MARKUS 7
7
Yahudi Nang Nim UgumaĘľ Yuba
(Mat. 15:1-9)
1Parisi nim eb, Yahudi yuba neksin nang eb, Yerusalem heikek abaĘľ ara, Yesus ak longol yeilimek. 2Sikda Yesus adya yuba doro diriga ban nang, hnon nang era soruka mek eleknaĘľ loboka, sembejaĘľ gebman delemekaĘľ ak eiyisik.
3Parisi nim eb, Yahudi nanga nidyaĘľ ara, sikja nim ugumaĘľ lelemlaĘľ ak an sunuwoka yokaĘľ unuwoka soruka mek eleknaĘľ orok bok dara, denaĘľ denggulumek. 4Sikja ununaĘľ era, deknaĘľ gasaĘľ ak ab yanaĘľ anaba, anam mek eleknaĘľ orok bok dara, men denggulumek. Anya onoĘľ, yok ununaĘľ eneba gong, hnonda mek hmeiya mek eleknaĘľ gom, hnonda solowak unuruwaĘľ mek eleknaĘľ gom, youmaĘľ nim ugumaĘľ enyek, geklewoka unulumek.
5Anasa leboka, Parisi nim eb, Yahudi yuba neksin nang eb dara, Yesus ak, ”Nunja neyung yab edya youmaʾ diligaʾ donaʾ loboka, hekasa anja yuba doro diriga ban nang era, sembejaʾ gebman denaʾ delemak do?” wenyaboka heibek. 6Dara Yesus adya sekenek lebsukaʾ ara, ”Ugunda hyak or-or uboka sondaʾ hwam nang husukaʾ ara Yesaya bedya aldib lebsuk. Wenyhesukaʾ ara, an wenyora momnya dobok,
Ban nim era, yuba sibamaĘľ adyok
giblenyaakanya, sikja ganya era, nak ab mok
nenebdangoka ulumak.
7Sikda nim adya ununaĘľ enyek,
nadya yub enesoĘľ anyek, nekeldalamakaĘľ
anasa,
nak ara salyaĘľ lelem giblenyak an,
wenyhesuk,” wenyaboka lebok. 8Onoʾ Yesus adya sikenek, ”Ugunda nim adya ununaʾ enyek, gasa salabmoubnekanya, Imik Neyung adya unuwolulum alalanya nera lololum,” aboka lebok.
9Dara onoʾ hnon sikenek lebokaʾ ara, ”Ugunja nim ugumaʾ enyek, pe salalmoublenobaʾ aboka, Imik Neyung adya oruknaʾ yub era, lunuwoka yoknya nenyek unululumnya nera, geremsenga lokja. 10Musa bedya unulululum aboka lebokaʾ ara, Ugunjaʾ genong neyung ak pe gibeldololulum; heknedya alja genonga neyung ak waboka derelesil dara, somogiyiwanok, husuk. 11Wenhyok bok, ugunja dara, nimi hnon alja genonga neyung ak, Ugunuk eleganesisinenya nera, Imik Neyung ak seleb elegamna, wenyalamla dara, nera pelemla wenyaboka neklelum dara, 12wera nim adya sikja genonga neyung ak eleganesengnya nera, ugunja mem aboka yuba garalelum. 13Anasa, ugunja yok nim ek wenyaboka neklelum dara, wera anedya Imik Neyung adya unuwolulum alasil yub era orokaʾ nenelelum. Anya ban neiksonya nera, ugunda hyak nauba meknewoka unululum,” aboka lebsuk.
Nimi Malya Nenelesil Yuba
(Mat. 15:10-20)
14Dara Yesus ara, nimi nauba longolomekaʾ ak sikenek saaboka lebokaʾ ara, ”Ugunda nidyaʾ ella danamab aboka dara, nak pe keblulum! 15Nimi malya nenelesilaʾ ara, sembejaʾ gebman denaʾ delemak adya malya nenenggulusil. Alda nimi ganya lomok sam ab goblelanya nedya, ganya malya nenelesil. 16Anasa ugunda o yakaʾ ara pe kebnelum,” wenyaboka lebok.
17Wera Yesus ara nimi gong danyek loboka ek byuk dara, alja yuba doro diriga ban nang edya, ”Ban sunuwoka lesilimaʾ ara hek damok ek lebmeisilim do?” aboka heibek. 18Dara Yesus adya sikenek, ”Ugumbabya damok ara, anam elgom ululum de? Nimi nong weilik ab uboka nongok weknanya nedya, weknanya bek ara malya nenenggulumla, senewoka elgom ululum de? 19Anasa nimi lomok weklesilnya nera, ganya seininaʾ pik weknenggululabok, alda mon lom pik weknekanya, onoʾ goblamla,” hyok. Yesus adya ban wenyaboka lebokaʾ ara, denaʾ nidyaʾ ara or denaʾ ok hyookanya lebok.
20Onoʾ hnon lebokaʾ ara, ”Nimi ganya lomok ab goblelanya nedya, gobnanya bek ara malya ullilimla. 21Anasa, nimi ganya lomok ab goblamlaʾ ara, yok-yok malya ganya lanalamla. Ban malya lanalamlaʾ ara, gela salyaʾ salalamak, hokaʾ dolomak, nim olomak, yok nimi gel salalamak, 22yok-yok bonaʾ uluneso ganya bolomak, yok-yok malya unaʾ ganya bolomak, nimi bobnenewoka sondaʾ lelemak, yok-yok malyinya nok unulumak, yok nim edyaʾ amba solom ganya bolomak, nimi derelemak, dengdang ganya bolomak, dongdang anaʾ ganya bolomak; ban malya unaʾ danyek lanalamla. 23Nidyaʾ ban malya unaʾ danyek, nimi ganya lomok ab lanalamlakanya, anedya malya nenelesil,” wenhyok.
Gela Hnon Dib Senemok Yuba
(Mat. 15:21-28)
24Wera Yesus ara anyaganara loboka, Tirus heik moka byuk. Dara Yesus ara e lomok wekoka, e nenyek an wekemla senewoka nim ella deijik senemok bok, alda doknewamenggoma dangamok. 25Dara gela hnon alja gelma bisaʾ gologomok gel gedya, Yesus ara yeilimla an yuba kebookanya, alda Yesus ak yeiniboka koma lumugoka gibuk. 26Anya bisaʾ alja gelma ek ab yaklulaʾ senewoka molowok. Ban gel gera, alda Yahudi gel gom, alda Fenesia, Siro sokok ab beiyimeekanya, Yunani yuba salamok gel. Dara, bisaʾ alja gelma ek ab yaklulaʾ aboka, Yesus ak molowok. 27Yesus ara gel genyek an, ”Mek mabo denaʾ ara doboka gam ak eleklemak dara, penggulumak. Anasa memab ara men orowek denaʾ elegoka delgogolomak dara, pelemak,” hyok. 28Wenyek gel genedya Yesus ak, ”Neyung o, aldib e. Bok, mek mab edya del yaben enyek, denaʾ yangawoka beilinaʾ damumduk denaʾ siknaʾ yanggalamlaʾ anaba, gam eneba doboka delemla,” hyok. 29Dara Yesus adya alak, ”Wera anja wenyhelem yub enedya, bisaʾ ara, anja gelma ek ab goblaʾ anasa, wera or ek bilom!” hyok. 30Wera gel gera ek balamok enyek, alja gelma era or ekla manaʾ ak mamok, bok alda bisaʾ ara seleb goboka dengamokaʾ ak eibuk.
O Ounugumoknya Hwebok Yuba
31Wera Yesus ara Tirus heik mok era loboka, Sidon pik uboka, Galilea mek gemek sokok heik berem, Dekapolis mok sokok yok. 32Dara anyaganera, nimi be hnon o ounugoka yuba pe sanggulumoknya bek bo yeekanya, soruka diyiboka hweblulaʾ aboka, molowek. 33Dara Yesus ara benyek eboka yokok bo biniboka, o lom moumenaʾ ak sam soruka doronggoka, onoʾ Yesus adya gamalaʾ solowoka, benedya silyum ak soruka dibuk. 34Anya, Yesus ara imik sam keeb weininggoka, hina doboka, o ounugumoknya bek an lebokaʾ ara, ”Efata,” nunja yub edya dara, ”Wera, pika baklul,” andanasa lebok. 35Wera o pika bakoka, alja silyum domdigum dangoka yuba pe sab einiwok.
36Dara Yesus adya yok nanga nauba ulumakaʾ ak anaso unuwanel aboka, nekbo-nekbo aro yabanaʾ ara mem aboka, yuba sekok. Bok Yesus adya neknaʾ mem alamokaʾ anaba, sikda eiwaawom aboka, sounuwoka nekdo yabalamek. 37Anya nimi nidyaʾ unuwal an yuba kebek dara, sikda ganya nauba lokja senewek. Anya, lelemekja, ”Nidyaʾ alja unululanya nera, perob ok dangalamla! O ounugunanya beneba, yuba kenya dangallilimla, yuba gom dangananya beneba, yuba sanya dangallilimla,” alamek.
Currently Selected:
MARKUS 7: LAINLC
Highlight
Share
Copy
Want to have your highlights saved across all your devices? Sign up or sign in
