YOHANA 14

Yesu neinjila yokhutsia khu Papa

1Yesu yabool'la abechi baabe, “Murahenda emioyo chienywe tawe, Subile khu Nyasaye subile khwise khandi. 2Munyumba ya Papa wanje, bulimwo obukono obwinji, nase nzitsanga okhumulombela ahenywe. Kalaba nikarali mbwo khane sindakhamubooleye yaka tawe. 3Ne nimba ninzia okhumulombela ahenywe, ndikalukha okhumwenda mbu ahandiba nenywe mulibaho. 4Inywe mwamanya injila etsitsanga owanzitsanga.”

5Tomasi namubool'la, “Omwami, sikhumanyile ahotsitsanga tawe; kho khwakhamanya mbwena injila?”

6Yesu namukalusia naboola, “Ise nise, injila, nise akatooto, khandi nise obulamu. Omundu sianyala okhutsia khu Papa narabiriye khu ise tawe. 7Mulaba nimwamanya siahene, khane mumumanyile Papa wanje khandi. Okhurula olwaleelo inywe mumumanyile khandi mumulutsi.” 8Filipu namubool'la, “Omwami, okhumanyie khwo Papa tsana, ma kakhuhele.” 9Yesu namukalusia naboola; “Ndabeye n'nenywe mwesi oluhono yilu lwosi, ne ibe siumanyile tawe Filipu? Oundutsi ise khe uluutsi Papa. Busina nawe oboolanga, ‘Okhumanyie Papa?’ 10Siosubilanga ise ndi mu Papa, ne naye ali mwise tawe? Amang'ana akamubool'langa, singaboolanga khubwanje tawe. Papa omenyanga mwise niye okholanga emilimo chichie. 11Musubile ise olwamboola mbu ndi mu Papa, naye Papa ali mwise. Ngarali mbwo kho musubile khulwe emilimo chiene echiakholanga. 12Mubool'langa tooto, omundu osubilanga khwise, alikhola emilimo echiakholanga ise, naye alikhola emilimo emikhongo okhuyomba yichi, sichila nzia owa Papa. 13Ne liosi elia mwakhasaba muliira lianje ndilikhola, mbu Papa afumibwe khu Mwana. 14Nimuba nimusaba ling'ana liosi muliira lianje, ndakhalikhola.

Lisubisio lio Mwoyo Omutsienukhu

15“Nimuba nimunyanza, mwakhakhola amalako kanje. 16Nase ndakhasaaya Papa wanje, naye yakhamuhelesia Omuhotselesia undi owakhabetsenje n'nenywe khasotso. 17Naye niye Omwoyo oribulanga akatooto khuka Nyasaye. Esibala sisinyala okhumuhuchil'la tawe sichila sisimulolanga, kata sisimumanyile tawe. Nebutswa inywe mwamumanya sichila amenyanga n'nenywe khandi aliba mwinywe.

18“Sindimulekha inywe mube abatiimi olwa nditsia tawe; ndikalukha khwinywe. 19Hasili hatututu, ne esibala sisilindola tawe; nebutswa inywe mulindola, ne sichila ise ndi nobulamu, inywe nenywe mwakhabe nobulamu. 20Mwitukhu yilio mulimanya singa obwa ndi mu Papa, ne nenywe mwise, singa obwa nase ndi mwinywe.

21“Omundu ouchil'langa amalako kanje, nakakhola, uyo niye owanyanza. Papa wanje alimuyanza omundu ounyanzanga ise nase ndimuyanza ninderibula khuye.” 22Ma Yudasi (orali Yudasi Isikariote tawe) namubool'la, “Omwami, kakhaba mbwena mbu oliebisula khwifwe, ne norebisula khusibala?”

23Yesu nakalusia, “Omundu naba niyanyanza ise, yakhalonda amebaalo kanje. Papa wanje naye yakhamuyanza, ne Ise na Papa wanje khwakhetsa muye ne khwakhamenya n'naye. 24Omundu oranyanzanga tawe, sialiondanga amebaalo kanje tawe. Ne amebaalo kene akamwahuliye yaka sikali akanje tawe, nebutswa karulanga khu Papa owaruma.

25“Amang'ana kano mubooleye olwa simenyele n'nenywe. 26Ne Omuhotselesia niye Omwoyo Omutsienukhu owa Papa aliruma muliira lianje; alimwibaal'la amang'ana kosi, namwitsusia amang'ana kosi akandamubool'la. 27Omulembe nikwo okwamulekhelanga; omulembe kwanje omwene nikwo okwa muhelesia. Sikali ol'la esibala sihananga nambwo mbananga khwinywe tawe. Murahenda emioyo chienywe kata murarie tawe. 28Mwahulila obwa ndali okhumubool'la, ‘Nzitsanga, nebutswa khandi ndikalukha khwinywe.’ Nimuba nimwanyanza mwakhasangala, sichila nzitsanga owa Papa; okhuba Papa nomukhongo okhuyomba ise. 29Nase mubooleye luno nikasili okhwekhola, mbu nyinga kaliekhola, mulasubile. 30Sindi namang'ana kandi amenji akokhumubool'la tawe sichila omukhongo wesibala yisi yetsanga. Siali nobunyali khwise tawe, 31nebutswa abomusibala okhwola bamanye mbu ndayanza Papa, ne singa Papa yali okhundaka, nimbwo kholanga. Hambe, khutsie khurule hano.

Currently Selected:

YOHANA 14: EBAIBO

Highlight

Copy