MATAYO 10
10
Yesu yela abechi likhumi nababili
(Mk. 3:13-19; Lk. 6:12-16)
1Yesu yalanga abechi baabe likhumi nababili halala, nabahelesia obunyali okhuhinia emioyo chiesifwabwi, nende okhuhonia obutekhele bwetsimbila tsiosi. 2Ne amera kabechi tsana likhumi nababili ngakano: owokhuranga, Simoni (owalangwa Petero), nende omwana wabwe Anderea; Yakobo, nende mwana wabwe Yohana abaana ba Sebedayo; 3Filipu, nende Batsolomayo; Tomasi, nende Matayo omusololi wobusuru; Yakobo wa Alufayo, nende Tadayo; 4Simoni Omukanaani#10:4 Omukanaani Mu Luheburania liboolanga Omundu wayanza esibala sisie, owehinia kata okhusifwila., nende Yudasi Isikariote owamala nasiemana Yesu.
Oburume bwabechi likhumi nababili
(Mk. 6:7-13; Lk. 9:1-6)
5Yaba likhumi nababili nibo aba Yesu yaruma nabalaka, nababool'la, “Muratsiakhwo musibala sia Betsinzibulo nohomba murenjilakhwo mwitaala liosi lia Basamaria tawe. 6Habula mutsie khumakondi akakora, abandu ba Isiraeli. 7Mutsie okhukamba nimuboola mbu ‘Obwami bwomwikulu buli ahembi okhwitsa!’#Lk. 10:4-12 8Muhonie abalwaye, musimukusie abafu, musiiye abachele, nimuhinia ebisieno. Muheywe butswa sila omurungo, nenywe muhane butswa sila omurungo. 9Murabukule etsahabu kata efetsa kata amapesa mumitata chienywe tawe. 10Murachinga omutata okwomusumi khuluchendo, kata tsingubo tsibili, kata ebilaro, kata indabusi tawe. Omukholi wemilimo akwanile ahebwe ebia yenya.#1 Kor. 9:14; 1 Tim. 5:18 11Olwa mwinjila mwitaala likhongo nohomba litututu murune omundu owehan'ne okhumwinjisia, ma mube n'naye okhwola olwa mularulamwo okhutsia. 12Olwa mwinjilanga munyumba, mubarebe omulembe abalimwo. 13Ne nikaba abandu bomunyumba yimwo bamwinjisia, emilembe chienywe chibe khubo. Nebutswa nibaramwinjisia tawe emilembe chienywe chikalukhe khwinywe. 14Ne omundu wosi osula okhumwinjisia, nohomba okhuhulila amang'ana kenywe, kho murule munyumba yimwo nohomba mwitaala yilio ma mubungulule olukuukhi okhurula khubilenje bienywe.#Ebikh. 13:51 15Siahene mubool'langa, Nyasaye yakhabeele tsimbabasi abandu ba Sodoma nende Gomora okhuyomba abandu bomwitaala yilio, Mwitukhu liokhukhalaka Esiina.#Mat. 11:24; Okhuch. 19:24-28
Okhusandibwa okhwitsanga
(Mk. 13:9-13; Lk. 21:12-17)
16“Lole, ise murumanga singa amakondi okhutsia hakari we Ebibwe. Okhwola mube abachesi singa tsinzokha, khandi abahooma singa amakhulwi.#Lk. 10:3 17Muchetsihe, okhuba abandu bakhamuhile musiina nibamutiaba netsikhoba mutsisinakoki tsiabwe.#Mk. 13:9-11; Lk. 12:11-12; 21:12-15 18Balimuhila imbeli wabaruchi nende owabaami khulwanje, bube obukobokheli bwanje khubo nende khubetsimbia tsindi. 19Nyinga balimufumila nibamuyaala, murakhahende emioyo obwa mwakhakalusia nohomba obwa namuboole tawe, sichila Omwoyo wa Nyasaye yakhamuhe akamwakhaboole inyinga niyol'le. 20Sichila simuli ninywe ababoolanga tawe, habula Omwoyo wa Papa wenywe niye oboolanga mwinywe.
21“Abandu balasiemana abamwabo babwe okhwirwa, khandi abasamwana bakhakhole mbwo khubaana babwe; nabaana balenjil'la abebuli babwe nibenya mbu berwe.#Mk. 13:12; Lk. 21:16 22Abandu bosi balamubihil'lwa khulwe ise. Nebutswa uyo olietinyilisia okhwola khusihesi alahonibwa.#Mat. 24:9,13; Mk. 13:13; Lk. 21:17 23Olwa balimukhupia esibi mwitaala elala mwilukhile mulindi. Mubool'langa siahene, mwakhabe nimusili okhumalila emilimo chienywe mumataala ka Isiraeli olwa Omwana wo Mundu alitsa.
24“Omwechi sianyala okhuyomba omwibaali uwe tawe, kata omusumba sianyala okhuyomba omwamiwe tawe.#Lk. 6:40; Yoh. 13:16; 15:20 25Kamuhel'le omwechi okhuba singa omwibaaliwe, ne omusumba abe singa omwamiwe. Nibaba nibalanga omwene nyumba Belisebuli, kho balanga abandu bomunyumba yene yiyi amera amabi okhusila.#Mat. 9:34; 12:24; Mk. 3:22; Lk. 11:15
Owenyekhanga aribwe
(Lk. 12:2-7)
26“Kho muraria abandu tawe. Liosi eliafunikhilwa liakhabisulwe ne eliabiswa liakhabuulwe.#Mk. 4:22; Lk. 8:17 27Akamubool'langa musiilima, mukaribule mubulafu ne eliamuhuliiye mumambiswi mulikambe khubandu bosi. 28Muraria yabo aberanga omubili abaranyala okhwira omwoyo tawe, nebutswa murie Nyasaye onyala okhwira omubili nende omwoyo biombi mu Kehena. 29Okhuba onyala okhukula amarol'lesi kabili khulwe lisenti elala; nebutswa kata elala khuko silinyala okhukwa hasi Papa wenywe naramanyakhwo tawe. 30Kata ngali khwinywe, liiswi lienywe liabalwa. 31Kho muraria; inywe muli nobukhala okhuyomba amarol'lesi amenji!
Okhweyama nende okhweyambakhana Kristo
(Lk. 12:8-9)
32“Kho siomundu olindeyama imbeli wabandu, nase ndimweyama imbeli wa Papa wanje oli mwikulu. 33Ne omundu wosi olindeyambakhana imbeli wabandu, nase ndimweyambakhana imbeli wa Papa oli mwikulu.#2 Tim. 2:12
Sindaleera Omulembe tawe habula obulwani
(Lk. 12:51-53; 14:26-27)
34“Murakaala ndetsa okhuleera omulembe musibala tawe. Aa! Sindaleera omulembe tawe, nebutswa ndaleera obulwani. 35Ndetsa okhuleera oburambani hakari wabaana nende abasamwana, abakhaana nabanyina, khandi hakari wa bakhasi babasiani nabanyakhusaala.#Mika 7:6 36Abasuku bomundu na bomunyumba yiye omwene.
37“Oyanzanga samwana kata nyina okhuyomba obwa yanyanzanga ise sakwanile okhuba omulondi wanje tawe; oyanzanga omwanawe omusiani kata omukhaana okhuyomba ise, siakwanile okhuba omulondi wanje tawe. 38Oranyala okhwetukha omusalapa kukwe yanonde inyuma wanje sianyala okhuba omulondi wanje tawe.#Mat. 16:24; Mk. 8:34; Lk. 9:23 39Okhabanga okhunyoola obulamu bubwe, alabukosia; ne okosinjia obulamu bubwe khulwanje alabunyoola.#Mat. 16:25; Mk. 8:35; Lk. 9:24; 17:33; Yoh. 12:25
Amatani khu yabo abenjisianga abalondi ba Yesu
(Mk. 9:41)
40“Omwinjisianga inywe yanyinjisianga ise, ne ounyinjisianga ise yenjisianga Owaruma ise.#Mk. 9:37; Lk. 9:48; 10:16; Yoh. 13:20 41Owinjisianga Omurumwa wa Nyasaye sichila Nyasaye niye omurumile alasanga khumukabwa kukwe. Naye owinjisinjia omundu omulunji khulwa mbu nomulunji alanyoola amatani komurumwa. 42Omundu wosi owakhabaha khubalondi banje abatututu yaba kata es'sanda siamaatsi amanyifu kokhunywa konyene, sichila nomulondi wanje, siahene alanyoola amatani.”
Currently Selected:
MATAYO 10: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
