MATIUS 16

Parisi Nang Edya Yesus Ak Sene Orugemek Yuba

(Mrk. 8:11-13; Luk. 12:54-56)

1 # Mat. 12:38; Luk. 11:16 Wera Parisi nim eb Saduki nim eb Yesus ak sene sunuwanobaʾ aboka yeilimek. Sikda Yesus ak, alda aldib Imik Neyung ak ab yeilimok aboka ella danobaʾ aboka, lok so beknaʾ hnon meewalom aboka molowek. 2Wenyek Yesus adya sikenek ara, ”Heng anyek pe wekel balamla dara, ugunja dara, Im ara goron ublaʾ anasa, mok soko hogunga pewanamla, alalum. 3Alda lugunaʾ ek dara, ugunda wenyalalumaʾ ara, Aranaʾ im uboka, gunugalaʾ anasa, wera moka yanamla, alalum. Anasa wera, ugunda imik sam keeboka, sum era unuwanamla aboka beknaʾ eillilelum bok, alda eimik yokaʾ unuwanamlaʾ ara ugunda beknaʾ damoka hnon eilinggululum!” hyok. 4#Mat. 12:39; Luk. 11:29”Bojam unaʾ loboka, malya unaʾ hwam nim edya, yok damoka hnon meewalom aboka oruklemak bok, nadya dara, hnonok sibin anaba meewanggununabok, alda ununumnaʾ lelemoknya Yunus bek unumoknya nek hnonok eibnemak,” hyok. Yesus ara wenyabgogowok dara, anyagan ara loboka byuk.

Parisi Nang Eb Saduki Nang Edya Neklesakaʾ Anyek Keeboka Ulululum Aboka Lebok Yuba

(Mrk. 8:14-21)

5Wera Yesus adya yuba doro diriga ban nang era, balamekaʾ ara, mek gek sam seleb byik dara, kemelemek enyek, wera sikda roti gwaneng bobnenggumekaʾ ak eibek. 6#Luk. 12:1Yesus adya sikenek, ”Ugunda Parisi nim eb, Saduki nim eb dadya, roti welenaʾ ak anyek, hyak pe keeboka ulululum,” hyok. 7Alja yuba doro diriga ban nang edya ban wenhyok yub enyek, kebek dara, sik moumen leldalamekja, ”Alda ban wenyasilaʾ ara nuk roti gwanenga bobnenggumabaʾ anasa lebsil,” aldal yabek.

8Danyek Yesus ara sikja leldalamek yuba damok era seleb ella ubsuk. Anasa alja sikenek ara, ”Ugunda hekasa nunda roti gwaneng orok bar aboka leldalalum do? Ugunja dib senenaʾ era mekaʾ me ulusil. 9#Mat. 14:17-21Ugunda anam elgom ululum de? Nimi denga yubaʾ lambadya nim emba aboka roti gwanenga lambadyakanya, ugunda eimik era roti gwaneng aklenga hekbadya bolob mamagalumaʾ ara beknenggululum de? 10#Mat. 15:34-38Onoʾ nimi denga yubaʾ dombadya nim emba aboka, roti gwanenga sekbadya bok, ugunda eimik era roti gwaneng aklenga hekbadya bolob mamagalumaʾ ara beknenggululum de? 11Nara ugunub neikaʾ yuba salamab dara, gwaneng sirikaʾ ak lenggulumna, damok ara hekaʾ adya elgom ululum do? Ugunda Parisi nim eb Saduki nim eb dadya, sikja roti welenaʾ enyek, pe keeboka ulululum!” hyok.

12Wera danyek, Yesus adya yuba doro diriga ban nang era, roti gwanenga werelemak welenaʾ ek lenggulumok bok, alda Parisi nim eb, Saduki nim eb dadya sikja neknaʾ enesa lelemlaʾ ak senewoka ella dek.

Petrus Bedya Yesus Ara Anda Benyaʾ Aboka Laga Lebok Yuba

(Mrk. 8:27-30; Luk. 9:18-21)

13Yesus ara Kaisarea Pilipi heikek sokok sam byuk. Anyaganyeb dara, Yesus ara alja yuba doro diriga ban nang ek lebsukaʾ ara, ”Nimi yok nim edya dara, nimi dibaʾ me nera heknya alamak do?” aboka heibsuk. 14#Mat. 14:1-2; Mrk. 6:14-15; Luk. 9:7-8Dara Yesus alja yuba doro diriga ban nang edya alak, ”Hnon nim edya dara, Yohanes Pembaptis alamak. Onoʾ hnon nim edya dara, Elia alamak. Onoʾ yok nim edya dara, Yeremia ben gom, yok ununumnaʾ lelemoknya gom, alanjak,” hyek. 15Bok Yesus adya sikenek, ”Bok ugun nong adya dara, nara heknya senelenulum do?” hyok. 16#Yoh. 6:68-69Dara Simon Petrus bedya, ”Neyung, anda Kristus, nimi blebsinaʾ dubnya ululam. Anda Imik Neyung embengaʾ ululanya bedya me ululam,” hyok. 17Danyek Yesus adya onoʾ alak, ”Anda Yunus mamnya Simon, anda hyak dib lerowalem. Nera nim adya anak neknenggubjak bok, alda nadya neyung be imik heikek eini ululanya bedya nekgelaʾ ak leblam. 18Anasa wera, anda banyek ella danalam, anda wera Petrus ulumnelam, migib girik alamnenjak. Dara ban girik dub enyek an, somoknaʾ nimi heik sibin adyaʾ anaba oblamagoka malya nenewanggunumla anyek, nadya yuba donaʾ nim dibaʾ sobnamna! 19#Mat. 18:18; Yoh. 20:23Nara Imik Neyung bedya wenesin heik pik baknaʾ era anak eleganenggen. Anja sokok anyeb nera memnya alamnalamnya nera, imik heikek anaba mem alamnamla. Onoʾ anja sokok anyeb nera or perob alamnalamnya nera, imik heikek anaba nera or perob alamnamla,” hyok.

20Seleb wenyabgogowok dara, Yesus ara onoʾ alja yuba doro diriga ban nang ek, benera Kristus, nimi blebsinaʾ dubnya benyaʾ aboka, nimi ben hnonok sibin anaba nekdo yabanaʾ ara, mem aboka wenewosuk.

Yesus Ara Alak Igina Kweboka Somoganamokaʾ Amba Lebok Yuba

(Mrk. 8:31–9:1; Luk. 9:22-27)

21Ban sum enyek moruwoka, Yesus ara alja yuba doro diriga ban nang ek, nara Yerusalem heikek binimnekanya, Yahudi dub nang eb, Imik Neyung yuba wa gakaʾ dub nang eb, yuba neksin nang edya nauba igin kweiyiwoka, oboka dibnenyak dara, winilinya sum era, embengaʾ suboka buknamna aboka laga poboka leb einiwousuk. 22Wenyek Petrus bedya Yesus anyek, al dam gliri beildil yeiniboka lebokaʾ ara, ”Wenelesilimnya o, ban era hyak unuwanggunununjak, orok!” hyok. 23Dara Yesus ara Petrus bek uruma dangawoka, alak lebokaʾ ara, ”Nimi sunulyamanaʾ hwamnya Satan o! Anyaganyebaʾ ara bilom! Anda nak salyaʾ pika garalenelem an. Anja ganya seininaʾ era, Imik Neyung adyinya nek seininggululam bok, nim adyinya nek seinililam!” hyok.

24 # Mat. 10:38; Luk. 14:27 Dara onoʾ Yesus adya, alja yuba doro diriga ban nang ek, ”Nimi nak diriga yanenyak aboka dara, alak perob danasonya nera hibigalyekanya, aljaʾ igin yakaʾ doboka, nak diriga yalanulul. 25#Mat. 10:39; Luk. 17:33; Yoh. 12:25Anasa nimi nidyaʾ nunja nonga denghelyek senewoka blebeldalamak nim era, sikda weiningdanamak. Bok nasamba leboka, sik weiningdanamak nim era, sikja nong eibnamak. 26Nimi ben hnon sokok ulumlaʾ nidyaʾ ara, nadyaʾ aboka dobnamso bok, aljaʾ nonga weiningganamso dara, alak ara hekaʾ perob danamso do? Goma, nim alja nong unaʾ amba hekaʾ ak amamaʾ ubnamso do? 27#Mzm. 62:13; Mat. 25:31; Rm. 2:6Duboka mandenaʾ loboka, nimi dibaʾ me neb, alja lero nang eb, alja neyung bedya nong senedyaʾ pik uboka yanamak. Ban sum enyek, nimi nidyaʾ sikja unulumekaʾ sunuwoka yok-yok deknesil. 28Ugunuk hyak dib lebsinaʾ anyek ella danalum: Ugun an ublum nim enera, nimi dibaʾ me yeiniboka, wenelemnesilaʾ ara eibnenggumun salek somoganggunulum nimi hnon ululum,” hyok.

Currently Selected:

MATIUS 16: LAINLC

Highlight

Copy