LUKA 4

Okhutemwa khwa Yesu

(Mat. 4:1-11; Mk. 1:12-13)

1Yesu yarula mumuchela kwa Yorodani niyetsuye nende Omwoyo Omutsienukhu ma niyemel'lwa no Mwoyo okhutsia musitsiimi, 2omwa yatemelwa nende Setani khulwa amatukhu amakhumi kane. Mumatukhu yako kosi siyaliakhwo esindu siosi tawe, ma naba nende inzala ingali. 3Setani namubool'la, “Noba noli Omwana wa Nyasaye, laka lichina yili likwe obusuma.” 4Nebutswa Yesu namukalusia, “Akahandikwa kaboolanga, ‘Omundu siamenyanga khulwobusuma bwonyene tawe.’ ”#Okhuka. 8:3

5Ma Setani namwanichisia namumanyia obwami bwosi obwomusibala mudakika ndala 6ma Setani namubool'la, “Nyala okhukhuhelesia obunyali yibu bwosi nende obuhinda yibu bwosi, sichila ndahebwa yibi biosi, ninyenya okhuhelesia omundu nemuhelesia. 7Yibi biosi biakhaba ebibio noba niundekayakaya.” 8Yesu namukalusia, “Akahandikwa kaboolanga, ‘Wekayakaye Omwami Nyasayewo ma omurumikhile ye yenyene.’ ”#Okhuka. 6:13

9Setani namuhila Yerusalemu, namusinjisia khus'suli sie Hekalu, namubool'la, “Noba noli Omwana wa Nyasaye, welumbe hasi, 10sichila kahandikwa, ‘Nyasaye yakharume abamalaika baabe bakhulinde.’#Etsisa. 91:11 11Khandi kahandikwa, ‘Balakhuletel'la mumakhono kabwe, khase wakhesikar'ra esilenje sisio khwichina.’ ”#Etsisa. 91:12

12Nebutswa Yesu namukalusia, “Kahandikwa: ‘Oratema Omwami Nyasaye uwo tawe.’ ”#Okhuka. 6:16

13Olwa Setani yali namal'le okhutema Yesu mutsinjila tsiosi, yamulekha khulwe inyinga ehel'le.

Yesu achiachila omulimo kukwe mu Galilaya

(Mat. 4:12-17; Mk. 1:14-15)

14Yesu yakalukha Galilaya, ne tsingufu tsio Mwoyo Omutsienukhu tsiali nitsili khuye. Oluyali lulwe lwalanda mutsimbeka tsiosi etsiesibala yisio. 15Niyebaala mutsisinakoki tsiabwe, ne bosi nibamufumia.

Yesu yasulwa Nasareti

(Mat. 13:53-58; Mk. 6:1-6)

16Kho Yesu yatsia Nasareti, aha yakhul'la; ne khwitukhu lie Sabato yatsia musinakoki singa yali niyanala. Yasinjila okhusoma amahandiko 17ma nahebwa esitapu siomuroobi Isaya, nasibambula ma nanyoola habundu aha kali nikahandikwa mbu,

18“Omwoyo wo Mwami ali khwise,

sichila unzel'le mbu ngambile abatakha amang'ana amalahi.

Yarumile okhukamba obulakhuule khubabohe,

ababofu balole,

okhuboholola abachiaywanga,#Isaya 61:1-2

19Nende okhulandia omuhika kwo Omwami ayanzile khubandu baabe.”

20Namal'le okhusoma, yafumba esitapu ma nakalusisia omurumikhili, ma niyekhala. Abandu bosi abali musinakoki bamureela tsimoni. 21Nachiaka okhubabool'la, “Akahandikwa yaka aka muhuliye nikasomwa, leelo kahesiibwe.” 22Bosi bakobokhela aka yaboola mbu namalahi ma nibachenya khulwo obulwenyukhu bwamang'ana akarula mumunwa kwe, nibaboola, “Uyu siali omwana wa Yosefu?” 23Nababool'la, “Manyile mwakhambool'la olukano yilu: ‘Omulesi wehonie omwene.’ Khandi mwakhaboola, ‘Amang'ana aka khwahul'la wakhola Kaperinaumu, okakholekhwo hano musibala sienywe.’ 24Mubool'langa akatooto, omuroobi siayanzwanga musibala siabwe siene tawe.#Yoh. 4:44

25“Hulile: nitooto mbu baliho abakhutsakhali abenji mu Isiraeli mumatukhu ka Elija, olwe ifula yabula okhukwa khulwemihika chitaru nende emiesi chisasaba, ma inzala ingali neba musibala siosi.#1 Abar. 17:1 26Ne kata mbwo Elija siyarumwakhwo khumukhutsakhali undi wosi narali omukhasi omukhutsakhali wa Sarefatsi, musibala sia Sidoni.#1 Abar. 17:8-16 27Ne baliho abachele abenji musibala sia Isiraeli mumatukhu komuroobi Elisha. Ne kata mbwo abulaho owasiiywa narali Naamani Omusiria yenyene.”#2 Abar. 5:1-14 28Olwabandu abali musinakoki bahul'la akene yaka oburima bwabahamba okhusila. 29Nibasinjila ma nibakhwesa Yesu esioba welitaala nibamuhila khubutenje bwesikulu sielitaala liabwe liombokhwakhwo. Bachoomanga okhumulumba hasi okhurula khusikulu, 30nebutswa Yesu yabir'ra hakari wabwe natsia.

Omundu owomwoyo Kwesifwabwi

(Mk. 1:21-28)

31Yesu yamala natsia Kaperinaumu, litaala elili mu Galilaya, ma naba yebaal'langa abandu litukhu lie Sabato. 32Bosi bahuka singa obwa yebaalanga, sichila yebaalanga nende obunyali.#Mat. 7:28-29 33Musinakoki tsana yalimwo omundu owali nende omwoyo kwesifwabwi, yahanzuukha butinyu naboola, 34“Bayaye. Orunanga sina khwifwe, Yesu wa Nasareti? Witsile okhukhuye nohomba? Manyile ibe oli Omutsienukhu wa Nyasaye.” 35Yesu nakondekhela es'sieno yisio naboola, “Siling'ana ma orule mumundu uyu.” Es'sieno siamala nisimulumba hasi imbeli wabwe ma nisirula muye sila okhumusaalisia. 36Abandu bosi bachenya ma nibabool'lana abene khubene, “Yaka ni mang'ana sina? Omundu uyu alakanga emioyo chiesifwabwi nobunyali ma nende tsingufu ne chirula.” 37Oluyali lwa Yesu lwalanda mumbeka tsiosi.

Yesu yahonia abandu abenji

(Mat. 8:14-17; Mk. 1:29-34)

38Yesu yarula musinakoki ma natsia niyenjila munyumba ya Simoni. Nyakhusala Simoni yali nalwala omurengo omukali, nibamuhomba amuhonie. 39Yatsia nasinjila ahembi n'naye nalaka omurengo okhurula muye. Omurengo kwamala nikurula muye ma nabuukha bwangu nachiaka okhubarumikhila. 40Nyinga eliuba liali niliyeelanga, bosi abali nabalwaye abobulwaye tsimbila lukano bamuler'ra, naye nara amakhonoke khu siamulala khubo, nabahonia bosi. 41Ebisieno biarula mubandu abenji nibihanzukha, “Ibe oli Omwana wa Nyasaye.” Yesu yakondekhela ebisieno, ne siyabihuchil'la okhul'loma tawe, sichila biamanya mbu niye Masihi.

Yesu yakamba mutsisinakoki

(Mk. 1:35-39)

42Omukamba okwalondakhwo mumabwebwe Yesu yarula natsia habundu ahebisu yenyene. Emikanda chiabandu chiachiaka okhumuruna, ne olwa bamunyoola batema okhumwikal'la alekhe okhurula khubo. 43Nebutswa nababool'la, “Okhwola ngambe Amang'ana Amalahi ako Bwami bwa Nyasaye mumataala kandi, sichila yako niko aka Nyasaye yaruma okhukhola.” 44Ma nakamba mutsisinakoki musibala siosi.

Currently Selected:

LUKA 4: EBAIBO

Highlight

Copy