OKHUCHIAKA 9

Indakano ya Nyasaye nende Noa

1Nyasaye yalaamila Noa nende abaanabe ikhabi ma nababool'la mbu, “Mwibulane mwinjihe ma mwitsusie esibala.#Okhuch. 1:28 2Etsisolo tsiosi, amanyonyi, ebikooko nende tsisutse nabimuriitsenje. Biosi bireywe hasi wobunyali bwenywe. 3Luno binyala okhuba ebiakhulia bienywe, kata khandi munyala okhulia emimela. Mbihaan'ne biosi khu inywe khulwa ebiakhulia. 4Esindu sil'la esiamurakhaliakhwo tawe neinyama esilimwo amatsahi.#Abal. 7:26-27; 17:10-14; Abal. 19:26; Okhuka. 12:16,23; 15:23 5Omundu wosi niyakheera owasie yakhanyoola esinyasio. Ndakhahaane esinyasio siokhufwa khusolo yosi eyakheere omundu. 6Omundu yalombwa mukhufwana khwa Nyasaye, khe wosi owakheera omundu wasie naye yakheerwe nende omundu wasie.#Okhuch. 1:26; Okhur. 20:13 7Nenywe mwibulane, mwinjihe mwitsusie esibala.”#Okhuch. 1:28

8Nyasaye yabool'la Noa nende abaanabe mbu, 9“Luno ise nombanga indakano n'nenywe nende tsinzibulo tsiosi inyuma wenywe, 10nende ebindu bienywe biosi ebili mwoyo singa amanyonyi kosi nende etsisolo tsiosi, biosi ebiamwarula n'nabio musafina. 11Nombanga indakano n'nenywe mbu ebindu biosi ebili mwoyo sibiakhamululwe nende emikhula khandi tawe, emikhula sichiakhononiekhwo esibala khandi tawe. 12Singa esimanyilo hakari weindakano yanje n'nenywe, ma nende ebindu biosi ebili mwoyo, 13retsanga esitsahi mumalumbesi. Nisio esianasibe esimanyilo esieindakano hakari wanje nende esibala. 14Lwosi olwa naretsenje amalumbesi khwikulu ma esitsahi silolekhe, 15nanzitsul'lenje indakano yanje n'nenywe nende etsisolo tsiosi mbu emikhula sitsiakhamululekhwo ebindu biosi ebili mwoyo khandi tawe. 16Olwesitsahi nasilolekhenje mumalumbesi, nasilolenje ma nzitsusia indakano yeinziayo hakari wanje nende ebindu biosi ebili mwoyo khusibala. 17Yisio nisio esimanyilo sieindakano eyanombanga nende ebindu bili mwoyo biosi.”

Noa nende abaana baabe

18Abaana ba Noa barula musafina bali Shemu, Hamu, nende Yafetsi. (Hamu niye owali samwana Kanaani). 19Abaana ba Noa bataru bano nibo abakukanyene abandu bosi abali musibala.

20Noa naye naba omulimi wokhuranga ma naraaka emisabibu m'mukunda kukwe. 21Olwa yanywakhwo ewaini, yamala nakholwa, ma nahiinia tsingubo, nakona mwiheemalie nali esihechenye. 22Olwa Hamu, samwana Kanaani, yalola esihechenye sia samwana yarula esioba nabool'la abasiani babwe babili. 23Shemu nende Yafetsi babukula ingubo nibara khumabeka kabwe emukongo, nibatsiila omukongo okhwola mwiheema, ma nibafuunikha esihechenye sia samwana, nibaramulolakhwo esichenye tawe. 24Olwewaini yahwa m'moni mwa Noa ma namanya akomwana omutu yali namukholeye, 25yaboola mbu,

“Esilaamo sibe khu Kanaani!

Yakhabe omusumba wabaana babwe.

26OMWAMI yetsoomibwe, Nyasaye wa Shemu!

Kanaani yakhabe omusumba wa Shemu.

27Nyasaye abambuusie Yafetsi,

amenye mumaheema ka Shemu,

Kanaani yakhabe omusumba wa Yafetsi.”

28Inyuma wemikhula chiamaatsi Noa yamala emihika etsimia tsitaru namakhumi karano. 29Yafwa nali nende emihika etsimia tsirano natsine nende amakhumi karano.

Currently Selected:

OKHUCHIAKA 9: EBAIBO

Highlight

Copy