Tekang Kbuten 45

Kehdilô Jusif bè yó kem twoguhen

1Là bud gbek Jusif du ne hembala nawan lem blóng yó kem gel tóbóng lówóhen, yó gónón gotu hewót kul bè yó gu lem dfélen. Balù sotu ke wen dumu tau nô bè yó bè yóm kehdilô Jusif bè yó kem dumun setwoli. 2Tódô hebtù Jusif dlumuhen, botong gungol yó kem tau Idyip ngangen efet tulón le ditu bè gónô bong yóm Faro.

3Omin Jusif mudél ebè yó kem dumuhen setwoli, monen, “Ou se Jusif. Tolo mowil he kô mà?” Okóm bè yóm kungol le du yó kem twoguhen yóm monen yó ya tey sidek klikò le, là kô gbalà le du yóm snólóken yó. 4Omin Jusif bud mon du mò kul, “Yake hloni ye edini dé.” Tahu se, hloni le. Ne monen mò kul, “Ou se Jusif, yóm twoli ye tehe hbalù ye edini bè Idyip. 5Bê ye abay hesbeweg kehedem ye ne bê ye abay nsel knô ye bè yóm kehbalù ye dou edini. Kaem Dwata se yóm eles htukô dou gna kuy edini anì là matay ye. 6Hanà gewuhen halay ni he mlan yóm bitil bong, limu halay he duen laen dù dmadu ne laen se dù muta. 7Dwata se eles hegna dou edini anì wen lanu tmóbóng kuy anì là matay ye bè nim tey bitil bong ni. Deng kun kmò du Dwata nim ni anì mowil ye dalang se yó kem semfu gu bélê ye. 8Yó gónóm mon, là kô yu du yóm hógów dou edini, kaem Dwata. Deng henbalingen ou mò geta bè yó kem genlal Faro. Ou se snaligen bè klamang yóm benwu nogoten ne ou se gubérnor bè klamang Idyip.

9Ne ni, géhél ye mulék ebè mà ne tulón ye du yóm deng tinoken ebéléen yóm ngaen Jusif. Yó tinoku ebéléen, ‘Deng henbaling Dwata ou gubérnor bè klamangen Idyip. Géhéli edini ne mà, béi tlek hanggà. 10Ke dengi kól bè ni, bè benwu Gusén gónóhem nô anì monihi béléu, dalang se yó kem ngaem ne yó kem téméem ne yó kem ubihahem, kem kambingem ne kem safiem ne yóm kdê dumu nfunem. 11Ke dengi nô bè Gusén ou he temdof kuy. Limu halay he duen nim bitil bong ni ne là kóe móyô ke matayi lemnus dalang se yó kem fes lówóhem ne kem ógófem.’ ”

12Yó bud udél Jusif ebè yó kem dumuhen setwoli, monen, “Deng tódô kdê ye ne dmilô dou kóó, dalang se uu, Bindyamin? Ou se Jusif. 13Tulón ye ke mà yóm tey kfasangu bè ni bè Idyip ne tulón ye du se yóm kdê deng ton ye. Omin ye géhél mit du edini.” 14Omin Jusif lemagaf mkik ke Bindyamin. Bud mkik se ke Bindyamin kun bè yóm igoen lemkef du. 15Omin Jusif sket lemkef ne melek yó kem twoguhen bè yóm igoen mkik. Kogol yóm keskik le, omin le mbut stulón du yó kem twoguhen.

16Timbow gefet ditu bè gónô bong yóm Faro yóm ksut yó kem dumuhen setwoli Jusif, ya tey kehligal Faro ne yó kem genlalen.

17Yó monen mò ke Jusif, “Tulónem yó kem dumuhem setwoli hol lenulón le ken yó kem kudà le ne omin le mulék ebè Kanan 18anì na le e nangay mà le ne yó kem fes lówó le. Blayu kul yóm tonok alì hyu bè ni bè Idyip anì laen dù gónó le élél. 19Tulónem kul snéen mit le klitun gu bè ni bè Idyip mò gónó le smakay yó kem yehen le ne kem ngà le lemnek, sélétem mon yóm mà le. 20Bê le knamà ke wen kimu gtebel le abay se kul funen yóm tonok alì hyu bè klamangen Idyip.”

21Tahu se, nimón yó kem ngà Jakub yóm monen yó. Henwit Jusif lu klitun ne bnotu mò ken le bè yóm kógów le, lómón yóm deng mon Faro mò du. 22Sket benlayen lu nes mò ilis le ne fen benlayen Bindyamin tlu latu botù blówón bukay ne limu nes mò ilisen. 23Bud henwiten maen sfolò kudà asnu mò lemulón yó kem alì hyu lemwót gu bè Idyip ne bud sfolò kudà asnu mò lemulón halay ne mambang ne yó kem dumu ken mò ken le bè yóm kógów le. 24Omin Jusif yó gotu hewót yó kem dumuhen setwoli ne yó monen mò kul, “Bê ye abay ssel bè lan.” 25Tahu se. Lemwót le bè yó bè Idyip yó kem dumuhen setwoli Jusif mulék le ebè Kanan ebè mà le.

26Bè yóm kkól le béléen, mon le mò du, “Ó Mà, tolo mowil he Jusif. Deng du gubérnor bè klamangen Idyip nim kmoen ni.” Tódô neb Jakub, balù udì ke hentahuhen lu. 27Okóm timbow deng gotu tulón le du yóm kdê tulón Jusif kul ne deng tonen se yó kem klitun hwit Jusif mò gónón smakay ebè Idyip, yó he kehtahuhen du ne mulék hyu kegnómen du,

28monen, “Tolo mowil gi yóm ngau Jusif. Laen dù bud hnebel nawahu ne. Lemwóte ne ni anì géhél tonu gu laanu là deng matay.”

Currently Selected:

Tekang Kbuten 45: tbl

Highlight

Copy