YOHANA 13

Yesu yasaaba abechi ebilenje

1Lisabo lie Epasaka ndili ahembi okhwola, Yesu yamanya mbu esaa yiye eyokhurula musibala yisi okhutsia owa Papa yol'le. Yali niyayanza abaabe abali musibala, ma nabayanza buyanza okhwola khusihesi.

2Yesu nabechi baabe bali mbali mukhulia ebiokhulia biamukoloba. Setani yali namal'le okhura amakani kokhusiemana Yesu mumwoyo kwa Yudasi Isikariote, omwana wa Simoni. 3Yesu yamanya mbu Papa uwe wamuha obunyali bwosi mumakhono kaake, namanya mbu yarula owa Nyasaye, khandi akalukhanga khu Nyasaye. 4Kho niyenabula tsingubo tsitsie etsie ikulu nabukula esitambaya, niyeboha mus'sienje. 5Ma natsukha amaatsi mulutaabo, nachiaka okhusaaba ebilenje biabechi baabe, nabieya nesitambaya esiayali niyebohele. 6Natsia khu Simoni Petero, ne Petero naye namubool'la, “Omwami, ibe wakhasaaba mbwena ebilenje bianje?”

7Yesu namukalusia namubool'la, “Akakholanga ibe siomanyile luno; ne nomanye esifune siako olweinyumakhwo.”

8Petero namubool'la, “Siusaaba ebilenje bianje kata nahati.” Yesu namukalusia, “Nimba nirakhusaaba, sioli khandi omwechi wanje tawe.”

9Simoni Petero namubool'la, “Omwami, orasaaba butswa ebilenje bianje bionyene tawe, nebutswa khandi nende amakhono kanje nende omurwe kwanje.” 10Yesu namubool'la, “Omundu owesingile omubili kwosi nomusiiyikhu wosi, yenya butswa okhusaaba ebilenje bibie bionyene. Inywe mwesi muli abasiiyikhu narali mulala yenyene.” ( 11Yesu yali namanyile owanomusiemane; niko akachila naboola, bosi nabasiyikhu narali mulala yenyene.)

12Kho olwa Yesu yali niyakhabasaaba ebilenje, yebiikha tsingubo tsitsie etsieikulu ma nakalukha khumesa. Ma nabareeba, “Mumanyilisisie akamukholeye yaka?#Lk. 22:27 13Inywe munanganga Omwibaali khandi Omwami, ne muboolanga habwene okhuba nimbwo Ise ndi. 14Ma ise nimba nimusaabile ebilenje bienywe, nase nindi Omwami khandi Omwibaali, khe kamuhel'le inywe okhusaabananga ebilenje bienywe. 15Muheye esimanyilo, singa obwa mukholeye, nenywe mukholenge mbwo. 16Mubool'langa tooto, abulaho omusumba oyombele omwami we; nohomba omurumwa oyombele owamuruma.#Mat. 10:24; Lk. 6:40; Yoh. 15:20 17Nimuba nimumanya amang'ana yaka, muli abeikhabi nimuba nimukakhola.

18“Simboolanga inywe mwesi tawe; manyile yabo abandeela. Nebutswa okhwola Akahandikwa kahesibwe mbu, ‘Olitsanga ebiokhulia bianje, yangalukhan'ne.’#Etsisa. 41:9 19Mubooleye kano luno nikasili okhwekhola kho olwa kaliba ngekhol'le mulasubile mbu ‘Ise Nise Ye’ 20Mubool'langa tooto, Ouchil'langa omurumwa wanje, ahuchilanga ise; ne naye oumbuchil'langa, ahuchilanga uyo owali okhuruma.”#Mat. 10:40; Mk. 9:37; Lk. 9:48; 10:16

Yesu yarooba akokhusiemanwa khwe

(Mat. 26:20-25; Mk. 14:17-21; Lk. 22:21-23)

21Nyinga Yesu yali namal'le okhuboola yaka, yanyakhana muno mumwoyo, naribula kol'lani naboola mbu, “Mubool'langa tooto, mulala khwinywe nayasiemane!” 22Abechi baabe nibahengana, nibaramanya owaral'le. 23Naye mulala khubechi baabe owa Yesu yali niyayanza yali niyesetamisie khusilifu sia Yesu. 24Kho Simoni Petero namusima, namubool'la, “Murebe aralanga yako khuwina.” 25Omwechi uyo niyesetamia khu Yesu ma namureeba, “Omwami niwina?” 26Yesu namukalusia, “Ni uyo owanzia okhuha esironje sino nimal'le okhutonjesia mulutaabo.” Ma natonjesia esironje mulutaabo ma naha Yudasi, Omwana wa Simoni Isikariote. 27Olwa Yudasi yali namal'le okhubukula esironje yisio nilwo olwa Setani yamwinjilamwo. Yesu namubool'la, “Khola bwangu aka wenyanga okhukhola!” 28Nebutswa siyaliho kata mulala khubali nibekhaye owamanya esiachila namubool'la mbwo tawe. 29Okhuba abalala bakaala mbu olwa Yudasi yali omubiikhi womutata, khe Yesu amubooleye, akule ebindu ebienyekhanga khulwe Lisabo; nohomba ahanekhwo esindu khubabisandu. 30Kho nyinga yali namal'le okhubukula esironje yisio yarula esioba bwangu. Olwene yilwo bwali nibuli butukhu.

Lilako Liyia

31Nyinga Yudasi yali narul'le esioba, Yesu naboola, “Luno Omwana wo Mundu ufumiibwe, ne muye khandi Nyasaye ufumiibwe. 32Nyasaye naba nafumibwa muye, kho Nyasaye alafumia Omwana wo Mundu muye omwene, ne alamufumia bwangu. 33Abaana banje inywe, sili n'nenywe oluhono lutititi butswa. Muliiruna; nebutswa luno mubool'langa singa ndabool'la abakhongo ba Bayahudi, ‘Ahanzia ise, inywe simunyala okhwitsa yo tawe.’#Yoh. 7:34 34Muhelesianga Lilako liyia, mbu Muyanzane. Singa obwa nase ndamuyanza nenywe khandi muyanzanenge mbwo.#Yoh. 15:12,17; 1 Yoh. 3:23; 2 Yoh. 5 35Nimuba nimuli nobuyanzi abene khubene, kho abandu bosi bakhamanya mbu muli abechi banje.”

Yesu yarooba mbu Petero namwambakhane

(Mat. 26:31-35; Mk. 14:27-31; Lk. 22:31-34)

36Simoni Petero namureeba, “Omwami, notsie hena?” Yesu namukalusia, “Owanzitsanga ise, ibe sionyala okhunondayo luno tawe; nebutswa olinondayo olweinyumakhwo.” 37Petero namubool'la, “Omwami, busina sinyala okhukhulonda kata luno? Nderechekhele okhukhufwila.” 38Yesu namukalusia naboola, “Siahene werechekhele okhuufwila ise? Khubool'langa tooto mbu, etaywa nesili okhulakula, nobe niundeyambakhan'ne esiakhataru mbu siumanyile tawe.”

Currently Selected:

YOHANA 13: EBAIBO

Highlight

Copy