Luk 12

Eles ketgama yóm hemtedeng knô

(Matyu 10:26-27)

1Sotu kdaw bè yó, tódô le muluk ebè Jisas yó kem tey tau wen, balù hilu libu kwen le, gotu le segdà te hólól ti. Yó gna nmò Jisas, mudél ebè yó kem gel lemolò du, monen mò kul, “Hol ten-gama ye yóm kul kmò yó kem Farisi, yóm gel kehlingu le bè yó kem tau gel tedeng. Yóm kul kmò yó hol lumun ke bólen yóm bulung henok mambang. 2Bede kdéen gebnos deng nmò tau, angat gotu gfan. Duhen ke wen bunihen bè kem dumuhen, angat gotu bud tngón. 3Yóm tehe gel sentulón ye lem kifu,” monen, “angat bud gungol ke kemdaw. Ne yóm deng senboyong ye lem dfél sónen yu, angat bud nból bè gónón wen.”

Olon Dwata dé knikò tekuy

(Matyu 10:28-31)

4“Yu kem hol dou wè,” mon Jisas, “wen tulónu kuy. Bê ye abay likò bè tau. Gbek le hmatay lówó ye, okóm kogolen bè yó laen dù bud gmò le. 5Tódô tulónu kuy yóm mò hol knikò ye,” monen. “Hol knikò ye Dwata, abay se ke deng hnatayen lówó ye, wen kwalisen tmudà kuy elem lanaw ofi. Du dé yóm hol tahu knikò ye.

6Ngem yó kem ngà onuk bnes gel hbalù le, tek lewu lad bli yóm limu botù. Balù yóm kul là kebtes yó, là kóen wen klifót Dwata bélê le, bà sotu. Sélét mom yu ne ke tô na a klifót Dwata. 7Balù yó he kem balu wek ye, deng gotu nsóhen. Yó gónóm mon, bê ye abay hlikò. Bong ye mebtes se kuy senta yó kem tey dê ngà onuk bnes.”

Yóm tau là hmalà ke Jisas

(Matyu 10:32-33; 12:32; 10:19-20)

8“Ni bud tulónu kuy,” mon Jisas, “Yóm tau ke gel tulónen yóm kloloen do lem blóng kem dumuhen tau, senged se bud ktulónen du se kun yóm Ngà Tau lem blóng yó kem hógów Dwata nô bè longit. 9Okóm yóm tau ke gel hnalaen yóm kloloen do lem blóng kem dumuhen, senged se yóm Ngà Tau, bud hnalaen se kun lem blóng yó kem hógów Dwata nô bè longit. 10Ne sotuhen,” monen, “gbek Dwata hmifót du yóm tau anien ke hennéen yóm Ngà Tau. Okóm là kô na a gbek Dwata hmifót du yóm tau ke hennéen kegbek yóm Tulus Dwata.

11Ke wen tau kmamo kuy lemwót bè yóm klolò ye do, ne ke nit le yu ebè yó kem gónó le gel stifun yó kem Ju mò gónó le kmukum kuy, duhen ke nit le yu ebè yó kem gubérnor duhen ke ebè yó kem dumu tau mogot benwu, bê ye abay tô lenóngón nawa yóm angat mò kbalà ye kul. 12Abay se bè yóm kdaw yó, yó hem Tulus Dwata fen angat hefedem du kuy yóm mò kbalà ye kul.”

Yóm hlingón bè yóm tau kwasa nungel

13Wen sotu tau mudél ebè Jisas, hebkó lem blóng yó kem tey tau sbung, monen, “Ó Sér, sentulónem dou dé yóm twoguhu anì numunen ou bè yó kem kimu tehe tebel mà bélê me.”

14Okóm mon Jisas mò du, “Laen bang kwalisu kmukum kuy, Man, duhen ke fen tô nólólu bélê ye kimu ye.” 15Ne bud mudél Jisas ebè yó kem tau sbung bè yó, monen, “Hol gel ten-gama ye yóm kdéen gel senbì tau, abay se balù nô kbong kimuhen yóm tau, là kô bè yó du tahu gónón mowil.”

16Ominen wen hlingón Jisas bélê le, monen, “Wen sotu tau alì wen kendengenen, ne bong gel gutahen lem tonoken. 17Yó nô lem hendemen nim tau ni, ‘Tedu kóem kmou du nim tey gutahu ni? Laen hol gónóhu e semtifes kul.’ 18Ne yó mefet lem hendemen, monen, ‘Ni dii atulu du. Naw genbà ni kem gna folu, ne hol hbongu yóm mò tlesu du mò gónóhu e semtifes kdê yó kem deng nutahu, ne mò gónóhu e hemyu kul yó kem dumu kimuhu. 19Ne yó angat monu, Tey hyu bagiu nim ou, wen nim tey henyuhu ni balù mom hilu halay. Naw olò na hdatù dé ni, na hendengen mken ne minum, naw hol hligal.’

20Okóm mudél ebéléen Dwata, monen, ‘Nungeli nim uu. Són ktauhem kifu ni kdeng. Ne yó kem deng henyuhem yó, tau du de bud mfun kul?’ ”

21Ne bud mudél Jisas ebè yó kem tau sbung bè yó, monen, “Yó se kmoen yóm tau ke alì sen-glomen kendengenen, okóm bè kton Dwata du, tau alì élél.”

Bê tekuy tnafa nawa klowil tekuy

(Matyu 6:25-34)

22Ne bud mudél Jisas ebè yó kem gel lemolò du, monen mò kul, “Bê ye abay tnafa nawa yóm kmò kken ye duhen ke yóm kmò knes ye. 23Sélét mom kken ye ne là gbek Dwata du, anì sem klowil ye du, Dwata tehe mò du. Ne sélét mom knes ye ne là gbek Dwata du, anì sem lówó ye yó du, Dwata tehe mò du. 24Tenngel ye dé yó kem wak, laen kô hulu le, ne laen se dù bang nuta le, ne laen se dù fol le. Bede tódô wen gel htukô Dwata kul. Milud he yó dum kuy igoen bong mu ye senta yó kem onuk koyu. 25Laen dù tau ke gbeken htahà du udì ktauhen lemwót bè alì ktafa nawahen klowilen. 26Ke là se gbekem du yóm tek udì yó, moen se ke lenóngón nawam yó kem dumun?

27Tenngel ye dé yó kem bulók lem bnes. Là kô le mò nmò ne là se kô le mewel mò nes le. Okóm tódô tulónu kuy, balù yó hem alì kun kegeta Selumun ekni bè yóm alì kwen kendengenen, balù yóm alì keklóón yó kem nes gel leseken, là kô gsengeden du yóm kul keheklóón yó kem bulók. 28Là kóen tahà se kul klowil yó kem bulók, olo le sut nim kemdaw ni, ne haya menes le, ne bot le elem ofi. Ke minggel kmò Dwata kul yó kem bulók balù yóm tey kukol klowil le, milud he knesen kuy. Tey udì kehtahu ye nim yu. 29Bê ye tnafa nawa kmò kken ye ne yóm kmò kinum ye. 30Ni se gel tnafa nawa yó kem tau là deng temngón ke Dwata. Okóm yóm Mà tekuy bè longit, deng eles tngónen yóm kwen mu ye du ni kem ni. 31Ni dii hol nmò ye. Hogot ye ke Dwata klowil ye, ne du he angat bemlay du kuy ni kem wen mu ye du ni.”

Yóm kendengen bè longit

(Matyu 6:19-21)

32“Yu kem tau lemolò do,” mon Jisas, “balù yóm là kwen ye, bê ye abay hlikò. Abay se yóm Mà tekuy bè longit yó, tey kehyu nawahen bè yóm khomongen kuy bè yó kem tau nogoten.

33Hebli ye yó kem kimu ye, ne blay ye bè yó kem tau élél yóm blihen. Ke yó nmò ye, lómón ke deng wen filak henyu ye bè longit bè yóm gónó hemyu filak là buden sidek. Ke wen ten-ginof ye bè longit, là kô wen fen mtón du ne laen se dù mnagaw du ne laen se dù kaba hemsidek du. 34Yó se gónóhen nô kendengen ye, yó se gónón nô nawa ye.”

Yóm tau eles ningaten kkól yóm gónóhen mogot

35,36Yó bud mon Jisas mò kul, monen, “Eles ye hol htifes. Lómón yó kem tau sónmò le tendo hemku yóm kulék yóm gónó le mogot gu bè yóm ken nuluhen. Deng le eles htifes, ne deng le eles hemtom solok, anì duhe kóm, ke sok kól yóm gónó le mogot ne tmaba, tódô kendel lenungkà le béléen yóm tikeb bak dól. 37Hligal le du kul yó kem tau là deng le henga bè yóm kkólen, ne ke deng le eles htifes. Yó tódô tulónu kuy,” mon Jisas, “yóm gónó le mogot yó, angat du tles bud temdof kul. Gotu senseyónen lu, ne henkenen lu. 38Balù sóól buteng kkólen, duhen ke móyón mwas, senged nóm kehligal le yó kem tau deng eles htifes bè yóm kkólen.

39Yó mò nit nawa ye, ke eles tngón yóm tau fun gónô yóm kmò kifu nan e knagaw lem gónóen yóm tau mnagaw, eles gabungen anì là guseken elem gónóen yóm tau mnagaw. 40Ni bud huléku edu,” monen. “Eles tendo ningat ye yóm bud kkólen elem blóng ye yóm Ngà Tau, abay se kulel angat kkólen bè yóm uras là gingat ye du.”

Yóm tau gulit ne yóm tau là guliten

(Matyu 24:45-51)

41Bè yóm kungol le du nim tulón Jisas ni, mudél ebè Jisas Pitér, monen, “Ebélê me kô, Sér, gónón e gbak nim henfengem ni, duhen ke ebè kdéen tau?”

42Ne bnalà Jisas se, monen, “Yóm tau gulit kmoen nmò bè yóm gónóhen mogot, ne hulung hedem, yó se yóm tau tódô gotu hogoten du yóm gónóhen mogot yóm gónóen ne yó kem dumu tau mò nmò béléen mò fen semgifà kul. 43Hligal kun yóm tau mò nmò yó ke tolo lelen hteneb mò nmò bè yóm kkól yóm gónóhen mogot. 44Tódô tulónu kuy ktahuhen,” mon Jisas, “yóm tau gulit kmoen nmò yó, angat gotu hkemen du yóm gónóhen mogot yóm kdê nfunen. 45Là, ke yó mefet bè nawahen yóm tau mò nmò yó, ke mom monen, ‘A, léét he ni kkólen yóm gónóhu mogot.’ Ne nbuten mfes yó kem dumuhen mò nmò, kem logi ne kem libun. Ne fen hebsow mken ne hlengel minum se kun. 46Hek na a kól yóm gónóhen mogot bè yóm kdaw là getgamahen du, yóm kdaw là gingaten du. Ngem kà hnatayen du yóm tau yó, ne uliten du yóm kul glumfak yó kem tau là mimónen. 47Yóm tau ke deng hónô tngónen yóm hmoen du yóm gónóhen mogot ne mom hningayen, là dog nmoen du, angat tey kbougen du yóm gónóhen mogot.

48Bong yóm tau ke là deng tngónen du kun yóm hol kóyô yóm gónóhen mogot, ne gmoen se kun yóm gónóhen megtafak, là katen alì mgel kboug le du. Yóm tau ke bong yóm hogot le du, bong se hendón le béléen. Ne yóm tau ke alì bong se yóm hogot le du, milud se kbongen yóm hendón le béléen.”

Klolò ke Jisas gónón stólóng nawa tau

(Matyu 10:34-36)

49Ne yó bud mon Jisas mò kul, “Ke hlingónu du yóm nógówu edini ni, hol lómón ke mite ofi elem benwu. Hendéméu dé ke deng lemtom. 50Okóm naw na hol glayam gu laanen he, ne hatan mkó béléu nim keblat nawahu ni ke deng mkó tahu yóm keglayamu yó. 51Ilóem ofo kuy kô ke yó hendufu edini ke naw e sensotu knawa tau te tonok? Okóm là. Yó dé nógówu, naw e sentólóng lu. 52Kewóten ni ne,” monen, “yóm sotu kmuleng, ke limu kwen le, lemwót yó kem tlu, tólóng kul kehedem bè yó kem lewu. 53Angat gotu sekla nawa le yó kem tau smà ne syê ne tau stuón.”

Là getnef le du yóm nmò Dwata

(Matyu 16:2-3)

54Ne yó bud mon Jisas ebè yó kem tau, monen, “Ke wen lobun hitem ton ye fi gu desdef, gel mon ye, ‘Angat kmulón.’ Tahu se yó, kmulón. 55Ne ke gel lemnos fi leged, gel mon ye, ‘Angat tey kinì kdaw.’ Tahu se yó, kinì. 56Yu kem tau hemtedeng knô, igò ye sem hulung temnef kul yó kem ton ye bè tonok dalang se yó kem ton ye bè longit, kihol ye là hulung temnef du yóm dou nógów elem blóng ye ni.”

Eles kwit sefyu bè Dwata

(Matyu 5:25-26)

57Ne yó bud mon Jisas mò kul, “Mò ye là eles hemdem du yóm hyu bélê ye? 58Ke wen tau kmamo kóm, ne tô nwiten u bè gónô skukum, tnanahem mit sefyu béléen gu laan ye là deng gefet bè yó. Abay se ke dengi kól bè yó, ngem kà nwiten kóm ebè yóm tau hemdeng knukum. Ne lemwót kun, blayen uu bè fulis mò bmanggù kóm. 59Tódô tulónu kuy ktahuhen,” mon Jisas, “là kói na a gewà ke là nam gotu gbayad du yóm salaem.”

Currently Selected:

Luk 12: tbl

Highlight

Copy