MATEUS 27
27
Yesus omin'ndo nokuh Pilatus
(Mrk. 15:1; Luk. 23:1-2; Yoh. 18:28-32)
1Homboh ngohkos samasino, paring imam kopala tutang okon Yahudi duon koputusan ahkan munu Yesus. 2Iro manga Io tutang ngomin Io, turus nyarah-Oh ahkan Pilatus, gubernur pomoretah Ruma.
Popahtoi Yudas
(Kes. Ras. 1:18-19)
3 #
Kes. Ras. 1:18-19
Kotihka Yudas ngorana rih, nohto ijo Yesus buah hukum, io monyasal. Turus Yudas nyarah huli tolun pulu duit perak rih, ahkan imam-imam kopala tutang okon-okon Yahudi. 4Io nuhtui, “Ahku ius bodusa ngorana ulun ijo eam bosala, nyiring Io kona hukum mahtoi!”
Tahpi iro mutah, “Poduli inon ihkai? Orih urusan'mu!”
5Yudas nyakah kambut duit rih nokuh Lohpou Tuhan, turus io tulak tutang ngahtung aropoh.
6Imam-imam kopala nipun duit rih tutang nuhtui, “Duit tuh duit daha. Numbun hukum agama, duit rih eam tou posolongoh unuk pononga ang Lohpou Tuhan.” 7Turus uli iro bohaum, iro ngomin duit rih unuk moli tana ijo konohawot Tana Tuhkang Kobali. Tana rih gunai unuk ngolowong ulun-ulun bohkonuhtus. 8Kotului orih nyiring ondou tuh tana rih konohawot “Tana Daha.”
9 #
Sak. 11:12-13
Honong kodorih, nyolungrih inon ijo tonuhtui bain Nabi Yeremia, iorih, “Iro norima tolun pulu duit perak, jorih regan ijo nyotuju bain ulun Israel kolou bayaran ahkai-Oh. 10Tutang duit orih iro hapai unuk moli Tana Tuhkang Kobali, kolou ijo tomoretah Tuhan ahkak-Ku.”
Pilatus moriksa porokara Yesus
(Mrk. 15:2-5; Luk. 23:3-5; Yoh. 18:33-38)
11Kotihka Yesus noharep Pilatus, gubernur daerah orih, Pilatus ngisok, “Inon Ihko Lahcan Ulun Yahudi?”
“Kolouorih hion'mu,” hion Yesus. 12Tahpi uhun imam-imam kopala tutang okon-okon Yahudi nonga aro dawa toharep Yesus, Io eam mutah samasino.
13Tului orih Pilatus nuhtui umba Yesus, “Kuwoh Ihko eam ngonih paring ijo iro ndawa umba Ihko rih?”
14Tahpi Yesus eam mutah honjiot ka nyiring gubernur rih helan samasino.
Yesus tonuhtus hukum mahtoi
(Mrk. 15:6-15; Luk. 23:13-25; Yoh. 18:39–19:16)
15Ang nyinong pesta Paska gubernur moliwus ihcobehti ulun tonyihpir numbun pitih ulun aro. 16Ang kotihka orih anai ulun konohukum ijo bosewut. Araioh Yesus Barabas. 17Jadi uhun ulun aro hopuhpung, Pilatus ngisok umba iro, “Iai ijo ihkam kani ahku moliwusoh ahkan ihkam? Yesus Barabas ata'ai Yesus ijo konohawot Kristus?” 18Pilatus nuhtui kolou orih tului io kota'an, ijo pongowasa Yahudi monyarah Yesus ahkaioh tului kohiri ahtoi'ndo.
19Ang kotihka Pilatus rahat tuot ang balai bosara, oruhoh ngirim pohtoh tuh ahkaioh, “Ara ihko umba-umba porokara ulun ijo eam bosala rih, bain tului Io, ahku duon nuhpi ijo ja'at tu'u ondou tuh.” 20Tahpi imam-imam kopala tutang okon-okon Yahudi hototurus ngihit ulun aro rih ahkan nyawot umba Pilatus mangat Barabas ijo tonoliwus tutang Yesus Kristus tonohukum mahtoi. 21Turus gubernur rih ngisok umba iro, “Tahkan koduo ulun rih, iai ijo ihkam kani ahku moliwusoh ahkan'kam?”
“Barabas,” hion'ndo.
22“Amat kolouorih, ahku harus nguan inon umba Yesus ijo konohawot Kristus?” Pilatus ngisok umba iro.
“Mahpak Io!” hion iro paringoh.
23“Tahpi inon koja'at-Oh?” Pilatus ngisok.
Turus iro ngoriak muhi-muhing hino, “Mahpak Io!”
24 #
Deut. 21:6-9
Kojoriaioh Pilatus borondong ijo io eam tou nguan ino-inon hino tutang ijo ulun-ulun rih puna tou ahkan borontak. Jadi Pilatus ngomin danum, turus ang toharep ulun aro rih io muhi longoioh hawui nuhtui, “Ahku eam nanggung-jawab ngosan popahtoi ulun tuh! Orih urusan'kam!”
25Paring ulun aro rih mutah, “Yo, nauhoh ihkai tutang anak-anak 'kai nanggung hukuman ngosan popahtoi-Oh!”
26Turus Pilatus molopas Barabas ahkan iro, tutang nyuhu ulun mahcat Yesus; tutang nyarah Yesus ahkan tomahpak.
Sorodadu-sorodadu ngonjea Yesus
(Mrk. 15:16-20; Yoh. 19:2-3)
27Pongohino sorodadu-sorodadu Pilatus ngomin Yesus nyolong nokuh istana gubernur, tutang paring kawansorodadu kupur aang kodiling Yesus. 28Iro nguap hahtin Yesus, tutang makehpan ahkai jubah ungu. 29Iro nguan ahkur ijo tahkan bojahkah boduhi, turus nokehpaioh aang kuhung Yesus. Pongohuli iro ngina ihco doroh kahju ahkan sukahoh ang longoi koto'ui-Oh, turus sutup ang toharep-Oh hawui'ndo ngojea Io. “Daulat Lahcan Ulun Yahudi!” hion'ndo. 30Iro ngoluhca baui-Oh, tutang ngomin sukah rih, turus nahup Io ang kuhung-Oh. 31Uli iro ngonjea Io, iro nguhkoi jubah-Oh ungu rih turus kehpan hahtin Aiu bongoi. Pongohuli Io konomin bolua ahkan tomahpak.
Yesus tomahpak
(Mrk. 15:21-32; Luk. 23:26-43; Yoh. 19:17-27)
32Aang beteng jalan iro hosombang umba ihcobehti tahkan Kirene bogare Simon. Iro nyuhu Simon rih ngohtun sopolahkin Yesus. 33Pongohuli iro johcok ang ihco unuk ijo konohawot Golgota, ijo rimaioh “Unuk Bangon Kuhung.” 34#Msm. 69:22 Ang anan iro nonga ahkan Yesus korih anggur ijo capur poru. Tahpi uli Yesus nyurup anggur rih, Io eam norimaoh.
35 #
Msm. 22:19
Pongohino iro nyopolahki Io, tutang hobagi-bilah hahtiu-Oh hapan tenung. 36Ulimba iro tuot monjaga Io ang anan. 37Ang diang kuhung-Oh iro nokehpan surat tohou dawa toharep Io, yorih: “Jituh Yesus Lahcan Ulun Yahudi.” 38Hombo-homboh umba Io, iro mahpak ka'a duo behti ponyilou; ihcobehti ang sila koto'ui, ihcobehti hino ang sila komuloi-Oh.
39 #
Msm. 22:8, 109:25 Ulun-ulun ijo nyihing ang anai ngiling-ngiling kuhung, tutang ngoluhca nohanya Yesus. 40#Mat. 26:61; Yoh. 2:19 Iro nuhtui, “Ihko ijo kani ngahkas Lohpou Pohotala, tutang mangunoh hino ang tolu ondou! Amat Ihko Anak Pohotala, mosuluh rih tahkan sopolahki rih, tutang nyolamat arop'mu!”
41Kolouorih ka'a imam-imam kopala tutang guru-guru agama tutang okon-okon Yahudi ngonjea Yesus. Iro nuhtui, 42“Io monyolamat ulun bohkon, podahar arop-Oh bongoi Io eam duon nyolamatoh! Amat Io Lahcan Israel, piosrih Io uhuntuh mosuluh tahkan sopolahki orih, punan ihkai porocaya umba-Oh. 43#Msm. 22:9 Io porocaya umba Pohotala tutang nuhtui ijo Io Anak Pohotala. Orih, olai ihto nohto-Oh inon rih Pohotala kani monyolamat Io uhuntuh.”
44Ponyilou-ponyilou ijo tonyalib homboh Io rih ka malah umba ngonjea Io ka'a kolourih.
Yesus palus
(Mrk. 15:33-41; Luk. 23:44-49; Yoh. 19:28-30)
45Ang tohun ondou, kotahin tolu jam sohopus tana rih monjadi pindong. 46#Msm. 22:2 Pukul tolu cohit, Yesus ngombak honong auh muhing, “Eli, Eli, lama sabakhtani?” ijo rimai, “O Pohotala-Ku, Pohotala-Ku, ombai Ihko nohtah Ahku?”
47Pira-pira ulun ang anan ngonih kombak-Oh, tutang nuhtui, “Io na'ah Elia!” 48#Msm. 69:22 Ihcobehti tahkan iro jonyo-jonyo tulak ngomin dolak karang tutang nuhcomoh aang anggur mosom. Pongohuli io nusukoh ang topahkan owuh kahju turus nohtahcukoh nokuh biwih Yesus.
49Tahpi ulun-ulun ijo bohkon nuhtui, “Ngindoi, olai ihto nohto inonrih Elia lombut nyolamat Io!”
50Pongohuli Yesus ngombak hino honong auh muhing, turus mahtot hasong-Oh ijo pongopahoh.
51 #
Ex. 26:31-33
Dindingbenang ijo moholat, ang luwang Lohpou Tuhan borutat sila duo tahkan diang johcok pinda. Tana moruguh tutang puruk-puruk bahtu bosila. 52Luwang kolowong bokuap, tutang aro ukup Pohotala ijo jari mahtoi tongombolum huli. 53Iro soluka tahkan tanom-tanom uli Yesus bolum tahkan louk ulun mahtoi, tutang iro nyolung nokuh Yerusalem bohua. Tutang ang anan aro ulun nohto iro.
54Kopala pasukan hombo-homboh umba karon-sorodadu ijo rahat monjaga Yesus uras mihkoh samasino ohkot nohto tana moruguh tutang paring ang nyolung rih. Iro nuhtui, “Tu'u-tu'u Io tuh Anak Pohotala!”
55 #
Luk. 8:2-3
Ang anan aro ka'a ulunbawi ijo rahat nohto tahkan mahcu. Iro rih ijo jari ngohasu Yesus mangat dohop Io, nopara tahkan Galilea. 56Ang loukoh, iorih Maria Magdalena, Maria inai Yakobus tutang Yusep, tutang inai anak-anak Sebedeus.
Nanom Yesus
(Mrk. 15:42-47; Luk. 23:50-56; Yoh. 19:38-42)
57Ang ngolomi orih lombut rih ihcobehti ulun tahtou tahkan Arimatea, ijo araioh Yusep. Io ka'a murid Yesus. 58Io tulak nokuh Pilatus, tutang nyawot otun Yesus. Turus Pilatus moretahoh mangat otun Yesus tonongaoh ahkaioh. 59Mahka Yusep ngomin otun Yesus rih, tutang muhkusoh umba benang pomukusotu tahkan benang lena ijo bohua. 60Turus io pokaling otun Yesus ang luwang tanom aiuoh bongoi, ijo tonapaoh ang luwang ihco puruk bahtu. Uliorih io molinang ihcokobawak bahtu hajo nuhtup boun luwang tanom rih, turus tulak. 61Maria Magdalena tutang Maria ijo bohkon mohcon tuot ang anan noharep tanom rih.
Sorodadu-sorodadu jaga ang lowong tanom
62Ngokos ondou hounumba ondou Sabat, imam-imam kopala tutang ulun-ulun Parisi tulak hombo-homboh nokuh Pilatus 63#Mat. 16:21, 17:23, 20:19; Mrk. 8:31, 9:31, 10:33-34; Luk. 9:22, 18:31-33 tutang nuhtui, “Tuan, ihkai ingat ohkot pomunga orih magun bolum, Io pu'u nuhtui, ‘Ulimba tolu ondou, Ahku ahkan bolum.’ 64Tului orih, nyuhu ulun monjaga tanom rih pio-pios nyiring ondou ijo kotolu, ahkan murid-murid-Oh eam duon nahkou otui-Oh, turus nuhtui umba ulun-ulun ijo Io jari bolum hoduli tahkan popahtoi. Tutang punga ijo laiu tuh ahkan paling ja'at umba ijo pahtukoh.”
65“Ihkam anai sorodadu pongawal,” hion Pilatus umba iro, “tulak monjaga tanom rih sorapat touduon.”
66Turus iro tulak nokuh tanom, nyegel bahtu ponuhtupoh, tutang ngina ponjaga ang bauioh, mangat eam anai ijo nganggu kolowong rih.
Currently Selected:
MATEUS 27: OTD
Highlight
Share
Copy
Want to have your highlights saved across all your devices? Sign up or sign in
@ LAI 1997 Indonesian Bible Society (Lembaga Alkitab Indonesia)
