WUWÖT 7

1Kïlenchï ECHOTYON, “Oghinyi le Tororöt ompö Parao, lïku werïnkwa Aron werkoyontengu. 2Ingölonenyi lapay cho omwowunyi akï mwochini Aron Parao kïpïstö pipö Israel kïwuwö korenyi. 3#Ist 7:36. Wölo oghan möt pö Parao kwaghïghit, kïrkegh atasan kiporut nko töngönchintin ompö koro Misri, 4möterunyinye nyinte. Onyörilan kong pipö Misri amïtwan piköchan kïwuwunö koro Misri. 5Atökunkïtï nyu pipö Misri lö ochan ECHOTYON, otini kanyarilan kong pipö Misri amïtwan pipö Israel kïwuwunö korengwa.” 6Kwigh Musa nko Aron kïgh nyo kimwochï ECHOTYON. 7Kitïng Musa könyis 80, kïtïng Aron könyis 83 otini kingölonöy nko Parao.

Lïpö Aron

8Kïlenchï ECHOTYON Musa nko Aron, 9“Ato mwowokwa Parao lö, ‘Oporunö töngönchin,’ ilenchï Aron, ‘Chenga lïkïngu aiwirchï ngwïny tawu Parao, atökïlïkwï moroy.’ ” 10Kïwö Musa nko Aron ka Parao akwigh le ato kimwochï ECHOTYON. Kïwirchï Aron lïkïnyi tawu Parao nko mötworichi, kïwaghaka kïlïkwï moroy. 11Kïkur Parao pich cho ngöghomöch nko chesoköytin, kwigh chane tïkwïl lenyoni. 12Kiwirchï chi anka tïkwïl lïkïnyi ngwïny kïlïkwï moroyut. Wölo kïnyïkwïda lïpö Aron lïkipkökwa. 13Wölo kwaghïghit möt pö Parao amöterchïnye chane lenyini kimwa ECHOTYON.

Kam tangany pipö Misri

Kisön

14Kïlenchï ECHOTYON Musa, “Kaghïghit möt pö Parao, katagh kïchömchï pich kïpa. 15Wïyö wölo mi Parao tökwoghö, otini wetöy lalwa Nile aikany nyinte lalwa kamas, ip lïkïngu nyay kikïwaghach kïlïkwï moroy. 16Ailenchï nyinte, ‘Keyokwanïn ECHOTYON Tororöt pö Eprania, wölo imitenyi akïlö, Nya kïpa piköchan, atökïpöghisyeghwanïn ompö surkwen. Wölo tomönye ighanyi lenyoni.’ 17#Ngo 16:4.Kölö ECHOTYON, “Inkïtunenyi lö ochan ECHOTYON. Rosa, olïwan pögh cho mi lalwa Nile ompö lïkïyï mi ewunyan kïwöghökisyö kïlïku kisön. 18Akïmeghyot kaghagh cho mi ori akwararit lalwe, kïtagh pipö Misri kïgha pöghe.”

19Kïlenchï ECHOTYON Musa, “Mwochinö Aron lö, ‘Chenga lïkïngu aighïtö ompö paraku pögho Misri nko paraku lalwatïnekwa nko champilwonoykökwa nko ngörpilkökwa pö pögh. Atökïlïkwï kisön koro Misri kïmïkul, ata ompö pögh cho mi söton nko tören.’ ”

20Kwigh Musa nko Aron le ato kimwochï ECHOTYON, ompö tawu Parao nko mötworichi, kisït lïkïnyi parak akulï pögho Nile. Kïwöghökisyö pögho Nile kïlïkwï kisön. 21Kïmeghö kaghagh cho mi ori akwararit lalwe ntömökumïcha pipö Misri kïgha pögho Nile. Kïlïkwï kisön koro Misri kïmïkul. 22Kwigh chepsoköytino Misri lenyoni tïkwïl, wölo kwaghïghit möt pö Parao amöterchïnye chane kïle ato kimwa ECHOTYON. 23Kïwö Parao konyi amelö kiyang ngalechï. 24Kïpal pipö Misri sörömu Nile tökïnyorï pögh cho gheghöy, ompöwölo kimemuköcha kïgha pögho Nile.

25Kuwer osiswö cho le mut nko odeny kïngata otini kilï ECHOTYON Nile.

Mnyakaway

Currently Selected:

WUWÖT 7: PIPÏLIA

Highlight

Copy