MARKUS 8
8
Nimi Denga YubaĘľ Dombadya DenaĘľ Elegosuk Yuba
(Mat. 15:32-39)
1Dara ban salek danyek, nimi nauba onsok longol yeilimek. Wera sikda denaʾ hnon bobnenggumekaʾ anasa, Yesus ara alja yuba doro diriga ban nang ek wenhyok. 2”Ban nimi mandebnaʾ danara, nak li winilya doblenyaakanya, sikda gwaneng hnon boldonaʾ orok anasa, nara sikenek angoo yadyeka dabnel. 3Wera sikda hnon nang era, mok ab yek bok anasa, gwanenga denaʾ orok bok, or balalulum henya dara, pikek anyeb somok lobijek,” hyok. 4Dara alja yuba doro diriga ban nang era Yesus ak, ”Ban unu gakdenaʾ mok enera, nimi mandebnaʾ danasa dara, gwanenga pe denokaʾ aboka, siksamba har sam ab doboka deneseng do?” hyek. 5Dara Yesus adya sikenek, ”Ugunuk ara roti gwaneng ara hekbadya bolum do?” aboka heibsuk. Dara sikja, ”Sekbadya ulumla,” hyek.
6Dara Yesus ara nimi nidyaĘľ ak, sokok buklulum aboka, alda sekbadya gwaneng dara doboka, Imik Neyung ak perob aboka gibuk. Seleb dara, gwaneng ara soboka, alja yuba doro diriga ban nang ek boknokaĘľ aboka elegosuk dara, wera sikja doboka bokdo yibik. 7Dara sikda hadyaĘľ anaba wenebadya bomekaĘľ ara, Yesus adya Imik Neyung ak perobaĘľ dolul aboka molowok dara, boklulum aboka orugosuk. 8Wera sikda mona bukuka jek. Anya, deregoka bok lobeknya nera, alja diriga ban nang edya serrema sekbadya mamagek. 9Sikda anyegan jek nang era, nengmab ok anyek, denga yubaĘľ dombadya nanga jek. Debgogowek dara, Yesus ara nimi danyek, ugunja ek balalulum, hyok. 10Bok alab, alja yuba doro diriga ban nang eb dara, men mek ekla bunaĘľ pik uboka Dalmanuta sokok sam buku byik.
Parisi Nang Edya Sene Lebek Yuba
(Mat. 16:1-4)
11Wera Parisi nang hnon Yesus ak yeiniboka, alab yuba sal yabeekanya, sene bobnenewoka gogobaʾ dibnobaʾ aboka, yok lok so beknaʾ hnon, imik heikek abnya nenyek, unuwalom aboka, sikda alak molowek. 12Anasa Yesus ara ganya hina doboka, sikenek lebsukaʾ ara, ”Nimi wenyek nang enera, hekasa yok damoka hnon meewalom alamak do? Anasa, nara ugunuk hyak dib lebsin, Wenyek nang ek ara, damoka mekaʾ hnon meeb eleganggunusak!” hyok. 13Dara alda sikda anyagan loboka, mek ekla bunaʾ bukoka, yok gek sam byuk.
Pe Keeboka Ulululum Hyok Yuba
(Mat. 16:5-12)
14Yesus adya alja yuba doro diriga ban nang era, gwanenga bonaʾ hibigoka, mek ekla bunaʾ ak ara, roti gwanenga sirik hnonok bomek. 15Dara Yesus adya sikenek, ”Ugunda Parisi nang eb, Herodes beb, sikja roti gwaneng welenaʾ enyek ab, hyak pe keeboka ulululum,” hyok. 16Dara Yesus adya alja yuba doro diriga ban nang era sik moumen, alja ban wenyhesilaʾ ara, ”Nuk roti gwanenga hnon bobnenggumabnya nenesa lebsil aboka,” leldalamek. 17Yesus ara sikja an wenyaldalamekaʾ anyek ella ubsukaʾ anasa, alja sikenek lebsukaʾ ara, ”Ugunda hekasa roti gwaneng bobnenggumab an yub enyek saldalalum do? Ugunda anam eilinggululumukanya, onoʾ damok ara anam ella unggululum de? Ugunda ganya suʾ kebsuk de? 18Ugunda henga yak bok, eilinggululum de? Onoʾ o yak bok, kenggululum de? Ugunda beknenggululum de? 19Nadya nimi denga salyaʾ lambadya nang emba, roti gwaneng lambadya soboka elegeisisaʾ dara, deregoka bok lobeknya nera, serrema hekbadya ugunja liboka bobmamagolum do?” Wenhyok dara, alja yuba doro diriga ban nang edya Yesus ak, ”Serrema o badya liboka bobmamagamouba,” hyek. 20”Dara onoʾ nimi denga salyaʾ hiboka dombadya nang emba, gwanenga sekbadya soboka elegeisisa dara, seleb deregoka bok lobeknya nera, serrema hekbadya liboka mamagolum do?” Wenyaboka heibsuk dara, sikda Yesus ak, ”Serrema sekbadya liboka mamagamouba,” hyek. 21Dara Yesus adya onoʾ hnon, ”Anasa wenebabya damok ara, ugunda anam ella unggululum de?” aboka heibsuk.
Betsaida Sam Heng Lumnya Hwebok Yuba
22Wera Yesus ab, alja yuba doro diriga ban nang eb dara, Betsaida moka byik. Dara anyeganara, nimi heng umoknya ben hnon bo yeindeboka, sikda Yesus ak alja soruka diyiboka hweblulaʾ aboka, molowek. 23Dara, Yesus ara heng lumnya bedya soruka gliboka, heik gokgobok bo biniboka, lum umok heng ek sam gamalaʾ adya ngikookanya, alak soruk diyiboka, ”Wera yokaʾ-yokaʾ hnon eiblam gom?” aboka heibuk. 24Dara heng lumnya bedya, ”Yo, nimi yabalamakaʾ eibnaʾ ara, gal anasoʾ ak eibna,” hyok. 25Anasa onoʾ Yesus adya soruka lum heng ak an dibuk dara, wera sum era lum henga dengaboka gobdo merewookanya, okoka hyak nidyaʾ laga eibuk. 26Dara onoʾ Yesus adya benyek an, ”Anja ek or binilam, bok heik enyek an yangganaʾ ara mem,” hyok.
Petrus Bedya Laga Lebok Yuba
(Mat. 16:13-20; Luk. 9:18-21)
27Wera Yesus ab, alja yuba doro diriga ban nang eb dara, Kaisarea Pilipi sokok sam, yok-yok mek heikek sam byik. Dara pik hnoumung anam balameekanya, Yesus ara alja yuba donaʾ nang ek, ”Nimi yok nang edya dara, nak dara, heknya alanyak do?” aboka heibsuk. 28Dara sikda Yesus ak, ”Anda hnonda Yohanes Pembaptis alanjak, hnonda Elia benyaʾ alanjak, onoʾ hnonda ununumnaʾ lelemek nang, be hnonnya benyaʾ alanjak,” hyek. 29Dara Yesus adya, ”Ugunja dara, nara heknya senelenulum do?” aboka heibsuk. Wenyek Petrus bedya, ”Neyung, anda bokal yajoknya Kristus bek ululam!” hyok. 30Dara Yesus adya sikenek, ”Alda benyaʾ aboka, yok nang ek neknaʾ ara mem,” aboka yuba sekok.
SomoganamokaĘľ Amba Lebok Yuba
(Mat. 16:21-28; Luk. 9:22-27)
31Nen seleb dara, Yesus ara alja yuba doro diriga ban nang ek, ”Nimi dibaʾ me nera hyak nauba oka deregoka gweknamla. Anya Yahudi dub nang eb, yuba wa gakaʾ dub nang eb, yuba neksin nang eb dadya, alak malya gebija dara, dibaʾ obnemak, bok winilinya sum era embengaʾ suboka buknamla,” aboka neksuk. 32Yesus ara hyak laga poboka alja yuba doro diriga ban nang ek, anaso unuwanamla aboka neksuk. Wenyek Petrus bedya, Yesus nonga glib salawoka, ”Neyung, nera wenyanaʾ ara loblom,” hyok. 33Bok Yesus ara sam-samawoka, alja yuba doro diriga ban nanga nidyaʾ kemero yibisuukanya, Petrus bek, ”Satan o, men weilik sam yibilom! Anja seiniwalam ganya era, Imik Neyung adyinya nek seiniwanggublam, alda nim adya ganya ek seiniwalam!” wenyaboka wabok.
34Dara Yesus ara anyagan nauba longomek nim eb, alja yuba doro diriga ban nang eb, ”Wei, keblulum!” hyookanya sikenek, ”Nimi be hnon nak diriga yananel aboka dara, alak perob danamlyaʾ digumaʾ ara, hyak gobdo loboka, aljaʾ igin yakaʾ doboka, nak diriga yalalul. 35Anasa nadya nong anyek weiningdanyek senen ganya bololanya bera, alda denghenelabok, Imik Neyung adyaʾ perob lero yanggan yub eb, nasamba hnon leboka, al weininggeldalamla dara, were alja nong era, eimik blebnamla. 36Nimi be hnonda sokok ulumlaʾ nidyaʾ ara, aljaʾ ok dangamso bok, benyek alja nong unaʾ ara denghenemso dara, nera perob de? 37Anasa, alja nong unaʾ amba dara, hekaʾ ak lunuwanamso do? 38Yu hwam uboka malya unaʾ lomok an unulumak salek wen, na nong ab, nadya neklesin yub eb danyek, ugunda alya amba nim ak laga lel eleknenggulumun dara, alda alja neyung bedya nong unaʾ lomok senenggomaʾ ab, geisa ulumak lero nang eblaboka yanamla sum era, sik hogung ak nimi dibaʾ me ara naba alya anasa, albabya lobnamla,” hyok.
Currently Selected:
MARKUS 8: LAINLC
Highlight
Share
Copy
Want to have your highlights saved across all your devices? Sign up or sign in
