Mark 2

Kkó Jisas des yóm tau matay sfu lówóhen

(Matyu 9:1-8; Luk 5:17-26)

1Timbow kogolen bè yó, bud mulék ebè Kapérnaum Jisas, ne tódô kendel tngón yó kem tau yóm deng kkólen bè gónóen. 2Ya tey dê tau bud stifun ebéléen, tódô hnok lem gónô efet laen dog dù gónó le nô yó kem dumu, balù bè lewaen. Ne ominen tmolok kul yóm Udél Dwata. 3Yóm igoen tmolok, gdek le bè yó se yó kem fat tau, wen tau sentihang le ebéléen, yóm tau matay sfu lówóhen. 4Okóm laen dù lan le husek ebè Jisas, bà mon tey tau wen. Yó tódô nmò le, nit le ete ketef yóm tau wen desen yó, wen gónó le hemnas du ditu ta bè yóm gónó Jisas seblà nô, ne tódô hnuyù tuntun le ebè Jisas yóm tau là gógówen yó koni. 5Tikóng ton Jisas yóm alì kehtahu le béléen, yó gónón tódô mon du ebè yóm tau matay sfu lówóhen yó, “Ó Man, deng hnifótu ne yó kem salaem.”

6Ne wen se bè yó kem tau gel tmolok hlau myón bè yó, yó hendem le, 7“Moen ke lómón ni kudélen tau ni? Kóem hsengeden knóen bè Dwata. Laen kô dù tau gembek hmifót salà, tek són Dwata.”

8Tódô tngón Jisas yóm nô lem hendem le, yó gónón mon du mò kul, “Moen de ke lómón yó kmò kehedem ye? 9Là kóen na a mahil mon du, ‘Hnifótu ne yó kem salaem.’ Ne là se kóen mahil mon du, ‘Btiki, ne mógówi.’ 10Ni naw hol hton kuy yóm kwen kwalisen hmifót salà yóm Ngà Tau yóm tolo knóen te tonok.” Ne omin Jisas mon du ebè yóm tau deng matay sfu lówóhen yó koni, monen, 11“Ni monu mò kóm, Man, mdai ne, ne nitem yóm gónó le semtihang kóm yóó, ne muléki ebè gónóem.”

12Ne tahu se, bè yóm igò le temngel, tódô btik yóm tau yó koni, ne nwahen yóm tehe gónó le semtihang du, ne tódô lemwót mulék. Ya tey keseftaw le du, ne tey kdóyón le ke Dwata, mon le, “Là kô deng sulék ton me du kum nim ton me ni.”

Ktaba Jisas ke Libay mò lemolò du

(Matyu 9:9-13; Luk 5:27-32)

13Kewót Jisas bè yó, bud mógów etu bè kilil Lanaw Galili. Ya tey bud tau stifun ebéléen, ne wen bud toloken kul bè yó. 14Tikóng bud hlós bè yó, tonen yóm sotu tau fen gel mtuk bwis boluyen Libay, ngà Alfiyus, myón bè fsinaen. Bè yóm kton Jisas du, tódô monen mò du, “Ó Wè Libay, loloem ou.” Ne tahu se, tódô lemwót Libay, loloen Jisas.

15Kogolen bè yó, mken Jisas ne yó kem gel lemolò du bè gónô Libay. Tey dê bè yó kem dumu tau gel mtuk bwis dalang se yó kem dumu tau gemsalà mung ke Jisas, ne gbót le seyón mken bélê le bè yó. 16Wen kem Farisi mton kul. Ni kem Farisi ni, hono kem tau tmolok hlau. Timbow ton le yóm kesegbót Jisas bè yó kem tau gemsalà, ne yó kem tau fen gel mtuk bwis bélê le, tódô le mógów ebè yó kem gel lemolò ke Jisas, ne mon le mò kul, “Moen yó du yóm tau gónó ye htolok ke deng mom segbót mken bè yó kem tau yóó?”

17Mung kungol Jisas du yóm mon le yó, yó gónón mon du mò kul, bede hningónen, monen, “Yóm tau ke laen dù desen, là kô snoloen du kun yóm tau mulung. Són yóm tau wen desen mebel du. Duhen ni sem nógówu edini ni, là tnabahu kul yó du kem tau tedeng kmò le, okóm yó dé tnabahu yó kem tau gemsalà.”

Ktolok Jisas lan yóm fasting

(Matyu 9:14-17; Luk 5:33-39)

18Sotu kdaw bè yó, lemwót yó kem tau gel lemolò ke Jan gel mabtays ne yó kem Farisi, gotu le fasting. Wen se kem tau mógów ebè Jisas, mon le mò du, “Yó kem tau gel lemolò ke Jan ne yó kem Farisi, gel le fasting se kul. Okóm yó kem gel lemolò kóm, là kô nmò le du. Moen de ke là nmò le du?”

19Ne bnalà Jisas lu, bede hlanen bè hlingón, monen, “Ke wen mò ken bè mulu, là kô gbek le du ke là gomong le mken yó kem tau tinok le edu yóm igoen tolo nô bélê le yóm logi myehen. 20Okóm angat wen ke kdawen, tódô nwa le bélê le yóm logi myehen. Yó he kton ye kul fasting.” 21Ne wen bud mon Jisas mò kul bè yóm là kehyu sembool du yóm kun tolok bè yóm tolok gna, bede bud hlanen bè hlingón, monen, “Laen kô dù tau ke klefengen bè yóm nes bolok yóm nes hanà lomi. Ke yó nmoen, ngem ke kemsong yóm nes lomi, ten-geeden heksê yóm nes bolok. 22Ne sotuhen, laen kô dù tau ke ilihen yóm tifas hanà tolo lomi elem yóm sning kulit ógóf deng legen, yóm là buden mnut. Kmoen ke kmodok yóm tifas yó ne mom btù yóm gónóhen e mili du, abay se lemto bè yóm deng kkodoken. Ne mom gotu gamà yóm tifas, ne baling sidek yóm gónóhen nô. Yó dé kun yóm tifas ke hanà tolo lomi, ilihem bè yóm sning kulit ógóf hanà tolo lomi snéen.”

Ktolok Jisas lan yóm Kdaw Kehegnô

(Matyu 12:1-8; Luk 6:1-5)

23Sotu kdaw bè yó, lemwót le Jisas ne yó kem gel lemolò du, mlan le hlalak yóm tniba, bede gbangà bè yóm Kdaw Kehegnô. Lemwót ni kem gel lemolò du, slob le ma bungu halay gu talak tniba mò nteb le. 24Timbow mton yó kem Farisi, mon le mò ke Jisas, “Tenngelem dé yó kem gel lemolò kóm, deng mom nulé le yóm hlau tekuy bè Kdaw Kehegnô yóm nmò le yó.”

25Bnalà Jisas se lu, monen, “Deng hónô senfala ye se yóm tehe nmò Dabid ne yó kem tauhen bè yóm kdaw laen dù ken le, ne tey kbitil le. 26Tódô husek Dabid bè Gónô Dwata, uma kóm Abiyatar yóm hol geta bè yó kem gel demsù ebè Dwata bè yóm kdaw yó. Ne nwa Dabid yóm mambang deng blay le ebè Dwata, ne ominen mken du. Blaem bè yóm hlau tekuy, là kóen hyu kken tau hkawang du yóm mambang yó, tek són yó kem gel demsù ebè Dwata mken du. Ewenem ke Dabid, botong kenen, ne benlayen se yó kem tauhen. Bede là kô duón Dwata du kul yóm kken le du.” 27Bud mon Jisas mò kul, “Là kô yó du gónó Dwata mò yóm tau ke mò fen lemolò yóm kdê hlolò bè Kdaw Kehegnô. Okóm yó dé gónón mò yóm Kdaw Kehegnô mò lanen tmóbóng tau. 28Yóm Ngà Tau, du se wen kwalisen fen tmolok du kuy yóm hyu mò du bè yóm Kdaw Kehegnô.”

Currently Selected:

Mark 2: tbl

Highlight

Copy