Vikolwa 5

1Kandi mundu mulala wa langwa Anania, halala nomukali wewe Safira, ya gula vivye, 2netsindi ku tsishilling ya tsi vaasa makiriri, mukali wewe ya li na a manyi, na a leta kidieli kilala na a ki vika ha virenge vyavatumwa. 3Navutswa Petro ya vola, Anania, kigira ki Setani a kwizula mwoyo gugwo u volere Roho Mutakatifu ububehi, na u vaase tsindi ku tsishilling tsyo mulimi? 4Inyinga gwa li gugwo si gwa li ubutugi bubwo mwene? Kandi lwa gu mali kugulwa, si gwa li mu tsingulu tsitsyo? Kigira ki u ganagana ndi mu mwoyo gugwo? Si u volera mundu ububehi, navutswa u volera Nyasaye. 5Kandi Anania lwa ya hulira amakuva yago ya gwa hasi na a kudza: ubutii bunene bwa duka kuvo vosi ava ga hulira. 6Kandi avasoleli va singira ni va mu naza, ni va mu hila kyova ni va mu ta. 7Ya duka inyinga yetsisaa tsivaka inyima, mukali wewe yingira, na a ta manyi aga kolwa. 8Petro ya mu volera, Mbolere mwa gula mulimi netsishilling yitsi? Naye ya vola, Yee, kwa gula ndiyo. 9Navutswa Petro ya mu volera, Ga veye ndi, mu lagani kugeridza Roho wo Mwami? Henza, virenge vya yava va teye musatsa wowo vi veye ha kiliango, navo va la ginga ive kandi kukuhila kyova. 10Nonoho ya gwa ha vi renge vivye, na a kudza: navasoleli vingira ni va mu nyola na a kudzi ni va mu ginga ni va mu hila kyovs ni va mu ta himbi nomusatsa wewe 11Ubutii bunene bwa duka ku livugana lyosi, noku vosi ava hulira vindu yivi. 12Vilolekidzu nevyokugenya vinyingi vya kolwa mu vandu nemikono gyavatumwa: navo vosi va li mu lusimbu lwa Solomoni mu mwoyo mulala. 13Navutswa kuvo avandi si ha li nomundu wa lema mwoyo kuhambana navo: navutswa avandu va vidzominya; 14kandi avasuu viri va daswa ligali ku luvega lwo Mwami viduma vyavasatsa nava kali: 15va luha va duka kuhila avalwaye vavo ni va va vika kyova ku tsinzira tsyelidala, kuvalira ku vitali noku visero, Petro na a va na a vita mbula kiriri kikye ki gwire mulala kuvo. 16Kandi kiduma kya vugana kya twula mu madala ga li himbi ne Yerusalemi, va leta avandu avalwaye, kandi navo va gumirwa na roho midamano: kandi va honnywa vosi.

17Navutswa musalisi munene ya singira, navo vosi ava li halala naye (va li ku lyahuka lya langwa Vasadukayo), vosi vizula likendeka, 18ni va gumira vatumwa ni va va boha mu inyumba yavahambe 19navutswa ingelosi wo Mwami yigula kiliango kyenyumba yava hambe ubudiku, na a va twulidza, na a vola, 20Mu tsie, mu singire mu litempeli mu volere avandu amakuva gosi ge Livamwoyo yili. 21Navo lwa va hulira yaga, vingira mu litempeli ni bwenya kukya, ni vegidza. Navutswa musalisi munene yadza, navo ava li naye, ni va vungidza kyina navakulundu vosi va Israeli, kandi va tuma avandu kutsia mu inyumba yavahambe kuvaleta. 22Navutswa avasikari ava tsia va nyola va ta li mu inyumba yava hambe; virana ni va leta amakuva, 23ni va vola, Inyumba yavahambe ku nyoye ni i hani nayo ni indahi, kandi avalindi va singira ha viliango: navutswa lwa kwiguye si ku loli mundu kali mulala. 24Maku munyampara welitempeli nomusalisi munene, lwa va hulira amakuva yaga, va genva munonono ku yaga, ga la nyala kugwa kindu ki. 25Yadza mulala na a va volera, Henza, avandu yavo va mwa li ku vika mu inyumba yavahambe, va veye mu litempeli, va singira vegidzanga avandu. 26Ma munyampara ya tsia halala navasikari na a va leta, navulswa bugira tsi ngulu; kigira va tia avandu, gase va la laswa namagina. 27Kandi lwa va mala kuvaleta, va va singeridza imbiri wekyina. Kandi musalisi munene ya va teva, 28na a vola, Kwa mweganehidza ligali mu tegidza ku lieta yili: navutswa henzi, mwizulitsi amegidzo genyu Yerusalemi, mwenya kuleta amasahi gomundu uyu ku kwinye. 29Navutswa Pe tro navatumwa va tivula ni va vola, Ga kudukira ku hulire Nyasaye kuvita mundu. 30Nyasaye wavaguga vetu ya simugukidza Yesu wa mwiita, ni mu mu sunga ku musala. 31Uyu Nyasaye u mali kumukuminya nomukono gwigwe mulungi a ve Mwami no Muhonnyi, a duke kuha Israeli lyeganira nobusamehi bwo bwoni. 32Kandi kwinye ku veye avaloli vamakuva yaga; kandi ndiyo Roho Mutakatifu, wa Nyasaye a mali kuha ava mu hulira.

33Navutswa yava lwa va hulira yaga va vihirirwa ni venya kuviita. 34Navutswa ya singira mu kyina mulala, Mufarisayo, wa langwa Gamalieli, mwegidzi welilaga kandi wavandu vosi vidzominya uyu ya ha munwa kutwulidza avandu kyova inyinga inkekeke. 35Naye ya va volera, Mwinye avandu va Israeli, mwehenze ku vandu yava ga mwenya'kukola. 36Kigira lwambiri ku madiku yaga Theuda ya singira, na a vola, Mbeye mundu; va tsia ni va suuvira kuye avandu va duka mbula tsimia tsine: yiitwa; navo vosi ava mu hulira va salanywa ni va gota. 37Inyima womundu uyu Yuda we Galilaya ya singira mu madiku geling'oda ameta, na a hila avandu va mu londa: naye kandi ya gota; navo vosi ava mu hulira va salanywa. 38Kandi kalunu mmu volera, Mu leke avandu yava va ve: kigira amakuva yaga nemiyinzi yigyi ni gyi va gyavandu gyi lononywa: 39navutswa ni gyi va gya Nyasaye, mwinye si mu li nyala kuvaguuta; gase mu la nyolwa mu lwana na Nyasaye. 40Kandi va yanza amakuva gege: lwa va mali kulanga avatumwa imbiri wavo, va va kuya ni va veganehidza va ta vola ku lieta lya Yesu, ni va va leka. 41Kunangwa va tsia ni ya twula mu kyina, ni va yanza kigira va validzwa kudukana nokuvikwa mu tsisoni kigira lieta yilye. 42Kandi ma diku gosi mu litempeli nomu inyumba yavo si va leka kwegidza, nokwilwadza amakuva ga Yesu kuli a veye Kristo.

Currently Selected:

Vikolwa 5: MBE

Highlight

Copy