Luk 4

Ktilów Seitan ke Jisas

(Matyu 4:1-11; Mark 1:12-13)

1Bè yóm kulék Jisas gu bè él Jurdan, tódô hlós tmolun béléen yóm Tulus Dwata. Niten Jisas etu bè yóm benwu laen dù tau menwu du. 2Botong fat folò butengen yóm knóen ditu, ne là kóen skó yóm tendo tô ktilów Seitan du. Bè yóm knô Jisas ditu yó, là kóen dog mken, ngangen efet deng tey sidek kbitilen bè yóm hol són kdawen bè yó.

3Ne yó mon Seitan mò du, “Ke tahu uu yóm Ngà Dwata, henbalingem ken kun nim botu nii.”

4Okóm yó balà Jisas du, monen, “Yó monen bè Sulat Dwata, ‘Là kô són du ken gónóhen mowil tau.’#4:4 4:4 Hlau 8:3.”

5Omin Seitan bud mit ke Jisas ebè yóm gónón geta, ne sulék segfes kehtonen du ke Jisas yóm kdéen benwu talak tonok. 6Ne monen mò du, “Gotu hogotu kóm kdê ni kem benwu knamalu, ne gotu homongu du kdê yó kem kendengen nô lemen. Yakà ou du deng hogot le du ne balù kihu dou kóyô gónó e bemlay du. 7Kóm du ne yóm kdéen ni, syan ke ou gónóhem mogot.” 8Bnalà Jisas se, monen, “Bud wen sotu monen bè Sulat Dwata, yó monen, ‘Són Dwata hol gónóhem mogot, ne són du hol nimónem.’#4:8 4:8 Hlau 6:13.”

9Omin Seitan mit ke Jisas ebè Jirusalim ebè yóm hol gónón geta te ketef yóm Gónô Dwata, ne monen mò du, “Ke tahu uu yóm Ngà Dwata, kmóhi ettlaan kun, 10Yakà sem deng monen du bè Sulat Dwata, monen,

‘Angat dók Dwata yó kem hógówen gu bè longit mò semgyok kóm.

11Angat snegef le uu anì là tódóen bè botu tihem.’#4:11 4:10-11 Lingón 91:11-12.”

12Ne yó bud balà Jisas ke Seitan, monen mò du, “Tahu se, okóm bud wen sotu monen bè Sulat Dwata, yó monen, ‘Béem tnilów Dwata yóm gónóhem mogot.’#4:12 4:12 Hlau 6:16. ”

13Tikóng deng yóm tô ktilów Seitan ke Jisas, ominen yó na hlun tódô tmebel du.

Kbut Jisas yóm nmoen bè prubinsya Galili

(Matyu 4:12-17; Mark 1:14-15)

14Kewót Jisas bè yó, mulék ebè Galili, ne nô béléen yóm kfasang yóm Tulus Dwata. Gotu gefet ebè tu kem benwu hmilol yóm kehból le yóm gel nmoen. 15Gel tmolok bè yó kem gónó le gel stfun yó kem Ju, ne tey kdóyón le du yóm kdê le.

Kekbê le ke Jisas bè Nasarit

(Matyu 13:53-58; Mark 6:1-6)

16Ne hlós ebè Nasarit Jisas, yóm benwu gónóhen tehe lemnok. Bè yóm Kdaw Kehegnô, mung husek elem yóm gónô le gel stifun yó kem Ju, yó se sana kun gel nmò. Ominen mdà na a semfala yóm Sulat Dwata. 17Ogu le du yóm snulat yóm tehe gna tugod Dwata ekni boluyen Isaya. Ne nból Jisas yóm sulat ogu le du yó, ne tonen yóm mò senfalahen bélê le, yóm monen,

18“Deng nô béléu yóm kun Tulus Dwata,

abay se deng néléken o

mò fen hetngón du bè yó kem tau élél

yóm Tulón Hyu lemwót gu béléen.

Deng hógówen ou ebè yó kem tau deng nfét

mò fen hetngón du kul yóm lan le gewà.

Hógówen o ebè yó kem tau butô anì bud le mton,

ne ebè yó kem tau hen-gnok anì gewà le.

19Ne yó gónón hógów do anì naw e heglalag

yóm deng kkól yóm kdaw któbóng Dwata tekuy yó kem kun tau.”

20Tikóng deng kesfala Jisas du, bud lenulunen, ne oguhen yóm tau tehe mogu du ebéléen. Ominen myón na a tmolok kul. Tódô le gteg yó kem tau sbung bè yó. 21Ne yó mon Jisas mò kul, “Deng duhen ni se kdohoen yóm Udél Dwata deng senfalahu bélê ye ni koni.”

22Tódô kdê le gotu beyen hmungol du. Tey keseftaw le du yóm klinggel yó kem udél gel btang gu bè sumóngen, mon le, “Igò sem ni du yóm ngà Jusif.”

23Ne yó mon Jisas mò kul, “Déke yó tô mon ye ebéléu yóm sana gel mon yó kem tau gnan, mon le, ‘Ke uu se yóm tau mulung, nam gna kó kun yóm kóm des.’ Déke tô hmò ye do bè ni snéen bè dou benwu yóm deng gungol ye nmou bè Kapérnaum. 24Okóm tódô tulónu kuy ktahuhen,” monen, “là kô hol henmóyô le du bè kun benwu yóm tugod Dwata.

25Ngem bè yóm hanà tolo kegenen du Ilaydya ekni, na a mbel yóm tey bitil bong bè klamangen benwu. Yó kegenen mò du là kmulón, botong tlu halay bud nem bulón. Bè Israél, yóm hol kun benwu Ilaydya, tey dê libun bolu gemfà du yóm tey bitil bong yó. 26Ewenem, là kô dók Dwata ke Ilaydya ebélê le ke mò tmóbóng kul. Mom yó gónó Dwata e mdók du etu bè yó kem tau là Ju le. Hógówen ebè tum sotu libun bolu menwu bè Saripat, sotu benwu snakuf Sidon, ne mom tu yóm nan e tnóbóng. 27Ne bud sotuhen,” mon Jisas, “bè yóm hanà tolo kegenen du Ilisa ekni, bud sotu tau tehe gna tugod Dwata se kun, tey dê tau gemnóm du yóm des mifù lem yóm hol kun benwu bè Israél. Ewenem là hkó Ilisa du yóm kul des. Tek són Naaman hkóhen desen, yóm tau là Juhen, lemwót bè benwu Sirya.”

28Ya tey sidek kebut le ke Jisas yó kem tau sbung bè yó yó bè yóm kungol le du yóm tulónen yó. 29Tódô le gotu segeng mdà, ne sensogot le, ne senkteng le etu bè tubaw yóm kbu bè kilil yóm benwu le yó, tô na le e tulé bè tubaw yóm kbu. 30Okóm tódô mlan lem blóng le Jisas, ne hlós ebè yóm gónón e solu.

Kehdó Jisas busaw yóm tau wen malak du

(Mark 1:21-28)

31Tódô hlós Jisas emool ebè Kapérnaum, sotu benwu snakuf Galili. Ne toloken yó kem tau bè yó bè yóm Kdaw Kehegnô. 32Ne tey keseftaw le du yóm ktoloken, abay se alì mfasang.

33Bè yóm gónó le gel stifun yó kem Ju yó, wen tau mung bè yó yóm wen malak du. Ya tey klangaten yóm tau yó, monen mò ke Jisas, 34“Ó Jisas lemwót bè Nasarit, tedu hendufem bélê me ni du? Nam e tô genlà mi kô? Dilóu uu. Uu se yóm mólós hógów Dwata.”

35Okóm tódô bnólów Jisas, monen, “Béi mudél. Mdóhi bè yóm tau nalakem yó.” Tahu se. Bè yóm ktagaken du, tódô mugod lem blóng le bè yó yóm tau tehe wen malak du yó, okóm là kô gehsideken du yóm busaw malak du yó.

36Ya tey ketnga le du yóm nmò Jisas yó, tey kestulón le du, mon le, “Udél du mni du? Tey mlan. Ne tey mfasang. Botong dóken yó kem busaw ne tódô nimón le.” 37Ne tódô ket tu kem benwu hmilol gotu temngón du yóm deng nmò Jisas yó.

Kkó Jisas des yó kem tey tau wen

(Matyu 8:14-17; Mark 1:29-34)

38Tikóng hewà Jisas gu lem yóm gónó le stifun yó kem Ju, hlós le ebè gónô Simun. Ne tódô glohen yóm tuón Simun libun gemnóm des kinì là lembó, ne tulón le ke Jisas yóm desen. 39Ne tahu se, mógów ebéléen na a mdà klohoken, tódô hkóhen yóm desen, mlan bè udélen. Ne sen-gengen se tódô btik tuón Simun libun, ne kendel mò ken bélê le.

40Tikóng deng sdef kdaw, tey wen tau gemnóm dê kay des nit le ebè Jisas. Gel nnok Jisas lu ket kul ne sotu, ne tódô gotu kóhen se yó kem des le. 41Balù yó kem busaw gel malak yó kem tau, gotu hdó Jisas lu. Bè yóm kdó le, tódô le gotu lemangat yó kem busaw, mon le, “Uu se yóm hol Ngà Dwata.” Okóm bnólów Jisas lu, ne là kô bud hudélen kul, abay se tódô tngón le Jisas se yóm Misaya.

Ktolok Jisas bè yó kem gónó le gel stifun yó kem Ju

(Mark 1:35-39)

42Tikóng deng mwas bè yó, lemwót Jisas bè yóm benwu yó na a mebel gónón tinof. Timbow le btik yó kem dumu tau, ya tey kebel le du. Bè yóm kton le du, tô ngali le anì là dog tnagaken kul. 43Okóm yó monen mò kul, “Là gbeku du ke là hetngónu du bè yó kem dumu benwu yóm Tulón Hyu gbak ebè yóm kogot Dwata tau. Yakà yó du yóm gónó Dwata hógów do edini.” 44Tahu se. Kewóten bè yó ne yóm tendo gel ktolok Jisas bè yó kem gónó le stifun yó kem Ju bè klamangen benwu le.

Currently Selected:

Luk 4: tbl

Highlight

Copy