu inyumba yeye yosi. 11Ku, inzala yadza mu kivala kya Egepeti kyosi nomu Kanani, kandi ubusaliri bunene: navaguga vetu si va nyola vyokulia. 12Navutswa Yakobo lwa ya hulira ubuswage bu veye mu Egepeti, ya tuma vaguga vetu inyinga yembiri. 13Mu lugendo lwa kaviri Yosefa yevuula ku vamwavo veve; kandi ihiri ya Yosefa ya vuulika ku Farao. 14Kandi Yosefa ya tuma na a langa dada wewe Yakobo yadze kuye, navandu veve vosi, avandu makumi gatanu na gaviri navandu vatanu. 15Ku, Yakobo ya sulunguta Egepeti. Kandi ya kudza mwene navaguga vetu; 16ni va gingwa ni va hilwa Shekem, ni va vikwa mu kilindwa kya Abrahamu ya gula nobuguli bwefetha ku vana va Emori mu Shekem. 17Navutswa lwa ya li ni yenya kuduka inyinga yelisuuviridza lya Nyasaye ya laga Abrahamu, avandu va landa na va dasika mu Egepeti, 18ya luha na a duka mwami wundi we Egepeti wa vula kumanya Yosefa. 19Uyu ya kola ubugeeri bwobugadi ku ihiri yetu, na a dambidza vaguga vetu va te avana vavo kyova va ta va mwoyo. 20Inyinga zana Musa yivulwa, na a va mulahi munononona a lerwa imyeli gyivaka mu inyumba ya ise: 21kandi lwa ya tebwa kyova, mukana wa Farao ya mu dola na a mu lera na a mu kola mwana wewe. 22Ku, Musa yegidzwa ubugeeri bwosi bwa Vaegepeti; kandi ya li netsingulu ku makuva gege noku miyinzi gyigye. 23Navutswa lwa ya li himbi kuduka mihiga makumi gane, ga duka mu mwoyo gwigwe a tsie kulola avamwavo veve, avana va Israeli. 24Na a lola mulala ya dambidzwa ya mu gayira na a mu kalagira ku ma kuva na a dambidzirwa, na a kuya Muegepeti. 25Kandi ya ganagana avamwavo veve va manya Nyasaye u va he ubuhonnyi nomukono gwigwe: navutswa si va manya. 26Mugamba ya nyola ava kupana ni yenya kuvahambannya, na a vola, Vasatsa mwinye mu veye avamwavo kigira ki mwononnyana? 27Navutswa uyu wononnya mutende wewe ya mu luguta, na a mu teva, Ibwaha ya ku vika u ve munene nomukalagi ku kwinye? 28Wenya kunziita kuli wiiti Muegepeti mgolova? 29Musa yiruka ku livola yilyo, na a gwa mugeni mu kivala kya Midiani, ni yivulira vo avana vaviri vayai. 30Kandi lwa ya mala mihiga makumi gane, ingelosi ya loleka kuye mu kyangalangwi kyekigulu kya Sinai, mu lumemo lwomuliru mu kasala. 31Kandi Musa lwa ya gu lola, ya genya lilola yilyo; ni yenya kwisunda himbi kuhenza, mwoyo gwo Mwami gwadza, 32ni gu vola, Inze mbeye Nyasaye wavaguga vovo, Nyasaye wa Abrahamu, na Isaka, na Yakobo. Musa ya degera, kandi si ya lema mwoyo kuhenza. 33Kandi Mwami ya mu volera, Twulidza vilatu mu virenge vivyo: kigira ha u singiye ni lirova litakatifu. 34Lilola nda lola ubusaliri bwavandu vange ava veye mu Egepeti, kandi mmali kuhulira ubukenyi bwavo, na inze mmali kwika nduke kuvahonnya. Kalunu hamba, nda ku tuma kutsia Egepeti. 35Musa uyu wa va sula, va vola, Ibwaha ya ku vika u ve munene nomukalagi? Niye wa Nyasaye ya tuma a ve munene nomubohololi, nomukono gwengelosi wa loleka kuye mu kasala. 36Mundu uyu ya vimirira kutwula, inyima wa ya kola vyokugenya nevilolekidzu mu Egepeti, nomu Inyanza Inzakanyu, kandi mu kyangalangwi imihiga amakumi gane. 37Uyu ni Musa uyo wa volera avana va Israeli, Nyasaye a la mu singeridzira muprofeti u li twula mu vamwavo venyu, u fwanana na inze. 38Uyu niye wa li mu livugana mu kyangalangwi halala nengelosi wa volerana naye mu kigulu kya Sinai, kandi navaguga vetu: wa vugula livola lyeliva mwoyo kuha kwinye. 39Vaguga vetu si va bugirira kumuhulira uyu navutswa va mu luguta a twule kuvo kandi mu myoyo gyavo virana Egepeti, 40ni va volera Haruni, U ku lombere vanyasaye va kwimirire: kigira Musa uyu wa kwimirira kutwula mu kivala kya Egepeti, si ku manya kya mu gwira. 41Kandi mu madiku yago va lomba kifwananywi kyekimoli, ni va leta isadaka ku musambwa, ni va sangala ku miyinzi gyemikono gyavo. 42Navutswa Nyasaye ya girunkana na a va leka va tumekire lihe lyomigulu; kuli ga ng'odwa mu kitabu kyavaprofeti

Mwa ndetera tsinyama tsinziite netsisadaka

Imihiga makumi gane mu kyangalangwi, mwinye venyumba ya Israeli?

43Kandi mwa vugula lihema lya Moloka,

Kandi ing'ereng'ani yomunyasaye Rafan,

Vifwananywi vya mwa lomba mu duke kuvisigamira:

Na inze nda mwadikidza mu tsie kuvita Babuloni.

44Vaguga vetu va li nelihema lyokulolekidza mu kyangalangwi, kuli wa ya laga, wa volera Musa, a li lombe li fwanane nekya ya lola. 45Lya vaguga vetu mu inyinga yavo, va li leta halala na Joshua lwa va vugula kivala kyetsihiri, tsya Nyasaye ya kunga imbiri wetsimoni tsyavaguga vetu kuduka ku Daudi; 46wa nyola tsimbabasi imbiri wa Nyasaye, kandi yenya kumullyolera Nyasaye wa Yakobo ha a menya. 47Navutswa Solomoni ya mwombakira inyumba. 48Navutswa U Veye Igulu Ligali si a menya mu tsinyumba tsyombakwa na makono; kuli muprofeti a vola,

49Ligulu ni kisako kyange kyobwami,

Nelirova ni kisako kyevirenge vyange:

Mwami a vola, Ni inyumba ki ya mu li nyombakira?

Naho ni ha li ha hobusosi bwange?

50Si gwa li mukono gwange gwa lomba vindu yivi vyosi?

51Mwinye avamagoti madinyu, avemyovo gyenyu namatu genyu vya vula kukebwa, mwinye kazozo mu hingidza Roho Mutakatifu: kuli vaguga venyu va kola, kandi mwinye mu kola.

52U li ha ku vaprofeti, vaguga venyu va vula kudambidza? Kandi va viita yavo ava tanga kumannya lidza lyo Mulungi; wa mwinye kalunu mu mali kugwa avazami naviiti; 53mwinye mwa vugula lilaga kuli gyetsingelosi va laga, kandi si mwa gyi gumira.

54Lwa va hulira vindu yivi, va vihirirwa mu myoyo gyavo, ni va lumannya amino gavo kuye. 55Navutswa naye ya manya ni yizula Roho Mutakatifu, ni yumika na a henza migulu, na a lola ubukumi bwa Nyasaye, na Yesu u singiye ha mukono mulungi gwa Nyasaye, 56na a vola, Henzi, ndola ligulu li kunulwa, no Mwana wa Adamu u singiye ha mukono mulungi gwa Nyasaye. 57Navutswa va hanzuka, ni va kunika amatu gavo, ni va mwitsunira halala. 58Kandi va mu ta kyova welidala, ni va mu lasa magina: navaloli va vika tsingubo tsyavo ha virenge vyomundu musoleli wa langwa Saulo. 59Ni va lasa Stefano magina, naye ya manya ni yanira ku Mwami, na a vola, Mwami Yesu, vugula mwoyo gwange. 60Kandi ya sigama na a hanzuka na a vola, Mwami, u ta vika kuvo ubwoni yibu. Kandi lwa ya mala kuvola yaga, ya gona.

Currently Selected:

Vikolwa 7: MBE

Highlight

Copy