MARKUS 10

Gela Lon Yuba

(Mat. 19:1-12; Luk. 16:18)

1Dara Yesus ara anyaganyeb lanawoka, Yudea mok sokok abaʾ ara, Yordan meka gemek err sam mok sokok bilimok dara, al anyeganabaʾ nimi nauba alak longowoka aknel ganagal yeilimek. Dara Yesus ara on neklemok sok, alda sikenek yuba neklesuk.

2Dara, Parisi nang era Yesus ak sene sunuwanobaʾ aboka hnon yeilimek. Anya sikda Yesus ak, ”Nunja dolomab yub edya dara, nimi hnon alaʾ gel ak or lobnamso de?” wenyaboka heibek. 3Bok Yesus ara sikenek lebsukaʾ ara, ”Musa bedya dara, ugunuk ara hekaʾ aboka lebsuk do?” aboka saaboka heibsuk. 4Wenyek Parisi nang edya dara, ”Ugunda gela lobnamna senewanalum dara, lobnamna senewanalum gel gek an, gela lon momnya donaʾ enyek, weboka eleganalumukanya lobnelum, wenyasuk,” hyek. 5Dara Yesus ara sikenek lebsukaʾ ara, ”Ugun nong anyek, ganya hyak gasa anasa, Musa bera anera wenyasuk. 6Bok men ullilisuk sum ek abaʾ moruwoka, nengma ab, gelma ab dara, Imik Neyung adya uyiwosukaʾ ak ulurak. 7Anasa wera nengmab ara, alda gela dobna dara, aljaʾ genonga neyung ak loboka, alaʾ gel ab neikaʾ hiliraakanya, 8anadya sikda nimi penya bok, hnonok nonga dangalarak. Dara, sikda nimi penya anam unggulurak bok, alda hnonok nonga dangoka ulumnerak. 9Anasa wera, Imik Neyung adya hnonok nonga nenelelanya nera, nim adya dara, loboka bokol dongonaʾ ara mem!” aboka lebok.

10Wera sikda seleb e lomok ulumek dara, Yesus adya yuba doro diriga ban nang edya, Yesus ak gela lon yub enyek, onoʾ heibek. 11Dara Yesus adya sikenek lebnesukaʾ ara, ”Heknedya men domna gel geloboka, eimik yok gel ge dolomla dara, wera bera alda men gel gek malya ullilimla. 12Anasonya neikek, gelewa anaba, men donanya bek loboka, yoknya bek dolomla dara, wera gel gera, men donanya bek malya ullilimla,” hyok.

Mek Mab Ek Perobaʾ Lebok Yuba

(Mat. 19:13-15; Luk. 18:15-17)

13Wera Yesus adya soruka diyiboka perobaʾ ak lebsululaʾ aboka, nimi nauba Yesus ak sikja mabo bo yek. Bok Yesus adya yuba doro diriga ban nang edya, nimi danyek yuba garalamek. 14Wera anyek eiyiboka, Yesus ara alja yuba doro diriga ban nang ek yu ganya boboka lebokja, ”Imik Neyung wenesin heik era, banaso nang amba ulumla. Anasa sikenek ara mem anggom, nak or yanok. 15Anasa ugunuk dib lebsin! Heknedya mek mab edya ganya boboka, Imik Neyung adya wenesin heik era, yeng asaʾ donggulumla dara, alda Imik Neyung adyaʾ wenesin heik ara weknenggunumla,” hyok. 16Ban nen wenhyok dara, Yesus ara memabo nidyaʾ somowoka eiriwosuukanya, sikja huk dubuk yok-yok soruka diyiboka, alda sikenek perobaʾ leb elegosuk.

Dub Nang Weknaʾ Okna Yuba

(Mat. 19:16-30; Luk. 18:18-30)

17Wera Yesus ara pikek balamok sab-sab, nimi be hnon bik-bikal yeiniboka, Yesus ak oumuwoka giboka alak, ”Neyung neksinya hyak perobnya o, nara hekaʾ hubnyaʾ adya, dib embengaʾ unaʾ ara dorowanamna do?” wenyaboka heibuk. 18Dara Yesus ara alak, ”Anda hekasa nak ara perobnya henelem do? Nim ara perob nanga hnon unaʾ orok bok, alda Imik Neyung ok, alak ok hnonok perobnya ulumla. 19Anda Imik Neyung adya leleladya, Nimi salyaʾ onggom, yok gel ge salyaʾ salenggom, yok nang bonaʾ salyaʾ hokaʾ donggom, sondaʾanya salyaʾ saro yabanggom, sondaʾ lenggom, yok nang edya unuwamenya mekaʾ nenenggom, anja genonga neyung ak pe giblelom hyokaʾ ara, anda seleb ella ululam,” hyok. 20Dara benedya Yesus ak, ”Neyung neklesilimnya o, ban nidyaʾ leblam yuba dara, nara anam goubenya wenyek moruwoka nidyaʾ pe unulamna,” wenhyok. 21Wenyek Yesus adya dubnya bek an kemeboka yadyek senewoka lebokaʾ ara, ”Nidyaʾ ara pe unululam bok, hnonok lololam. Anasa anda wera bimenekanya, anja bonaʾ nidyaʾ ulumlaʾ ara yok nang ek dekoka, deknaʾ dobmenekanya, bonaʾ garan nim ek eleganalam. Dara nenesemba lunuwoka, imik heikek beillilisil bonaʾ enyek dobnelam. An unuwamenek ab danyek, wera anda nak yamenekanya, diriga yalamnanelem,” hyok. 22Wera ban dubnya bera alda hyak bonaʾ dubnya ulumokaʾ anasa, Yesus adya alak banaso wenhyok dara, angoo senewoka hyak ganya obdangoka ek byuk.

23Anasa Yesus ara alja yuba doro diriga ban nang ek, sikenek keeboka lebsukaʾ ara, ”Nimi bonaʾ dub ulumak nang era, Imik Neyung wenesin heikek weknaʾ ara hyak nauba okna nong!” hyok. 24Wenyek Yesus alja yuba doro diriga ban nang era, Yesus adya wenyaboka lelemokaʾ anyek keboka, sibamaʾ igina berewosuk. Bok onoʾ Yesus adya hnon saaboka lebokaʾ ara, ”Najabo yab o, aldib, nim Imik Neyung wenesin heikek weknaʾ ara, hyak nauba oknaʾ ak ulumla! 25Nim abaksin pam era, imir lom pik ara or weknesobok, nimi bonaʾ dub nang era, Imik Neyung wenesin heikek wekna dara, hyak okna,” hyok. 26Yesus adya ban wenyaboka lelemok yub edya, alja yuba doro diriga ban nang era, ganya hyak nauba loka daboka, sik moumen, ”Ban wenyaboka lelesil dara, wera heknyek dib embengaʾ blebnamlaʾ do?” aboka leldalamek. 27Anasa leboka Yesus ara sikenek keeboka lebsukaʾ ara, ”Nim adya dara, unuwamenggomnya ululabok, Imik Neyung ak dara, unuwamenggomnya hnon unggulumla. Imik Neyung ak dara, nidyaʾ unulamla ok ulumla,” hyok.

28Wera danyek Petrus bedya Yesus ak, ”Nunda yokaʾ-yokaʾ nidyaʾ lomobukanya, anak an diriga yalanjab,” hyok. 29Anasa leboka Yesus adya sikenek lebsukaʾ ara, ”Ugunuk dib lebsin, Nimi be hnon nasamba hnon, Imik Neyung ak ab perob lero yanggan yub amba leboka, alja ek nimi gom, alja weisabo gom, alja hmal gelewa gom, aljaʾ genong gom, aljaʾ neyung gom, alja mabo gom, alja gwaneng wa gom, lo yabalamla dara, 30benera ban wene salek eneba onsok lunuwoka, Imik Neyung adya eleklamlaʾ ara, denga sal-salyaʾ anyek, denga yubaʾ dombadya anaso, ek nimi gom, weisabo gom, alja hmal gelewa gom, alja genong gom, alja mabo gom, alja gwaneng wa gom, anya igin kwenaʾ anaba, dolomla. Anya onoʾ eimik sidyaʾ daknamla sum eneba, bera hyak dib embengaʾ ulmoubnaʾ dobnamla. 31Bok nimi nauba eimik era, wenyek mengewoka ulumak nim era, eimik dangoka, wenyek eimik ulumak nim era, men mengewanamak,” hyok.

Al Somoganamokaʾ Amba Winilinya Laga Lebok Yuba

(Mat. 20:17-19; Luk. 18:31-34)

32Wera Yesus ab, alja yuba doro diriga ban nang eb dara, sikda Yerusalem heikek balamek dara, Yesus ara men mengelemok. Alja yuba don nang era, yokaʾ ublyek senen ganya bomek bok, onoʾ sik eimik nimi nauba balamek nang eneba lok ganya bomek. Wenyek Yesus ara alja yuba doro diriga ban nang ek sikbeyok yoululum aboka, e biniboka eimik alak hekaʾ huwanamokaʾ anyek neksuk. 33An alja neksukaʾ ara, ”Ugunda pe kebnelum. Nunda wenera Yerusalem heikek balamab. Dara Yerusalem heikek ab dara, nimi dibaʾ me nera doboka, Imik Neyung yuba wa gakaʾ dub nang ek hnon, yuba neksin nang ek hnon, elegeija dara, wera sikda yuba saboka obnok aboka, Yahudi gom nim ek doboka eleganamak. 34Dara nimi dibaʾ me nek nauba derewoka waboka, gamalaʾ solobgouluwoka, lobaʾ nenewoka saboka obnemak. Bok li winilya seleb mablya dara, alda embengaʾ suboka buknamla,” hyok.

Yakobus Yohanes Adya Molowarek Yuba

(Mat. 20:20-28)

35Dara Zebedeus bedya mabo moumenaʾ Yakobus, Yohanes ara, Yesus ak yeindeboka alak wenyherek, ”Neyung neklesilimnya o, nunja yokaʾ don anak molowanenggenemaʾ ara, or kebnesilim aboka, molowagenem,” herek. 36Dara Yesus adya sikenek ara, ”Alja dara, nuk ara hekaʾ ak hubsulul senenurum do?” wenyaboka heibsuk. 37Anasa sikda lebdekja, ”Neyung o, anda imik senenggom migib dubnya dangoka wenel yabasimen sum era, nunda be hnon anjaʾ sirikek sam hnon, be hnon anjaʾ waneng ek sam hnon, buknerum henesilim,” wenyaboka molowarek. 38Dara Yesus ara sikenek, ”Ugunja moloworumnya nera, anyek senewoka ugumba elgom ulurumjok moloworum. Ugunda na denesinya mek hmeiya era denesorom de? Anya nadya dobnesinya mek danaʾ enyek, onoʾ ugun dabnesiseng de?” 39Dara sikja Yesus ak, ”Numba or unuwanasinim,” herek. Anasa alda sikenek, ”Ugunda na denemna mek hmeiya denerumukanya, na dobnamna mek danaʾ era dobnerumaʾ ara, aldib. 40Bok, heknyek nadya sirikek sam gom, waneng ek sam gom buknamla anaʾ ara, nadya wenyhenggunusinya. Bok heknyek buknamlaʾ ara, benyek or buknamla senewoka, siksamba beillilisil nang enyek eleganasil,” hyok.

41Wera yok sagobadya nang edya, an wenhyokaʾ anyek kebek dara, sikda Yakobus Yohanes ak yu ganya bobek. 42Bok Yesus ara alja yuba doro diriga ban nang ek, nidyaʾ nang yoululum hyookanya, sikenek, ”Imik Neyung ak elgom ulumak soko dub nang edya dara, sikja sokok heik yokaʾ nim ek gasa soruk edya malya nenelemaakanya, sikja dub nang edya migib edya, yeiriwoka orugoka unulusak. 43Bok ugunuk dara, anasonya nera ununggom, mem! Alda saaboka ugun gangganek be hnon senenggomnya danamna senewalenya bera, alda men dara, ugunja oruknaʾanya dolul. 44Anya, ugun gangganek sam, nara men si sinaʾanya danamna senewalenya bera, alda nimi nidyaʾ amba wa wenya dolul. 45Anasa nimi dibaʾ me nera, nak aralenenokaʾ aboka yanggumok. Alda nim ek aralesinyekanya, alja nong era, nimi nidyaʾ amba bleboka dobnunaʾ aboka elekdok,” hyok.

Bartimeus Be Hwebok Yuba

(Mat. 20:29-34; Luk. 18:35-43)

46Wera sikda balamekaʾ ara, Yerikho heikek byik. Onoʾ Yesus ab, alja yuba doro diriga ban nang eb, anyeganeb loboka byik dara, nimi yok nang eb nauba balamek. Dara nimi heng lumnya be hnon, Timeus mamnya, Bartimeus bek, pik gek sam moloro bulumok. 47Dara benedya kebok enyek, Nazaret mok ebnya, Yesus ara yabalamla anaʾ kebok dara, alda yuba nauba bii aboka, ”Daud mamnya Yesus o, nak angoo yadyek senewane!” wenyaboka lel yabok. 48Wenyek nimi nauba alak loblom aboka el ngaleklemek. Bok alda ngalengaʾ gouluwoka nauba bii aboka, ”Daud mamnya o, nak angoo yadyek senewane!” aboka lelemok. 49Anasa Yesus ara balamokaʾ ara sek loboka lebokja, ”Wera alak yalom hululum!” hyok. Dara yok nang edya heng lumnya bek yalom aboka alak, ”Anja ganya daboka seklom, alda anak yalom alamla,” hyek. 50Dara heng lumnya bera, alja aklenga gwirib loboka, alda sekdo dorogoka, Yesus berem byuk. 51Dara Yesus ara heng lumnya bek, ”Anja dara, hekaʾ hubnulul senelam do?” wenyaboka heibuk. Wenyek alda Yesus ak, ”Neyung neklesilimnya o, nara henga gwelegoka eibsinya senemna!” hyok. 52Wenyek Yesus ara alak, ”Anda nak ganya dib senewanelemaʾ adya, seleb merewalemaʾ anasa, or balalom,” hyok. Wera al wene sab-sab eneba, heng lumnya bera heng gwelegoka pe eibuukanya, alda Yesus balamok pik dobdo byuk.

Currently Selected:

MARKUS 10: LAINLC

Highlight

Copy