WUWÖT 6

1Atolapay kïlenchï ECHOTYON Musa, “Isïwïyenyi kïgh nyo oghchinan Parao, atökïyon piköchan ompö owesyö kïwuwö korenyi.”

Kökur Tororöt Musa

2 # Tow 17:1; 28:3; 35:11; Wuw 3:13-15. Kïlenchï Tororöt Musa, “Ochan ECHOTYON. 3Kyongwïnchan Apraam nko Isak nko Yakopo le Tororöt Kimuktoghin, wölo moporchanye kegh chane ompö kaynenyan, ECHOTYON. 4Kyaman muma* nko chane lö, otöninan koro Kanan, kor nyo kimöngöy chane le pïnot. 5Kyalïman loko monïngo Israel cho mi koro Misri le sekey, ananan mumenyan. 6Kïlenyona mwochinö pipö Israel lö, ‘Ochan ECHOTYON, akï omïtunenokwa sekeynön nyo omitekwa ompö koro Misri, osörunonekwa mötwornönenkwa. Anyörilan kong chane ompö owesyenyan asörwokwa. 7Oghekwa alïkuna piköchan alïkwan Tororötïnkwa, tonkïtunökwa lö ochan ECHOTYON Tororötïnkwa nyo kyamïtunenekwa sekeynön ompö koro Misri. 8Omïtokwa kor nyo kyawalwalan lö otönan Apraam nko Isak nko Yakopo. Ochan ECHOTYON.’ ” 9Kïngölonchï Musa pipö Israel, wölo kimöterchïcha Musa, ompöwölo kitïng ngwonïn ompö mïkuliskökwa nyo pö sekeynönengwa.

10Kïlenchï ECHOTYON Musa, 11“Wïyö mwochinö Parao pöytoghinto Misri kïpïstö pipö Israel kïwuwö koronï.”

12Wölo kïlenchï Musa ECHOTYON, “Möterwanïcha pipö Israel. Muköy lö ne Parao kïterwanïn? Ochan ngo nyu akwanyï aghïgh kutinyan?”

13Kïlenchï ECHOTYON Musa nko Aron mwochinö pipö Israel nko Parao pöytoghinto Misri lö, “Keyokwecha ECHOTYON kentöghoghchinö pipö Israel kïwuwö koro Misri.”

Kiyitöto ka Musa nko Aron

14Chï kï yetïntino kori papotïnekwa: werpö Rupen, poretya Israel: Anok nko Palu nko Esron nko Karmi choni kï kaporpa Rupen. 15Werpö Simion kï: Yemuel nko Yamin nko Oad nko Yakin nko Soar nko Syaul mompö chepö pipö Kanan. Choni kï kaporpa Simion. 16#Kiy 3:17-20; 26:57-58; 1Ot 6:16-19.Chï kï werpö Lawi kïrïpata kegh nko pïntangwa: Kersyon nko Koat nko Merari. Kimang Lawi könyis 137. 17Werpö Kersyon kï: Lipni nko Syimey, ompö korikwa. 18Werpö Koat kï: Amram nko Isar nko Epron nko Usiel. Kimang Koat könyis 133. 19Werpö Merari kï: Mali nko Musyi. Choni kï kaporpa Lawi nko monekwa.

20Kip Amram Yokeped sankenyi. Akïyichï Aron nko Musa. Kïmang Amram könyis 137. 21Werpö Isar kï: Kora nko Nepek nko Sikri. 22Werpö Usiel kï: Misyael nko Elsapan nko Sitri.

23Kip Aron Elisyepa, chepö Aminadap, chepto ompö Nasyon. Kïyichï Nadap nko Apiu nko Eleasar nko Itamar. 24Werpö Kora kï: Asir nko Elkana nko Apiyasap. Choni kï kaporpa Kora. 25Kip Eleasar wero Aron, akonga ompö tipö Putiyel akï yichï Pineas. Chï kï poyi kori papotïno pipö Lawi nko korikwa.

26Nyï kï Aron nko Musa chay kilenchï ECHOTYON, “Amïtuna pipö Israel löwïr kïwuwö koro Misri.” 27Chane chay kimwochï Parao pöytoghinto Misri paraku kimïtunata pipö Israel kïwuwö koro Misri.

Kömwochï ECHOTYON Musa nko Aron kïpa wölo mi Parao

28Otini kingölonchï ECHOTYON Musa ompö koro Misri, 29kïlenchï, “Ochan ECHOTYON. Mwochinö Parao pöytoghinto Misri ngal lapay cho omwowunyi.”

30Wölo kïlenchï Musa ECHOTYON, “Muköy Parao kïterwanïn lö ne akwanyï aghïgh kutinyan.”

Currently Selected:

WUWÖT 6: PIPÏLIA

Highlight

Copy