MARKUS 11
11
Yerusalem Heik Nim Eiya Hlaboka Yesus Ak Giblemek Yuba
(Mat. 21:1-11; Luk. 19:28-40; Yoh. 12:12-19)
1Wera sikda balamekaʾ ara, Yerusalem heik berem Zaitun mein damak sam Betfage, Betania heikek lanal byik dara, Yesus ara alja yuba doro diriga ban nanga penya nang men binirum aboka boksuk. 2Anya sikenek lebokaʾ ara, ”Ugunda men laga eer heikek enyek binirum. Wera ugunda men heik nong ok wekel borumun dara, nim abaksin pam anam gobenya anyek, nimi hnon mekaʾ abakyaawanggumeijaʾ pama geregemeijaʾ anyek eibnerum. Dara, pam enyek soudyaʾ loboka anyagan bo yanarum. 3Bok yok nang edya hekasa ban unulurum do aboka heibsija dara, Wenelesilnya bedya nara anyek amla anasa dolonam henerum. Dara alda onoʾ berra onok bo bululum henemla anyaʾ,” hyok.
4Dara sik penya nang era heikek biniboka, nim abaksin pam era pik gek e sindamak geregemekaʾ ak eibdek. Dara, soudyaʾ lobel yabarek sab-sab, 5nimi wene nim anyagan seklemekaʾ ara, sik penya nang ek, ”Wei, ugunda hekaʾ senewoka ban abaksin pam era soudyaʾ loblerum do?” aboka heibsik. 6Wenyek sik penya nang era, Yesus adya wenyhenerum amokaʾ sunuwoka wenyherek. Dara anyagan seklemek nim era, or bo bururuk senewoka dogom hyek.
7Wera sikda ban pam era Yesus ak bo yeiniboka, pam gwadyek ara, boksom goulunaĘľ adya yangiyiwek dara, Yesus ara an eilib welewoka bukuk. 8Dara Yesus ara, pam dubuk buku balamok dara, nimi hnonda sikja akleng enyek, pikek esonaĘľ dibaĘľ yangero balamek, hnon nim era embeng gal meklaĘľ wak ab diboka bo yeindeboka pika yangaro balamek. 9Dara nimi men mengewoka balamek nim eb, onoĘľ eimik dobdo balamek nim eb dadya, eiya hlaboka giboka lelemekaĘľ ara,
”Perobe! Imik Neyung ak giblenok e! Imik
Neyung be si amba yoknya benera,
perobaĘľ dangalalul.
10NunjaĘľ neyung Daud alja wenewoka bo usinaĘľ
yanalanya nera, perobaĘľ ak ulumnamla. Anasa,
im nongok anaba, alak giblenok e!”
aboka lelemek.
11Wera Yesus ara balamoknya nera, Yerusalem heik nong ok byuk dara, alda Imik Neyung gibnaĘľ ek wekok. Anya e lomok ara, alda oka pe nidyaĘľ kemero yabok bok, seleb iniwokaĘľ anasa, alab, aljaĘľ obadya yuba doro diriga ban nang eb, neikaĘľ Betania heik sam byik.
Ara Gal Ek Malya Dolul Hyok Yuba
(Mat. 21:18-19)
12Ampum maboka gwelegek dara, Yesus ab, alja mab ab, seleb Betania heikek ab lanawoka pikek balamek salek, Yesus ara gwaneng ok ubuk. 13Wera Yesus ara mok so ab, ara gal meklaʾ hnon bolomokaʾ ak eibuk. Dara, alda gal doka hnon ulumlyek aboka, gal dam enyek an, oka biniboka kemelemok enyek, alda gal doka hnon eibnenggubok. Bok ban salek era, gal dok li lanawanggom adya, meklaʾ ok bolomokaʾ ak eibok. 14Dara Yesus adya ban gal enyek an, ”Wenyok moruwoka eimik eneba, anak ab doka hnon nim adya denggununjak,” aboka lebok. Dara, alja ban wenyal yabokaʾ ara, alja yuba doro diriga ban nang eneba kebek.
Imik Neyung E Meewok Yuba
(Mat. 21:12-17; Luk. 19:45-48; Yoh. 2:13-22)
15Wera Yesus ab, alja yub donaʾ nang eb dara, Yerusalem heikek byik dara, Yesus ara seleb Imik Neyung ek bindiwoka, alda nimi rupiah amomaʾ ubdangoka, bonaʾ dekoka ulumek nang ek yakal yabasuk. Amomaʾ uldan yanganaʾ gal eb, yalma wining beiyiboka bukoka deklemek oulyang eb dara, alja dolub menegok. 16Anya alda nim ara, Imik Neyung e erem pik, bonaʾ bo dongoro yabanaʾ ara mem hyok. 17Dara onoʾ Yesus ara anyagan longomek nim ek nekel yabookanya, wenhyokaʾ ara, ”Bukuk momnya dobokaʾ ara, Nadya e nera nidyaʾ mok nim emba heng uboka molonaʾ e henemak aboka momnya dobnenggubuk de? Bok ugunja danyek, malya nang edya murukna oulyanga seleb geblum,” hyok.
18Dara, Imik Neyung yuba wa gakaĘľ dub nang eb, yuba neksin nang eb dara, ban yub enyek seleb kebek dara, sikda Yesus ak hekaĘľ huboka obnemab do aboka pik elemek. Nimi nauba alja neklesukaĘľ anyek, salya uru lelelanya senelemekaĘľ anasa, sikda alak loka daboka, pik elemek.
19Wera sin dangoka inil yabok dara, Yesus ab alja yuba doro diriga ban nang eb dara, nauba heikek ab lanawoka gobek.
OulaĘľ Omok Gal Yuba
(Mat. 21:20-22)
20Wera ampum ara, maboka gwelegeekanya, Yesus ab, alja yub donaʾ nang eb dara, lugunaʾ nong enyek, wamok gal dam pik an yabek dara, gal era meklaʾ ak abaʾ ara moruwoka yarang anaba yalamokaʾ ak eibik. 21Wera danyek Petrus bera ampum so anyek seleb lemokaʾ, anyek seiniwoka, alda Yesus ak, ”Neyung neklesilimnya o, wera kendelom! Ampum anyek anja malya dalom amom gal era seleb yalawo!” hyok. 22Anasa Yesus ara sikinek, ”Ugunda Imik Neyung ak hyak dib senelelulum! 23Hnon ban ugunuk dib lebsin, Nimi hnon ban mein enyek an, Anda lokoka senenggom mek gwan lomok bul bilom! henemso dara, alda ganya eb menegoka, unaʾ loboka, ban wenyhenaʾ ara, aldib unuwanamlaʾ ak senewoka ganya dib senewanamla dara, alsamba unuwanamla. 24Ban nenesa, nara ugunuk wenyhenesin, Ugunda yokaʾ-yokaʾ amba heng uboka mololelum dara, nunda ban era seleb dib dobab senewolulum. Dara, anera ugunuk aldib unuwanesil. 25Anya, ugunda heng uboka molowanamun dara, yok nim ek meknewanyok senemun dara, ugunja neyung be imik heikek ululanya bera, ugunja meknenaʾ eneba doboka bobogosululaʾ aboka, unu seinibdangamunya nera, men meebdanalum, hyok. 26Bok, ugunda yok nim eb malya uldalalumnya nera, meewanggunulum dara, wera ugunja neyung Imik Neyung beneba, ugunja malya unaʾ doboka boboganggunusil,” hyok.
Yesus Adya MigibaĘľ WelemokaĘľ Damok Yuba
(Mat. 21:23-27; Luk. 20:1-8)
27Wera Yesus ab, alja yuba doro diriga ban nang eb dara, Yerusalem heikek yek. Dara, Yesus ara Imik Neyung e erem pik kemero yabok enyek, yuba wa gakaʾ dub nang eb, yuba neksin nang eb, Yahudi dub nang eb, alak yek. 28Yeiniboka Yesus ak, ”Anda hek damok migib edya ban nidyaʾ ara unululam do? Anya, heknedya ban migib enera anak elegajok, enyek ban yokaʾ-yokaʾ ara unululam do?” wenyaboka heibek. 29Anasa Yesus ara sikenek lebnesukaʾ ara, ”Nababya saaboka ugunuk hnonok heibnesin dara, ugunda saaboka anyaʾ aboka lebnumun dara, wera nababya damok enedya yokaʾ-yokaʾ ara unulamna aboka, ugunuk neknesin. 30Dara, Yohanes be nimi meka dalasukaʾ ara, nim ek ab gom, imik heik ab unuwanalam amokaʾ ak ulumok gom? Wera anyeganyebaʾ aboka neknenulum,” hyok. 31Wera anasa, sikda yuba saldalamekaʾ ara, lebdekja, ”Nunda imik heik ab henemab dara, wera alja nuk, dara hekasa ugunda Yohanes bek ara dib senenggululum do, henesil. 32Bok nim ek ab hibyek!” aboka wenyabdek. Dara, nimi nauba ara, Yohanes bera aldib ununumnaʾ lenya ulumla senelemekaʾ adya, sikda lok anasa, saaboka alak wenyhenggubek. 33Anya sikda Yesus ak, ”Nunda elgom,” hyek. Danyek Yesus adya sikenek lebsukaʾ ara, ”Wera ugumbabya loblumaʾ anasa, nababya hek migib edya ban nidyaʾ ara unulamna aboka, laga neknenggunusin,” hyok.
Currently Selected:
MARKUS 11: LAINLC
Highlight
Share
Copy
Want to have your highlights saved across all your devices? Sign up or sign in
