MARIKO 16

Okhusimukukha khwa Yesu

(Mat. 28:1-8; Lk. 24:1-12; Yoh. 20:1-10)

1Olwelitukhu lie Sabato liali nilihweye Mariamu Magadalena, Mariamu nyina Yakobo nende Salome bakula amafura akahunyanga esuswa, batsie okhubakha omubili kwa Yesu. 2Eliuba ndirulanga mwitukhu liomwihonga barula nibatsia khusilindwa. 3Nibabool'lana abene khubene, “Niwina owanokhuhinichis'sie lichina khumuliango kwesilindwa?” 4Olwa bachingula tsimoni, balola lichina nilihinibwe (liali likali okhusila). 5Benjila musilindwa ne nibalola omuyaye niyekhaye elubeka womukhono musatsa niyebikhile tsingubo tsindafu ma nibachenya okhusila. 6Nebutswa omuyaye uyo yababool'la, “Murachenye tawe. Murunanga Yesu Omunasareti owabambilwe. Usimukukhile siali hano tawe. Lole, hano niho ahabamureye. 7Tsie mubool'le abechi baabe nende Petero mbu ‘Omwene umwemeleye okhutsia Galilaya. Nam'mulondel'leyo singa yali okhumubool'la.’ ”#Mat. 26:32; Mk. 14:28

8Nibarula musilindwa tsimbilo sichila bali noburi, nende okhuchenya. Sibabool'lakhwo omundu wosi ling'ana liosi tawe khulwoburi.

Yesu yalolekhela Mariamu Magadalena

(Mat. 28:9-10; Yoh. 20:11-18)

[ 9Olwa Yesu yasimukukha mukamba tsuli khwitukhu liomwihonga, yaranga okhulolekha khu Mariamu Magadalena, owayali niyahinia mwo ebisieno bine nabitaru. 10Naye Mariamu Magadalena yatsia nabool'la abalinji na Yesu okhuba bali nibabelelanga ne nibabisia omusika. 11Nebutswa olwa bahul'la mbu Yesu ali mwoyo, ma khandi Mariamu Magadalena umulutsikhwo sibasubila tawe.

Yesu yalolekhela abechi babili

(Lk. 24:13-35)

12Olweinyuma weyako Yesu yalolekha mwikondo lindi khubechi babili. Abechi yabo bali nibatsitsanga ingo okhurula mwitaala. 13Nabo nibatsia nibabool'la abandi, ne sibabasubila tawe.

Yesu yalolekha khubechi likhumi nende mulala

(Mat. 28:16-20; Lk. 24:36-49; Yoh. 20:19-23; Ebikh. 1:6-8)

14Olweinyuma Yesu yalolekha khubechi likhumi nende mulala olwa bali nibalitsanga ebiokhulia. Nabakondekhela okhusila khulwo okhubula okhusubila khwabwe nende obutinyu bwemioyo chiabwe, sichila sibasubila yabo abali nibamulutsi namal'le okhusimukukha tawe. 15Nababool'la, “Mutsie mubibala biosi, mukambe Amang'ana Amalahi khubandu bosi.#Ebikh. 1:8 16Wosi osubila nabaputiswa alahonibwa. Orasubila tawe alakhalachilwa esiina. 17Ne ebilolelo yibi biakhalonde yabo abasubilanga, muliira lianje bakhahinie ebisieno; bakhal'lome netsinimi tsimbia. 18Nibakhatiila tsinzokha nohomba okhunywa esindu siosi esiokhwira, sisiakhabasalisia tawe. Bakhare amakhono kabwe khubalwaye ne nibahona.”

Yesu yapulukha okhutsia mwikulu

(Lk. 24:50-53; Ebikh. 1:9-11)

19Olwa Omwami Yesu yamala okhul'loma n'nabo yabukulwa okhutsia mwikulu, ma niyekhala khumukhono omusaatsa kwa Nyasaye.#Ebikh. 1:9-11 20Abechi nabo nibatsia, nibakamba habundu hosi. Omwami yakhola emilimo halala n'nabo, namanyia mbu oburume yibwo nobwatooto mubilolelo ebiayakhola.]#16:20 Amahandiko kandi amakhulu sikali nebiasia bia 9 nende 20 tawe.

Currently Selected:

MARIKO 16: EBAIBO

Highlight

Copy