Mark 1

Ktolok yóm Jan gel mabtays

(Matyu 3:1-12; Luk 3:1-18; Jan 1:19-28)

1Ni se yóm Tulón Hyu hol gbak ebè Jisas Krays, yóm hol kun Ngà Dwata.

2Yó buten nim Tulón Hyu ni, duhen yóm tehe snulat Isaya ekni, yóm sotu tehe gna tugod Dwata, yó monen,

“Yó udél Dwata ebè yóm Ngaen, monen,

‘Wen hógówu tukô gna kóm mò eles hemgifat yóm angat lanem.’#1:2 1:2 Malakay 3:1.

3Angat tmaba gu bè tum benwu laen dù tau menwu du, yó utóm tabahen, monen,

‘Eles hen-gifat ye yóm gónón angat mlan yóm gónó tekuy mogot.

Eles hentedeng ye yóm lan mò angat loloen.’#1:3 1:3 Isaya 40:3.”

4Tahu se, wen sotu tau boluyen Jan, tódô sut bè yóm benwu laen dù tau menwu du. Yó nmoen, mabtays tau, ne hetngónen kul yóm Udél Dwata. Yó gel monen mò kul, “Hegsel ye ne, knogol ye ne yó kem sidek gel nmò ye, ne hbabtays ye, ne angat hnifót Dwata se yó kem salà ye.” 5Tey tau wen tendo gel mógów ebéléen na a hmungol du lemwót bè prubinsya Judiya ne lemwót bè syudad Jirusalim. Tódô gotu benkas tulón le du salà le, ne bnabtays Jan lu bè yóm él Jurdan. 6Nim Jan ni, yó nesen yóm nmò le lemwót gu bè bul kamél, ne yó hileten kulit ógóf ne yó gel kenen són tlangas ne tneb. 7Yó heglalagen bè yó kem tau, monen, “Wen huli dou alì mfasang sentahu. Là kóe knóón balù olohu hesek béléen. 8Béléu dou, él gel babtaysu kuy. Okóm yó kun kmò kbabtaysen kuy, suen bélê ye yóm Tulus Dwata.”

Kehbabtays Jisas ke Jan, ne yóm ktilów Seitan du

(Matyu 3:13—4:11; Luk 3:21-22; 4:1-13)

9Sotu kdaw bè yó, sut bè Jan Jisas, lemwót gu bè Nasarit, yóm benwu udì glem prubinsya Galili. Yó nógówen, nan e hbabtays ke Jan bè él Jurdan. Tahu se, bnabtays Jan Jisas. 10Timbow hahun gu lem él Jisas, tódô tonen hnas longit, ne tonen se yóm Tulus Dwata htuntun etahen gu tta, hol lómó kmoen obun. 11Ne sen-geng yóm udél gu bè longit, monen, “Uu se yóm hol dou Ngà tendo gónón nô nawahu. Tey kligalu béléem.”

12Ne tódô kendel hógówen Jisas yóm Tulus Dwata etu bè yóm benwu laen dù tau menwu du. 13Botong fat folò butengen nô ditu, ne bè yó gónó Seitan tendo tô tmilów du. Uma kóm yóm benwu yó, tey dê ógóf lem bnes nô du, okóm wen hógów Dwata gu bè longit na a tmóbóng du.

Kélék Jisas yó kem tanay tau mò lemolò du

(Matyu 4:12-22; Luk 4:14-15; 5:1-11)

14Sotu kdaw bè yó, gefet bè Jisas yóm deng kehblanggù Hirod ke Jan. Bè yóm kungolen du, tódô mulék ebè prubinsya Galili nan e hetngón bè yó yóm Tulón Hyu lemwót bè Dwata. 15Yó gel tulónen, monen, “Ni se deng bang kgefeten yóm kuy kdaw. Móyónen hto ne yóm buteng Dwata mogot tau. Hegsel ye ne, knogol ye lu ne yó kem sidek gel nmò ye, ne hol hentahu ye yóm Tulón Hyu lemwót bè Dwata.”

16Yóm igò Jisas mentad Lanaw Galili, tonen yó kem lewu tau setwoli hmuket, Simun ne twolihen Andru. Yó se kul sana gel nmò hmuket. 17Tódô mon Jisas mò kul, “Ó kem tau hmuket, mung ye do ne. Wen tles hmou kuy, hebelu yu tau mò lemolò do.” 18Tahu se, tódô kendel tebel le huket le, ne mung le ke Jisas.

19Ngang le bud mógów efet bud ton Jisas yó kem lewu tau setwoli Jim ne Jan, hono ngà Sibidi. Nô le lem ówóng le, tolo bneteng le ksê kem huket le. 20Yóm kton Jisas kul, tódô tnabahen lu ebéléen. Tahu se, tódô tnagak le mà le lem ówóng, dalang se yó kem tau mò nmò bélê le, ne mung le ke Jisas.

Kehdó Jisas busaw yóm tau wen malak du

(Luk 4:31-37)

21Kewót le Jisas bè yó, gefet le bè syudad Kapérnaum. Timbow kól bè yóm Kdaw Kehegnô, lemwót Jisas mógów ebè kul gónô gel stifun yó kem Ju nan tmolok bélê le bè yó. 22Tey keseftaw le du yó kem tau hmungol du, abay se là mkélen bè yóm kul ktolok yó kem tau gel tmolok hlau bélê le. Alì mfasang yóm kun ktolok Jisas.

23Yóm igò Jisas tmolok, tódô sut bè yó yóm tau wen busaw malak du, tódô lemangat, monen mò ke Jisas, 24“Ó Jisas lemwót bè Nasarit, tedu hendufem bélê me ni du? Nam e tô genlà mi kô? Dilóu uu, uu se yóm mólós hógów Dwata.”

25Okóm bnólów Jisas yóm busaw malak du, monen, “Béi mudél. Mdóhi béléen.” 26Tahu se, tódô hningkil yóm tau yó, ya tey sidek klangaten, ne tódô mdó se yóm busaw malak du.

27Ya tey ketnga le du yó kem tau nô bè yó, són mò le semtulón du, mon le, “Tedu mni? Tey tólóng kun ktolok tau ni. Wen kwalisen hdó yó kem busaw, ne tódô nimón le.” 28Ya tey kestulón le du yóm nmò Jisas, tódô kendel lengeben klamang prubinsya Galili.

Kkó Jisas des yó kem tau

(Matyu 8:14-17; Luk 4:38-41)

29Timbow le hewà gu lem gónó le gel stifun yó kem Ju le Jisas, tódô le hlós ebè gónô le Simun lewu le Andru, mung kul Jim ne Jan. 30Yóm kkól le bè yó, tódô glo le tuón Simun libun gemnóm des kinì là lembó, tódô henmung tulón le ke Jisas yóm desen. 31Omin Jisas mógów ebéléen, nogoten bè sigelen, ne bentiken. Tódô sen-gengen se mkó yóm kkinien, deng mom hlingas bud mò ken bélê le.

32Tikóng deng sdef kdaw, gotu nwit le ebè Jisas yó kem tau gemnóm des dalang se yó kem tau wen busaw malak kul. 33Tódô kdéen tau bè yóm benwu gónó le nô yó, gotu le stifun bè lósól yóm gónô gónó Jisas nô. 34Ne gotu hkó Jisas se yóm kdê kay des le, ne gotu hdóhen yó kem tey dê busaw malak yó kem dumu tau. Okóm là kô hudélen kul, abay se tódô dilô le Jisas yó kem busaw.

Ktolok Jisas bè klamangen prubinsya Galili

(Luk 4:42-44)

35Timbow deng hayahen bè yó, hanà tolo kifu sana btik Jisas nan e mebel gónón tinof mò gónón mni ebè Dwata, bede malù mayuk yóm gónón e solu. 36Timbow le btik le Simun, là kô bud ton le ke Jisas, tódô le lemwót na le e nebel. 37Bè yóm kton le du, mon le mò du, “Tey dê tau mebel kóm, Sér.”

38Mon Jisas se mò kul, “Lemwót tekuy ne, mógów tekuy ebè yó kem dumu benwu hmilol. Là gbeku du ke là tmoloke bélê le snéen, yakà yó du yóm hol nógówu elem benwu.” 39Tahu se, tódô lenngeben klamang prubinsya Galili gónón e tmolok bè yó kem gónó le gel stifun yó kem Ju, lelen hdó yó kem busaw bè yó kem tau nalak le.

Kkó Jisas yóm des mifù

(Matyu 8:1-4; Luk 5:12-16)

40Sotu kdaw bè yó, sut bè Jisas yóm sotu tau gemnóm des mifù. Tódô tuden bukolen bè soluhen, ne hkodu béléen, monen, “Ó Sér, ke yó dum móyói, kaem gbekem hkó du nim desu ni.”

41Tey kkodu Jisas du yóm tau yó, tódô nan e nenok, monen, “Móyóe tmóbóng kóm. Hol mkó he yóm desem.” 42Tahu se, tódô sen-gengen se mimot mkó desen yóm tau yó. 43,44Tey kget kmon Jisas du mò du, “Hol béem abay tulón yóm deng nmou béléem ni. Tódói hekteng mógów ebè tum tau gel demsù ebè Dwata, nam e hetngel du lówóhem. Elesi mit mò dsuem anì nmoem yóm sotu hlau Musis ekni mò gónó le milô du kem dumu tau yóm deng kekó yóm desem. Yó ne,” mon Jisas, “lemwóti ne.”

45Okóm bè yóm deng kulék yóm tau yó, deng mom tódô gotu tulónen bè kdéen tau yóm deng kekó Jisas yóm desen. Botong là dogen gógów ebè yó kem dumu benwu Jisas, bà mon tey tau wen tendo seklot ebéléen. Yó nmoen, tódô gel htólóng ebè yó kem benwu laen dù tauhen. Ewenem yó, sana tey kwen tau lemwót bè ket benwu tendo gel mógów ebéléen.

Currently Selected:

Mark 1: tbl

Highlight

Copy