Mark 15

Kkukum Paylét ke Jisas

(Matyu 27:1-2, 11-14; Luk 23:1-5; Jan 18:28-38)

1Tikóng deng mwas bè yó, gotu le kendel stifun yó kem geta bè yó kem gel demsù ebè Dwata, ne yó kem tuha gónó le gel galak yó kem Ju, ne yó kem tau gel tmolok hlau, dalang se kdê yó kem tau gel kmukum. Yó nmò le, sensatul le yóm kmò le ke Jisas. Omin le hmengked mfét du kdina, ne nit le ebè Paylét.

2Snólók Paylét Jisas, monen, “Uu kô tau hol geta bè yó kem Ju?”

Mon Jisas se, “Duhen yó sem deng monem yó.”

3Tey dê tifù le ke Jisas yó kem geta bè yó kem gel demsù ebè Dwata. 4Yó gónó Paylét bud mon du mò ke Jisas, “Gungolem kô yó kem tey dê tifù le kóm? Laen dù balaem du kô?” 5Okóm là kô dog bnalà Jisas kul, balù sekteb. Tey ketnga Paylét du yóm là dog kbalà Jisas kul.

Tódô hatay yóm kukum le ke Jisas

(Matyu 27:15-26; Luk 23:13-25; Jan 18:39—19:16)

6Yó kun nmò Paylét ke sok gel kól yóm mò ken bong bè yó kem Ju bè Kdaw Khius, sal wen tau bnanggù hefewaen ebélê le, okóm yóm tau kul nélék yó kem tau. 7Bè yóm kdaw yó, wen sotu tau bnanggù boluyen Barabas, tau monok lanen mung bè yó kem tau tô matù yóm gubérnor. 8Timbow le deng gotu stifun yó kem tey tau wen, hni le bè Paylét yóm tehe gel nmoen bè yó kem tau blanggù. 9Snólók Paylét lu, monen, “Móyô ye kô ke hewau ebélê ye yóm tau hol geta bélê ye yu kem Ju?” 10Yó gónó Paylét mon du yóm yó, abay se deng tódô tngónen se yóm alì kélés nawa le ke Jisas yó kem tau hol geta bè yó kem gel demsù ebè Dwata, yó gónó le meted du ebéléen. 11Okóm yó nmò yó kem tau hol geta bè yó kem gel demsù ebè Dwata, nofong le yó kem tau sbung bè yó anì hni le bè Paylét Barabas. 12Ne bud mon Paylét mò kul, “Tedu se tô nmou du bè yóm tau bnoluy ye tau hol geta bélê ye yu kem Ju?”

13Deng le mom gotu hetê, mon le, “Htutukem bè kros yó dum kun.”

14Bud snólók Paylét bélê le, monen, “Moen de? Tedu deng salaen bélê ye?”

Okóm deng mom lenwê le hetê, mon le, “Tódô htutukem bè kros ne.”

15Ne mom yó nmò Paylét, hewaen ebélê le Barabas anì hyu nawa le ebéléen yó kem tau. Ne nan habid hfes Jisas, ominen bemlay du bè yó kem sendalù mò na a tmutuk du bè kros.

Kehlowon le ke Jisas yó kem sendalù

(Matyu 27:27-31; Jan 19:2-3)

16Lemwót yó kem sendalù, nwit le Jisas ete klósól yóm gónô bong yóm gubérnor, ne gotu tnaba le yó kem dumu le sendalù bè yóm kul bung. 17Ne omin le hesek du ke Jisas yóm nes ginggung, hningón nmò le tau hol geta. Ne lenikin le yóm sotu kay tinu semnual, nmò le kuruna, mò suub le bè kuluhen. 18Ne mon le mò du, “Ni sii yóm tau hol geta bè yó kem Ju. Yake hol tahà klowilen.” 19Bud sensulit nfes le bè kuluhen, lel le semdulak du. Gotu le mtud bukol bè soluhen, hningón tô nmò le béléen yóm gel kadat le yóm tau hol geta. 20Timbow le deng tmakas hmowon du, omin le bud mlus yóm nes ginggung hesek le du yó koni, bud hesek le du yóm sana kun nes. Kewót le bè yó ne, nit le Jisas ebè yóm gónó le tmutuk du.

Ktutuk le ke Jisas bè kros

(Matyu 27:32-44; Luk 23:26-43; Jan 19:17-27)

21Yóm tolo knô le bè lan, geslong le yóm sotu tau boluyen Simun, lemwót lem bulul tô mógów ebè Jirusalim. Tódô gnaga htihang le du yóm kros Jisas. (Nim Simun gnaga le ni, sotu tau lemwót bè Sayrin.#15:21 Nim Sayrin ni, sotu syudad là sekna bè benwu Libya, bè Afrika. Du se mà le Eliksandel ne Rufus.) 22Nwit le Jisas ebè yóm benwu boluyen Golgata. Yó lanen yóm boluy yó, “Bangag Kulu.” 23Wen tô hinum le du yóm ninum lóbô, wen bulung héét bolen boluyen mira, okóm là kô dog ninum Jisas du. 24Omin le tmutuk du bè kros. Yó nmò yó kem sendalù, sensatù le yóm nes Jisas mò lan le semsólól du.

25Deng sóól mneged ne kdaw yóm ktutuk le du bè kros. 26Ne snulat le yóm duón le du, yó monen, “Ni se tau hol geta bè yó kem Ju.” 27Ne wen lewu tau gel mò sidek homong tnutuk le, sotu hteg le fi bè kwananen, ne sotu fi bè iwóngen. 28Yó gónón dohò yóm tehe hsulat Dwata, yóm monen, “Gomong matay bè yó kem tau gel mò sidek.” 29Lemwót yó kem tau gel mius bè yó, sónmò le kmotuk, ne sendekà le Jisas, tey dê udél le sidek ebéléen, mon le, “Éhé, uu kô kun tô gembà yóm Gónô Dwata, ne tek tlu kdawem bud hdà du? 30Yó kun, kmóhi elaan, lenwaem knóem bè yó.”

31Senged se kul kehlowon du yó kem geta bè yó kem gel demsù ebè Dwata dalang se yó kem gel tmolok hlau, stulón le, mon le, “Deng gel lenowilen dumu tau, là sem gbeken lemowil kun knô. 32Nénég tekuy kun ke gbeken kmó elaan nim Misaya ni, yóm tau hol geta bè yó kem tau Israél. Hemtahu tekuy béléen ke ton tekuy yóm kekmóhen elaan.” Balù yó kem lewu tau gomong tnutuk le bè Jisas, gotu gbót semdekà du snéen.

Katay Jisas

(Matyu 27:45-56; Luk 23:44-49; Jan 19:28-30)

33Tikóng deng gtungu kdaw, botong tlu urasen tódô kmifu talak tonok. 34Timbow deng sóól mosol kdaw, omin Jisas hgel udélen, monen bè kul udél, “Eloi, Eloi, lema sabachthani?” Yó lanen yóm udélen yó, monen, “Ó Dwata, Ó Dwata, moen du ke tódô bayaem ou?”#15:34 15:34 Lingón 22:1.

35Wen kem tau mdà bè yó mungol du yóm udél Jisas yó, mon le, “Éhé, tnabahen Ilaydya.” 36Ne wen sotu bélê le bè yó kendel ma yóm lómón tô gófós, ne duen bè yóm ninum lóbô là mebtesen, ominen hemsù du bè tukô yóm ngà koyu mò gónón tô hsef du ke Jisas, ne dugolen ebéléen. Ne yó monen bè yó kem tau, “Tagad. Nénég ke sut Ilaydya mò mit du elaan.”

37Omin Jisas hgel du udélen, ne tódô milot se nawahen. 38Uma kóm bè yóm Gónô Dwata, wen tey nes mfól mò seng le yóm dfél hetfing le ebè Dwata. Bè yóm kilot nawa Jisas, tódô sen-gengen lómón ke hninggel dnólóhem bè gónón sóól yóm nes yó, lenwóten fi ta kól elaan. 39Bè yóm kehto Jisas, mdà bè soluhen yóm kfitan bè yó kem sendalù, botong monen, “Tahu duhen ni se yóm Ngà Dwata.”

40Wen se kem libun nô bè yó, olo le temngel mayuk. Mung kul se yóm Midi lemwót bè Megdala, ne yóm sotu Midi yê yóm sotu Jim yóm gel mon le twoli, ne Jusif ne yóm sotu libun boluyen Selumi. 41Ni kem libun ni, lu se tehe gel lemolò ke Jisas bè yóm tehe knóen bè Galili mò tmóbóng du. Tey dê dumu libun nô bè yó snéen, hono kem libun tehe mung du bè yóm kógówen ebè Jirusalim.

Kebeng le ke Jisas

(Matyu 27:57-61; Luk 23:50-56; Jan 19:38-42)

42,43Bè yóm kdaw katay Jisas, kdaw snaan yóm Kdaw Kehegnô yó kem Ju, yóm kdaw eles gel kehtifes le bè yóm Kdaw Kehegnô. Timbow deng móyón kimel bè yó, wen sotu tau sut boluyen Jusif, tau lemwót bè Arimatiya. Du se sotu bè yó kem tau gel kmukum bè yó kem Ju, ne tey kadat le du. Gel hendónen snéen kun yóm kdaw angat kogot Dwata tau. Yó nmoen, tódô mógów ebè Paylét nan e bal du yóm kwahen lówó Jisas. 44Tey ketnga Paylét bè kungolen du yóm deng sana katay Jisas. Ominen htaba yóm kfitan, snólóken béléen ke deng legen yóm katay Jisas. 45Timbow gungolen bè yóm kfitan yóm deng katayen, ominen hemlus du ke Jusif yóm lówó Jisas. 46Tódô lemwót Jusif bè yó na a bemli yóm kumù bukay, ominen bud mulék etu bè yóm benwu gónó le hmatay ke Jisas. Tódô nwahen elaan yóm lówóhen, ne lenambungen yóm kumù bukay. Ominen yó meted du bè yóm kilib deng tehe eles hokolen bè but léhék, ne bè yó gónón lembeng du. Ne wen botu bong hluyen ebè yóm bak lebeng mò sengen. 47Ne ton yóm Midi lemwót bè Megdala, ne yóm sotu Midi yê yóm sotu Jusif snéen yóm gónón lembeng ke Jisas.

Currently Selected:

Mark 15: tbl

Highlight

Copy