Luk 11

Ktolok Jisas kul mni bè Dwata

(Matyu 6:9-13; 7:7-11)

1Sotu kdaw bè yó, mni bè Dwata Jisas bè yóm sotu gónóhen nô. Kogol yóm knihen yó, wen sotu bè yó kem gel lemolò du mon du mò du, “Ó Sér, tolokem mi dé mni bè Dwata lómón yóm tehe gel ktolok Jan yó kem gel lemolò du.”

2Ne tahu se. Yó mon Jisas mò kul, “Ke mni ye bè Dwata, yó kmon ye du, mon ye,

‘Mà, kóyô me ke kdéen tau hol madat yóm kóm boluy.

Kóyô me ke géhél nogotem yóm klamangen.

3Benlayem mi sfeng ken me ket haya.

4Hol hnifótem kum salà me,

yakà gel hnifót me du yó kem tau gemsalà bélê me.

Ne béem bayà mi ebè yóm tilów mgel.’ ”

5Ne yó bud mon Jisas mò yó kem gel lemolò du, monen, “Mò kmoen se ke wen sotu bélê ye mógów ebè gónô yóm ween ke sóól buteng, ne ke yó monen mò du, ‘Ó Wè, hlun benlayem o kun ken, 6abay se wen yóm weu milo slob mefet béléu, ne laen bang gónóhu ma mò hkenu du.’ 7Ne mò kmoen se,” mon Jisas, “ke yó mom balaen du, monen, ‘Béem hnala ou. Deng hen-getu bak dólu. Deng me gotu hlilil.’ 8Mò kmò ye du de,” mon Jisas, “ke là btiken ebélê ye? Tódô tulónu kuy, anien ke là btiken na a tmóbóng kuy lemwót bè yóm keswè ye, angat btik he yó syan ke là teflok yóm kni ye béléen, ne gotu suen bélê ye yó kem hni ye.

9Ni hol tulónu kuy,” mon Jisas. “Ke wen hni ye gel guta ye. Ke wen hnebel ye, ton ye. Ke mbal ye gu bak sut, wen hemta kuy. 10Ket tau ke wen hnihen gel gutahen. Ke wen hnebelen, tonen. Ke mbal gu bak sut, wen hemta du.

11Balù sem kuy du kem tuha? Ke mni utón él yóm ngà ye, ulal kô blay ye du? Là kô yó du. 12Duhen ke mni ngà onuk lenbotù, syufón kô blay ye du? Là kô yó du. 13Balù se yóm kuy là kgulit,” mon Jisas, “ewenem sana khulung ye bemlay kem ngà ye yóm hyu bélê le. Milud he yóm Mà tekuy bè longit ke hni ye béléen yóm kun Tulus, tódô blayen kuy.”

Kemgis Jisas senta Seitan

(Matyu 12:22-30; Mark 3:20-27)

14Sotu kdaw, hdó Jisas yóm busaw humew yóm sotu tau. Tikóng deng hdóhen, tódô bud mudél se yóm tau tehe umew yó. Tey keseftaw le du yó kem tau sbung bè yó. 15Okóm wen se fen mon du, “Kaem Seitan yóm htulus du yó, yakà són bè Seitan du gónó le mogot kul yó kem busaw.” 16Ne bud wen se kem dumu tau tô tmilów ke Jisas, tô hmò le hentaw ton mò ilô le yóm khógów Dwata du.

17Okóm tódô tngón Jisas yóm nô lem hendem le, ne yó gónón mon du mò kul, “Yóm benwu tendo mesgólól nawa tauhen, ne ke sónmò le sfatay, angat meglà. Balù yó hem sotu gmónô, ke là ssotu nawa le, angat le tódô seglef. 18Duhen yó, ke sónmò le sfatay yó kem tau nogot Seitan, deng mesgólól ne nawa yó kem tau nogoten, ne yó se angat gónó le meglà. Gel mon ye lemwót bè Seitan yóm kegbeku hdó busaw.

19Ke tahu se yóm gel mon ye yó, wen snólóku bélê ye. Tedu de gónón lemwót yóm kul kegbek hdó busaw yó kem gel lemolò kuy? Ke là lemwóten bè Seitan yóm kul kegbek hdó busaw, yó se gónón gdilô salà kehedem ye. 20Tódô lemwót bè yóm kehtulus Dwata do yóm kegbeku hdó busaw. Ne ni se gónó ye temngón du yóm deng kkólen lem blóng ye yóm kogot Dwata tau. 21Yóm kul gónó mogot yó kem busaw,” mon Jisas, “hol lómón yóm tau kemgis. Deng eles htigel mentey yóm kun gónô, ne laen kô hemen le yó kem kun kimu. 22Okóm ke wen tau kemgis sentahen mundug du, laen kô nan e gmò. Tódô nalaw yóm tau kemgis sentahen yó kem ngom sfatay tô snaligen, ne tódô nólólen bè kem dumuhen yó kem kimu negefen béléen. Hol lómón yó se,” mon Jisas, “yóm deng nmou bè Seitan.”

23“Yóm tau là mungen dou, hohonen ou. Yóm là tnóbóngen do semtifun kem tau, deng du se fen semkla kul.”

Bud kesfulék yóm busaw ebè yóm tau tehe nalaken

(Matyu 12:43-45)

24Ne yó bud mon Jisas ebè yó kem tau sbung, monen, “Ke deng mdó bè yóm tau yóm busaw gel malak du, yó lanen smidok yóm busaw gu lem bnes mebel gónón e hegnô. Ke laen dù bang tonen, yó mon yóm busaw yó, ‘Bude mulék ebè yóm tehe gónóhu lemwót dé ni.’ Tahu se. 25Bè yóm bud kesfuléken yó, tódô tonen mólós ne minggel kestifesen yóm tehe gónóhen nô yó. 26Ominen tódô bud lemwót, hitu dumuhen yóm nan e nangay mò dumuhen bud nô bè yó, bede yóm sal gulé sentahen ksidek le. Tikóng le deng gefet bè yó, tódô le setnù bè yóm tau yó. Ya yóm tau yó, deng mom gulé ne yóm alì ksidek kegnómen du senta bè yóm gnan.”

Yóm tahu kligal

27Yóm deng ktulón Jisas du nim ni, wen libun mudél ebéléen gu lem blóng yó kem tey tau sbung, yó monen mò ke Jisas, “Ilóu kehligalen kun yóm libun gónóm gu sut, yóm gónóm tehe gel tmutù.”

28Okóm yó mom balà Jisas du, monen, “Milud he kehligalen yóm tau ke hnungolen yóm udél Dwata, ne nimónen.”

Tô hmò le ke Jisas yóm hentaw ton

(Matyu 12:38-42)

29Tikóng le alì sguku ebè Jisas yó kem tey tau wen, yó bud mon Jisas mò kul, “Tey sidek ni kem tau kmoen ni. Són hnebel le yóm hentaw ton, okóm laen kô dù bud nmou bélê le. Tek són nmou lem blóng le, són yóm hentaw ton tehe ton le bè Juna ekni, yóm sotu tehe gna tugod Dwata. 30Bè yóm tehe gbunù Juna, yó se mò ilô kem tau bè Ninibi du yóm deng khógów Dwata du elem blóng le. Senged se yóm Ngà Tau, angat wen ton ye béléen mò ilô le du yó kem tau ni kmoen ni yóm deng khógów Dwata du elem blóng ye.

31Bè yóm kdaw kkukum Dwata tau,” mon Jisas, “angat mdà bè yó se yóm libun boi là Juhen lemwót bè benwu Siba, ne nselen yu. Tehe gloken milo lemwót gu bè kun benwu là sekna lanen na a hemklingu ke Selumun, yóm tehe sotu tau hol geta bélê tekuy ekni, yóm alì hulung hmau. Deng kól lem blóng ye bè ni yóm mkay senta Selumun, okóm deng mom henda ye. 32Bè yóm kdaw angat kkukum Dwata tau,” mon Jisas, “angat le sbung mdà bè yó se kul yó kem tau là Ju le tehe lemwót bè Ninibi, ne angat nsel le yu. Anam yó ne kul, tek olo Juna he yóm tehe hetngón du kul yóm udél lemwót bè Dwata, ewenem yó, sana kehegsel le, ne tódô knogol le yóm sidek gel nmò le. Deng wen yóm mkay senta Juna deng kól lem blóng ye bè ni, okóm deng mom henda ye.”

Yóm henged solok lówó

(Matyu 5:15; 6:22-23)

33Ne yó bud mon Jisas mò kul, “Laen kô tau hemtom solok ke deng mom bnosen, duhen ke mom hnokoben. Bede ke wen gel hemtom solok, kaem hyónen bè gónón mfatu anì ton kem tau motun yóm layagen. 34Yóm mata ye,” mon Jisas, “hol timbang solok lówó ye. Yóm tau masa, mtataw nóng soloken ne lemayag kmò khedemen. Okóm yóm tau sidek kmoen, lómón ke matay soloken ne kmifu se kmò khedemen. 35Yó ten-gama ye, déke là mnóngen yóm solok ye. 36Ke hono layag lem hendem ye, laen kô bang gónón kmifu, hol lómón ke mógów ye lem nóng solok mtataw nóngen.”

Kekbê Jisas yóm kul gel nmò yó kem Farisi ne yó kem tau gel tmolok hlau

(Matyu 23:1-36; Mark 12:38-40)

37Kogol yóm deng ktolok Jisas, wen sotu Farisi nwiten Jisas ebè gónóen. Ne tahu se, mung du Jisas, ne seyón kul mken. 38Ya tey ketngahen ke Jisas nim Farisi ni yóm là dog kloloen du yóm kul adat bè kolob tdok gu laan le là deng mken. 39Omin Jisas mudél ebè yóm Farisi yó, monen, “Yu kem Farisi, ke hlingónu yóm kuy kmò, lómón yóm tgayan ne huyów olo ye molob tahen, là lemen. Igoen yóm nô lemen, tódô hono keseglom, ne hono nmò sidek. 40Tey kem tau nungel nim yu. Bè yóm kmò Dwata tau, là kô són du yóm gfan ta nmoen. Nmoen snéen yóm là gfanen. 41Yó dé hyu, olò bnasa ye lu tu kem élél mò balà yóm hyu gel hton ye ta.

42Angat tey tafak ye yu kem Farisi. Balù yó kem som lemnaw ye, sana keblay ye ke Dwata yóm gesfoloen. Okóm deng mom knogol ye yóm ktedeng kmò bè kem dumu ye, ne yóm kbong nawa ye ke Dwata. Tey hyu se yóm gel keblay ye yóm gesfoloen, okóm bê ye abay mom knogol yó dum hol bong muhen.

43Angat tey tafak ye, yu kem Farisi. Bè yóm gel kógów ye bè gónô gel stifun yó kem Ju, kóyô ye ke hol hyón le yu bè gónó le myón yó kem tau hol nadat. Dalang se ke mógów ye bè fedyan, kóyô ye ke hol nadat tau yu. 44Angat tey tafak ye he. Hol ye mkél bè yóm gónó lembeng laen dù ilô nô tahen. Tódô óyô le mlan tahen yó kem tau, là kô tngón le du yóm ndà le.”

45Sotu bè yó kem tau gel tmolok hlau myón bè yó, ne mudél ebè Jisas, monen, “Gomong henyakem mi bè yóm udélem yó, Sér.”

46Ne mon Jisas se mò du, “Senged se kuy, yu kem tau gel tmolok hlau, angat tey tafak ye. Tey sidek keblaten yó kem hlau gel hbô ye kem tau, kóón kuy, balù gdù, là kô ye tmóbóng mit du yóm hbô ye kul. 47Angat tey tafak ye he. Tey tilob yóm gel nmò ye bè yóm tehe gónó le lembeng yó kem gna tugod Dwata ekni. Blaem hono kem tehe fù ye yóm tehe mò des le. 48Nim nmò ye ni, ni se gónón gdilô yóm deng kessotu nawa ye mò yóm kul nmò yó kem tehe fù ye. Lu fen hmatay yó kem tehe gna tugod Dwata, ne yu se fen hemtilob yó kem lebeng le. 49Yó gónóm mon, lemwót bè yóm deng eles ketngón Dwata yóm nmò ye, yó gónóm mon, ‘Angat wen kem tau tugodu ebélê le, ne wen se kem dumu tau hógówu elem blóng le mò mit yóm dou tulón. Wen se angat hnatay le, ne wen se angat hnayam le.’

50Yó angat guta ye du yóm nmò ye yó, angat snolò Dwata bélê ye kdê yó kem gna tugoden deng tehe hnatay le lemwót bè hol kbut benwu, 51kewóten bè katay Abél bnonok efet yóm kbonok le ke Sekariya. Tódô kem hnatay le igoen mógów lem blóng yóm gónó le gel demsù ebè Dwata ne yóm Gónô Dwata. Yó tódô tulónu kuy,” mon Jisas, “angat tnafak Dwata yu bè yó kem kdê tugoden tehe matay bnonok.

52Angat tey tafak ye, yu kem tau gel tmolok hlau. Ten-geed ye hemseng du yóm tahu lan ebè Dwata. Là dog lolò ye du se kuy yóm lan yó, lel ye yó he hemseng yó kem tau tô lemolò du.”

53Omin Jisas lemwót bè yóm gónô yóm Farisi yó koni. Tódô lenwóten bè yó ne yóm tey sidek kebut le ke Jisas yó kem Farisi ne yó kem tau gel tmolok hlau. Tey dê gel snólók le béléen 54mò tô dalil le dmuón du bè yóm kbalaen kul.

Currently Selected:

Luk 11: tbl

Highlight

Copy