Luk 13

Eles hegna ye sel ye

1Bè yóm kdaw yó, wen kem tau sut bè Jisas fen tmulón du yóm nmò Gubérnor Paylét bè yó kem tau lemwót bè Galili. Yóm hanà tolo lel le tô demsù ebè Dwata, tódô gotu hfatay Paylét lu.

2Ne bnalà Jisas yóm tulón le du yó, monen mò kul, “Yó kem tau hfatay Paylét yó, yó kô kehedem ye du abay se alì bong yóm kul salà senta yó kem dumu tau bè Galili? 3Là yó du. Bede yó tódô tulónu kuy, ke là eles ye hegsel, ne ke là knogol ye du yó kem sidek gel nmò ye, angat ye matay mekto snéen kuy. 4Ne bud yó kem sfolò wolu tau deng matay bè Silom,” monen, “gdilanen lu yóm gónô geta deng hugón. Bud yó kô kehedem ye du abay se alì bong yóm kul salà senta yóm salà yó kem dumu tau bè Jirusalim? 5Là yó du. Bede yó tódô tulónu kuy, ke là eles ye hegsel, ne ke là knogol ye du yó kem sidek gel nmò ye, angat ye matay mekto snéen kuy.”

Yóm hlingón bè yóm koyu fig là munguhen

6Ne bud wen henfeng Jisas bélê le, monen, “Wen sotu tau deng wen koyu fig huluhen lem blóng yó kem dumu huluhen. Sotu kdaw bè yó, nan e nauy yóm koyu yó, nénégen ke wen bunguhen, okóm laen dù tonen. 7Ne monen mò yóm tau gel hebuden du yó kem koyu huluhen yó, monen, ‘Ngem dé nim koyu nii. Deng tlu halayen ni ne kegenu tendo gel tô hemdón yóm kbunguhen, ewenem laen kô bang olò tonu du. Tódô nofokem ne. Olon mamà yóm tonok gónóhen mteg.’

8Ne mon yóm tau gel lembud du, monen, ‘Tagad nofok he, Sér. Na henku he bè nim halay ni ne bud lenbud he, naw hensù abunu he. 9Ne ke sok mungu halay hulin, hyu. Okóm ke là, tódô angat hofokem he.’ ”

Kkó Jisas des yóm tuha libun kogò bè Kdaw Kehegnô

10Bè yóm sotu Kdaw Kehegnô, tmolok Jisas bè yóm sotu gónô gel stifun yó kem Ju. 11Wen libun nô bè yó, wen desen lemwót bè yóm busaw gel malak du. Yó gónón kogò, balù udì ke olò gebtolen kwangen. Deng sfolò wolu halayen ne kegenen deng gemnóm du yóm desen yó. 12Tikóng ton Jisas, tnabahen ebéléen, ne monen mò du, “Ó Yê Dì, dengi gewà ne bè yóm desem.” 13Omin Jisas menok du yóm libun yó, ne tódô henmungen se btol yóm kwangen, ne ya tey kdóyónen ke Dwata.

14Okóm yóm tau hol mogot yóm gónô stifun bè yó, deng mom lembut lan Jisas hkó des bè yóm Kdaw Kehegnô. Yó udélen ebè yó kem tau bè yó, monen, “Igò sem nem kdaw du hol gel kmò tekuy nmò, yó dé tnana kehkó ye des. Béen mom bè yó dum Kdaw Kehegnô.”

15Ne bnalà Jisas yóm monen yó, monen mò du, “Tey tau hemtedeng knô yóm yu. Igò sem kuy du bè yóm Kdaw Kehegnô, gel ntó ye fét kem safì ye ne yó kem kudà ye, ne gel hinum ye lu. 16Ne ni hem libun ni,” monen, “libun semfu gu bè yóm tehe fù tekuy Abraham. Deng sfolò wolu halayen ne yóm deng kegen Seitan mfét du bè yóm desen ni. Là hyuhen kô ke hewau anien ke bè Kdaw Kehegnô?” 17Bè yóm udél Jisas yó, gotu le mulék myak yó kem hmohon du. Okóm yó kem dumu tau bè yó, gotu le hligal du yó kem dê tennga ton gel nmoen.

Yóm hlingón bè yóm lem hulu alì lemnek

(Matyu 13:31-32; Mark 4:30-32)

18Bud mon Jisas, monen, “Gónó tekuy e hkél du de yóm kogot Dwata tau? Gónó tekuy e hmingón du de? 19Sotu gónó tekuy e hmingón du, hol lómón ke yóm lem hulu alì lemnek deng hulu yóm sotu tau bè lamihen. Ngangen efet tmowok yóm huluhen yó, ne baling koyu bong, ne gotu le smala gu ta hangahen yó kem onuk koyu.”

Yóm hlingón bè yóm bulung henok mambang

(Matyu 13:33)

20Ne bud mon Jisas, monen, “Gónó tekuy e hmingón du du yóm kogot Dwata tau? 21Sotu gónó tekuy e hmingón du, hol lómón yóm libun mò mambang. Balù tek udì bulung henok bolen bè yóm tey arina deng hnéféen, botong gbeken henok du yóm kbongen.”

Yóm bak dól sikeb

(Matyu 7:13-14, 21-23)

22Kogolen bè yó, lemwót ebè Jirusalim Jisas, ne sónmoen tendo gel slob tmolok bè yó kem benwu mulit lan. 23Ne wen tau smólók du béléen, monen, “Ó Sér, angat là holen wen kóó tau gmuta du yóm klowil laen dù sónen?”

Ne bnalà Jisas se lu, monen, 24“Yóm lan ebè yóm klowil laen dù sónen, hol lómón ke bak dól sikeb. Hotu ye són gel ye husek edu, abay se angat tey dê tau móyô husek elemen hulin kdaw, okóm là kô le gusek elemen. 25Abay se angat nseng yóm fun gónô yóm bak dólen. Angat tey ktaba ye doli beng, angat mon ye, ‘Lenungkaem kum dé, Sér, nim seng bak dólem nii.’ Ne yó mom angat balaen kuy yóm fun gónô, monen, ‘Là kô tngónu du gónó ye gu lemwót.’ 26Ne yó se kuy angat bud balà du, mon ye, ‘Igò me sem deng tehe gel seyón kóm mken du, ne lelem deng tehe gel tmolok bè benwu me ekni.’ 27Okóm yó mom angat bud balaen kuy, monen, ‘Là kô tngónu du gónó ye gu lemwót. Hlayuk ye béléu, yu kem tau gel mò sidek.’

28Ngem he,” mon Jisas, “angat tey keheslaf ye dmumu mkik ne sembéhé kakim kesok ton ye lem kun benwu nogot Dwata yó kem tehe fù tekuy, le Abraham ne Isak ne Jakub, ne dalang se yó kem kdê tehe gna tugod Dwata. Okóm yó dum kuy, angat tódô tudà le yu. 29Angat tey dê tau là Ju le, lemwót fi gu dmata kdaw ne fi gu desdef ne fi gu leged ne fi gu debwak. Angat le gotu seyón mken bè yóm kun benwu nogot Dwata. Tódô kentihen benwu talak tonok angat gónó le gu lemwót yó kem tau angat mung bè yó. 30Wen se yó kem tau deng ghuli nim kmoen ni, angat le gegna bè yóm kdaw yó. Ne yó kem tau deng gegna nim kmoen ni, angat le bud ghuli bè yóm kdaw yó.”

Klayuk nawa Jisas yó kem tau bè Jirusalim

(Matyu 23:37-39)

31Bè yóm kmoen yó, wen kem Farisi sut bè Jisas, mon le mò du, “Béem là ksón nô bè ni ne, wen Hirod, tô hfatayen uu kun.”

32Mon Jisas se mò kul, “Mulék ye etu ne, ne hol tulón ye yóm tau alì hulung smukat yó, mon ye mò du, ‘Kemdaw ni ne haya, tolo lelu he hdó busaw ne hkó des. Lewu ni kehedengu du yóm nmou.’ 33Tódô henlósu nim kógówu kemdaw ni, ne haya efet lewu ni, abay se là kô tódô kihu benwu du gónóhen matay yóm tugod Dwata ke là hol bè Jirusalim du he.

34Yu kem tau menwu bè Jirusalim, sal gel hnatay ye yó kem tau tugod Dwata, ne gel hnatay sentudà ye botu yó kem gel hógów Dwata ebélê ye. Deng hilu duléku ne tô móyô sembung kuy, lómón tô kmou kuy, lómón yóm mlon gel kenleken elaan hafaken yó kem ngaen, okóm là kô ye dog móyô. 35Yó se gónó Dwata tódô mayà du lem blóng ye yóm Gónóen. Tódô tulónu kuy ktahuhen, là tagad na ye bud ton do he ke là nan na kól yóm kdaw angat kmon ye du, ‘Dwata he hol tmóbóng du yóm tau deng hógówen.’#13:35 13:35 Lingón 118:26.”

Currently Selected:

Luk 13: tbl

Highlight

Copy