Mark 16

Klowil Jisas

(Matyu 28:1-8; Luk 24:1-12; Jan 20:1-10)

1Timbow kogol yóm Kdaw Kehegnô le, lemwót yó kem libun na le e bemli yóm hnolo alì tilob boohen mò tô lunol le bè lówó Jisas. Yó boluy yó kem libun yó, Midi lemwót bè Megdala, ne yóm sotu Midi Yê Jim, ne Selumi. 2Timbow deng minal mwas bè Akad, tódô le lemwót mógów ebè yóm lebeng Jisas. 3,4Bè yóm igò le mógów sónmò le stulón, yó mon le, “Tau du bang tô hefluy tekuy du tum botu seng bè baken tum kilib tu?” Yóm botu mon le yó, tey botu bong. Timbow le kól ditu, deng mom sana tódô mluy. 5Omin le husek elem yóm kilib, tódô ton le yóm tau lomi lemnok, myón fi bè kwanan le, bukay nesen. Ya tey ketnga le du. 6Monen mò kul, “Bê ye mom tennga ou. Tngónu hnebel ye yóm Jisas lemwót bè Nasarit, yóm lomi tnutuk le bè kros. Là buden nô bè ni ne, deng hlowil Dwata. Ngem ni hnénég ye yóm tehe gónón masà. 7Mulék ye ne, ne tulón ye yó kem gel lemolò du dalang se bè Pitér, mon ye mò kul, ‘Deng gna bélê ye etu bè Galili kun Jisas, ditu he gónó ye ston du, yó se yóm tehe monen mò kuy.’ ” 8Tahu se, tódô le lemwót yó kem libun, mlóy le gu ditu. Ya tey sidek klikò le, botong setbol kkel le. Yóm kgefet le bè kem dumu le, bà udì ke wen tulón le, bà mon tey sidek klikò le.

Ni se sfu yóm tehe snulat Mark, bede tólóng tau smulat du Kehegfan Jisas bè yóm Midi lemwót bè Megdala

(Matyu 28:9-10; Jan 20:11-18)

[ 9Timbow hol hlafus bè Akad, mowil Jisas. Bè yóm klowilen, nan ne gna hegfan bè yóm Midi lemwót bè Megdala, yóm libun tehe wen hitu busaw hdóhen gu béléen. 10Bè yóm kton Midi yóm deng bud klowilen, tódô lemwót bè yó nan e tulón tu kem tau tehe gel lemolò du. Tolo lel le mkik yóm ksuten lem blóng le, abay se sidek klangag le ke Jisas. 11Bè yóm kungol le du yóm tulón Midi kul, duhen yóm deng bud klowil Jisas, ne yóm kehegfanen béléen, deng mom henda le.

Kehegfan Jisas bè yó kem lewu tehe gel lemolò du

(Luk 24:13-35)

12Kogolen bè yó, tódô hegfan Jisas bè yó kem lewu tau mulék gu bè Jirusalim, okóm là kô dilô le du. 13Tikóng deng dilô le, tódô le kendel bud mulék ebè Jirusalim na le e tulón tu kem dumu le yóm deng kton le du, okóm bud là hentahu le kul snéen.

Kehegfan Jisas bè yó kem sfolò sotu dù tehe gel lemolò du

(Matyu 28:16-20; Luk 24:36-49; Jan 20:19-23; Kul Nmò 1:6-8)

14Bè hol són yóm kehegfan Jisas, tódô sut lem blóng yó kem sfolò sotu dù gel lemolò du bè yóm igò le tolo mken. Nudélen lu lemwót bè yóm là kehtahu le, ne lemwót bè yóm kgel kulu le, yó gónó le alì hemda du yóm tulón yó kem tau deng mton yóm bud klowilen.

15Omin Jisas bud mon du mò kul, “Mógów ye do ebè klamangen benwu, na ye e tulón bè kdéen tau yóm Tulón Hyu lemwót bè Dwata. 16Yó se tau hemtahu du ne hbabtays, angat gutahen yóm klowil yóm laen dù tul sónen. Okóm yóm tau là hemtahuhen, angat tnafak Dwata. 17Yó kem tau hemtahu béléu,” mon Jisas, “angat wen ktued blay Dwata kul anì wen hentaw ton nmò le. Angat gbek le hdó busaw bè yó kem tau lengel mata hlan le bè dou boluy. Ne angat gbek le tódô mudél yóm udél là deng kul dnalang du. 18Ke gkem le yó kem ulal, duhen ke ginum le yóm ninum gónó matay, là kô le na a matay du. Ne ke nnok le lówó yó kem tau wen des le, tódô mkó yóm des le.”

Khaway Jisas ebè longit

(Luk 24:50-53; Kul Nmò 1:9-11)

19Kogol yóm kudél Jisas ebélê le, ominen tódô ganag haway etta bè longit, ne myón fi bè kwanan Dwata. 20Kewót le se kul yó kem tau gel lemolò du, hetngón le bè klamangen yóm Tulón Hyu gbak ebè Jisas. Tey tendo gel któbóng Jisas kul yóm gónó le mogot, hlanen bè yó kem hentaw ton gel nmò le mò gónón hegfan yóm hol ktahu yóm tulón gel nwit le.]

Currently Selected:

Mark 16: tbl

Highlight

Copy