MATIUS 17

top Meinik Sam Ab Yesus Ak Imik Nenemok Yuba

(Mrk. 9:2-13; Luk. 9:28-36)

1 # 2Ptr. 1:17-18 Wera lika hnabbadya sum seleb ubek dara, Yesus ara Petrus beb, Yakobus beb, Yakobus bedya weis Yohanes eb, neikaʾ senenggomaʾ imik welemok meinik sam welewek. Anyagan ara sikbeyok ulumek. 2Anyaganyeb dara, Yesus ara sikja kemenaʾ edya dara, yokaʾ dok. Alja hogung era heng senedyaʾ anaso uboka, alja ongomok akleng era dilinaʾ anasoʾ ok dangamok. 3Wera unumok sab-sab, Musa beb Elia beb laga dangarek dara, Yesus ab, sikda penya nang eb neikaʾ yuba salamek. 4Dara, Petrus bedya Yesus ak, ”Wenelesilimnya o, nunda anyagan ulumabaʾ ara hyak perob nongaʾ ak ulumab. Wera anda or perob senemen dara, nara anyagan lubna e winilya sobnamna, hnonda ansamba, hnonda Musa bemba, onoʾ hnonda Elia bemba,” hyok. 5#Kej. 22:2; Ul. 18:15; Mzm. 2:7; Yes. 42:1; Mat. 3:17, 12:18; Mrk. 1:11; Luk. 3:22Petrus bera anam wenyaboka yuba salamok sab-sab, debaʾ buma hnon sikenek so siklel yinggisuk dara, debaʾ lomok sam ab yuba hnon, ”Nadya wanaʾ nong ulumna me nera ban. Alja nadya ganya hekel eleklenel. Alak pe keblulum e!” hyok.

6Wera Yesus adya yuba doro diriga ban nang era, Imik Neyung adya Yesus ak wenyal yabok yub enyek kel yabeekanya, hyak loka daboka sik nonga gololong aboka sokok sam malyinggyik. 7Bok Yesus adya yeiniboka, sik nonga gaaboka lebokja, ”Ugunda lok ganya bonaʾ ara mem. Ugunda buklulum!” hyok. 8Sikda bukoka kemel yabek dara, yokaʾ-yokaʾ ara eilinaʾ orok bok, alda Yesus ok eibek.

9Wera sikda meinik abaʾ ara yanggek dara, Yesus adya sikenek, ”Nimi dibaʾ me nera somoknaʾ damokok anam suboka bukiyiwanggulyebok dara, men ugunja eiyilumaʾ ara, yok nim ek salyaʾ nekdo yabanaʾ ara mem,” aboka wenewosuk. 10#Mal. 4:5Wera alja yuba doro diriga ban nang edya Yesus ak, ”Yuba neklesak nang edya dara, hekasa Elia bera men yanamla alamak do?” aboka heibek. 11Dara Yesus adya sikenek ara, ”Aldib, Elia bera yanamlakanya, yokaʾ-yokaʾ nidyaʾ pe meewanamla. 12#Mat. 11:14Bok, nara ugunuk dib lebsin, Elia bera seleb yok bok, nim adya alak elgom ulumek, anya alak obneboka, sikja dara sangaʾ geblemek. Anasonya neikek, nimi dibaʾ me nek anaba unuwanamak,” hyok. 13Danyek Yesus adya yuba doro diriga ban nang edya dara, Yesus ban wenyalamlaʾ ara, Yohanes Pembaptis bek lelemla senewoka ella umek.

Bisaʾ Ganya Gologomokaʾ Ak Hwemok Yuba

(Mrk. 9:14-29; Luk. 9:37-43a)

14Wera Yesus ab alja yuba donaʾ nanga winilya nang eb dara, nimi nauba longomekaʾ ak sam yek dara, nimi ben hnon Yesus ak yeiniboka oumuwoka giboka, lebokaʾ ara, 15”Neyung o, nadya me nek hyak angoo yadyek senewalom e. Alda hyak senenggom digidoka anaʾ neiknaʾ salawoka, uk ak sam soowoka dorongdangoka, hnon sum era meka yourulamla. 16Nara seleb anja yuba doro diriga ban nang ek sam bo bisebok, sikja dara pe hwebnamenggom anasa lorob,” hyok.

17Dara, Yesus adya, ”Ugunda hyak hek nim ek ululum! Ugunda hyak meknewoka dib senenggululum nim ek gobdo ululum. Nara ugunub dara, li hekbadya ok goʾ siklewoka uldablemnemab do? Ban me nera anyagan bo yoululum!” hyok. 18Dara Yesus adya me nenedyaʾ ganya lomok sam ulumok bisaʾ era goboka yibilom hyok. Wera bisaʾ era goboka yibuk dara, me nera al wene sab-sab enyek merewok.

19Dara onoʾ Yesus adya yuba doro diriga ban nang era, Yesus ak sikbeyok gelelenga yeiniboka, ”Neyung o, hekaʾ adya nunja dara, bisaʾ ara yaknenggubmab do?” aboka heibek. 20#Mat. 21:21; Mrk. 11:23; 1Kor. 13:2Wenyek Yesus adya, ”Ugunja dib senenaʾ ara mek ok adya. Ugunda pe beknelum! Ugunja Imik Neyung ak dib senelelumaʾ anyek, geibya dok anasoʾ ulumsoʾ anaba, ban mein enyek lebnesomja, Ono sam gokoka bilom! wenyhenesom dara, mein era gokoka bul binimso. Yokaʾ-yokaʾ nidyaʾ ugunja unuwanggunusomnya hnon unggulumnamla!” hyok. 21”Bok ban bisaʾ enesoʾ ara, Imik Neyung ak gwaneng loboka, molobsiniwanasomaʾ adya ok yaknesom,” hyok.

Yesus Ara Al Somoganamokaʾ Amba Lebok Yuba

(Mrk. 9:30-32; Luk. 9:43b-45)

22Wera Yesus adya yuba doro diriga ban nang era, sikda Galilea moka ulumek sum enyek, Yesus adya sikenek, ”Nimi dibaʾ me doboka nimi soruk ak eleganamak sum era, wera mabdabnenggunumla. 23Alda oboka dibnemak bok, winilinya sum era, onsok embengaʾ suboka buknamla,” hyok. Danyek alja yuba doro diriga ban nang era, ganya suguwoka, engenaʾ ganya beibsuk.

Imik Neyung E Amba Rupiah Dolomak Yuba

24 # Kel. 30:13, 38:26 Wera Yesus ab alja yuba doro diriga ban nang eb dara, sikda Kapernaum heikek yek dara, Imik Neyung e amba rupiah molowoka dolomek nang edya, Petrus bek, ”Ugunja neyung neklesilnya bera, alda Imik Neyung ek weknamnaʾ amba dara, rupiah beillilamla gom, orok gom?” aboka heibek. 25Wenyek Petrus bedya sikenek, ”Beillilamlaʾ aja!” hyok. Wera Petrus bera ek balamok enyek, Yesus adya alak, ”Simon, anja dara, hekaʾ senelam do? Sokok an dub nang edya dara, rupiah bonaʾ amba garanaʾ gom, mok soko amba deknaʾ gom ara, hek nim ek ab dub nang era dolomak do? Heik yokaʾ nim edya gom, sekel yanggan nim edya gom?” aboka heibok. 26Petrus bedya dara, ”Sekel yanggan nim edya ok deklemak,” hyok. Wenyek Yesus adya, ”Wera anaso unulumak bok dara, heik yokaʾ nim era deknenggulumneseng. 27Bok nuk dara, rupiah dolomak nang ganya angwei seneweijek aboka, lobnenggunumab. Anda mek gwanek sam hadyaʾ dol binilam. Men dobmen hadyaʾ enyek doboka beibnelam. Dara, nunja beibnenam rupiah era, hadyaʾ en sibamaʾ ak an bomlyaʾ ak eibnelam. Dara rupiah enyek, dobmenekanya, nunda Imik Neyung ek weknemeibyaʾ amba, rupiah dobnobaʾ aboka welemak nim ek eleganesilim,” hyok.

Currently Selected:

MATIUS 17: LAINLC

Highlight

Copy