WUWÖT 8
8
1Kïlenchï ECHOTYON Musa, “Wïyö lenchinö Parao kölö ECHOTYON, ‘Nya kïpa piköchan atökïpöghisyeghwanïn. 2Wölo ato itaghenyi kïpa, otorchinan korengu mnyakaway. 3Nyïghiti mnyakaway lalwa Nile ntökwitï kongu nko wölo irïwenyi nko pöröyengu nko kori mötworiku nko cho pö piköku nko nököghengu nko kariku cho ichïlisyeghonyi. 4Komchininyi mnyakaway nko piköku nko mötworiku.’ ”
5Kïlenchï ECHOTYON Musa, “Lenchinö Aron, ghïtenö lïkïngu ompö paraku lalwatïn nko champilwonoy nko takaray, atökïpka mnyakaway koro Misri!” 6Kughïtö Aron lïkïnyi ompö pögho Misri. Kïpka mnyakaway akulum koro Misri. 7Wölo kwigh chesoköytin lenyoni, kwipï mnyakaway koro Misri.
8Kïkur Parao Musa nko Aron akïlenchï, “Asagha ECHOTYON kïchengenanïn nko piköchan mnyakawayichï. Atö opïstan pïchï kïpa kutö ECHOTYON amöros.”
9Kïlenchï Musa Parao, “Ongörökan osowunyi nko mötworiku nko piköku, atökechengeninyi mnyakaway nko kongu kïpoto lalwa Nile onkït.”
10Kuyokyï Parao lö, “Soghwanïn asïyech.”
Kïlö Musa, “Nya kïlenyoni kemwaghanyi, atenkïtunö lö möminye chi nyo karkegh nko ECHOTYON Tororötïncha. 11Kïchengeninyi mnyakaway nko mötworiku nko piköku, kïpoto lalwa Nile onkït.” 12Kïweghö Musa nko Aron wölo mi Parao, atolapay kïsagh Musa ECHOTYON kïcheng mnyakaway, lenyini kakïchomnyechï nko Parao. 13Kwigh ECHOTYON lenyini kitep Musa. Kïmeghö mnyakawayichay kimi korïn nko kiroröy nko wölnö le paren. 14Kusupotö pipö Misri mnyakawayichay akutïkum. Kïngutö kore. 15Wölo otini kisïwa Parao lö kimeghö mnyakaway, kwaghïghit mötïnyi amöterchïnye chane lenyini kimwa ECHOTYON.
Rïmpö
16Kïlenchï ECHOTYON Musa, “Mwochinö Aron kughïtö lïkïnyi akulï terïtyon kïlïkwï rïmpö ompö koro Misri kïmïkul.” 17Kwigh chane lenyoni. Kughïtö Aron lïkïnyi, akulï terïtyon kïlïkwï rïmpö ompö koro Misri kïmïkul. Kulum rïmpö pich nko tyonkïn. 18Kumukyï chepsoköytin kwigh lenyoni akimemïcha. Wölo kilum rïmpö pich nko tyonkïn. 19Kïlenyona kïlenchï chepsoköytinechay Parao, “Pö Tororöt owesyonï.” Kwaghïghit möt pö Parao amöterchïnye chane lenyini kimwa ECHOTYON.
Sosogh
20Kïlenchï ECHOTYON Musa, “Inget asïyech tökwoghö aikany Parao ato wetöy nyinte lalwa aimwochï nyinte lö kölö ECHOTYON, ‘Nya kïpa piköchan, atökïpöghisyeghwanïn. 21Ato mepïstenyinye chane kïpa, oyokunyi sosogh cho chang nko mötworiku nko piköku nko koriku. Nyïghiti sosogh kori pipö Misri nko ompö nyini le kore kïtangogh. 22Wölo opïstenan koro Kosyen asisoni wölo möngöy piköchan, atömetïta sosogh wölini. Atenkïtunö lö ochan ECHOTYON nyo omitan nko pikachu. 23Kïlenyona otönan rotyot kwenu piköchan nko cheku. Igho kiporunötonï asïyech.’ ” 24Kwigh ECHOTYON lenyoni, kïpka sosogh cho chang kö pö Parao nko kori mötworichi nko koro Misri kïmïkul, kunyara kore ompö sosogh.
25Kïkur Parao Musa nko Aron akïlenchï, “Ape otönö Tororöt amöros ompö koronete.”
26Wölo kïlö Musa, “Melö karam keghacha lenyoni, ompöwölo kitönicha ECHOTYON Tororötïncha amöros nyo möchömöcha pipö Misri. Ato kitötecha amöros nyo melö chömöy chane, kïwirenecha koghïn. 27Mïchinecha kepe rutogh nyo pö osis sömök wölnö le surkwen atöketönö ECHOTYON Tororötïncha amöros lenyini kimwoghwecha.”
28Kïlö Parao, “Opïstenokwa ape otönö ECHOTYON Tororötïngwo amöros ompö surkwen. Mopetekwanye wölo low tya, wölo osoghwanïn tïkwïl.”
29Atolapay kïlö Musa, “Kangetan tawungu akï osoghan ECHOTYON atökïngeta sosogh asïyech wölo iminyi nko mötworichi nko pikachi. Wölo memïr put ngat itagh kïpa pich kutö ECHOTYON amöros.”
30Kïweghö Musa tawu Parao akïsagh ECHOTYON. 31Kwigh ECHOTYON lenyini kitep Musa, kïchenga sosogh Parao nko mötworichi nko pikachi. Möminye ompö akong nyo kingötï. 32Wölo kwaghïghit möt pö Parao ngat, amöchömchïnye pïchay kïpa.
Megha kyak
Currently Selected:
WUWÖT 8: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
