Tekang Kbuten 44

Klana yóm sotu tegayan Jusif

1Kogolen bè yó, yó udél Jusif ebè yóm tau gel snaligen bè gónóen, monen, “Gotu hennokem halay yó kem sakù le yó kem tau yó, yó se kbong gbek nwit le blayem kul ne gotu bud sù ye lu lem sakù le yó kem filak le. 2Lemwót yóm tegayan blówón bukayu, suem bè bak sakù yóm twoli bélê le ne bud homong suem du yóm filak tô kun bli ken.” Tahu se, tódô nmò yóm tau snalig Jusif yóm hmoen du yó.

3Hol hlafus bè yó hewót le lu yó kem tau setwoli, ne yó kem kudà asnu le. 4Timbow là deng le hol mayuk he bè yóm syudad yó, yó mon Jusif bè yóm tau snaligen bè gónóen, “Hetlasiki, ktesem lu tu kem tau tu koni. Sok gafitem lu, snólókem lu, monem, ‘Moen ke bnalà ye sidek yóm tey kehyu nmoen bélê ye yóm gónóhu mogot? 5Moen ke hennagaw ye yóm tegayan blówón bukayen? Igoen són yó gónón gel minum ne yó se yóm tegayan mtulusen. Deng tey gulé ksideken yóm salà nmò ye.’ ”

6Tahu se, timbow gafiten lu yóm tau dók Jusif yó koni, tódô bud nuliten bélê le yóm deng mon Jusif mò du. 7Bnalà le se, mon le, “Tedu snólókem yó, Sér? Moen ke lómón yó udélem? Smafà me béléem là kô nmò me du kum yóm yó. 8Tngónem se yó kem filak tehe ton me lem sakù me, gotu bud nit me mulék ebéléem gu bè benwu me bè Kanan. Tedu na me tô mnagaw tahu blówón du duhen ke blówón bukay bè gónô yóm gónóhem mogot? 9Na, Sér, ke wen bélê me gónóm mton du yóm hnebelem yó, tódô hatay tafakem du ne yóm dù tebel bélê me tódô henbalingem mò hesek yóm gónóhem mogot.”

10Yó bud mon yóm tau dók yó koni, “Tahu se yó, okóm olon yóm tau ma yóm tegayan nmò baling hesek, laen kô kul du yó kem dumu.”

11Tahu se, tódô kendel ntó le yó kem lulón le, ne tódô ket sotu bélê le nbólen yóm kun sakù. 12Omin yóm dók Jusif hemganag mebel lem sakù le, nbuten bè kun sakù yóm twogu efet kól bè kun sakù yóm hol twoli ne tonen bè kun sakù Bindyamin yóm tegayan hnebelen. 13Yó kem tau setwoli yó, tódô gotu geksê le nes le, botong ksidek kegnóm le du. Tódô gotu bud lulón le ta kudà asnu le yó kem nit le ne bud le mulék etu bè syudad. 14Timbow le gefet bè gónô Jusif le Juda ne yó kem dumun setwoli, tolo nô bè yó Jusif. Gotu le hegluduk bè soluhen.

15Ne mudél ebélê le Jusif, monen, “Moen de ke lómón yó nmò ye béléu? Là tngón ye du kô lemwót bè yóm kegetahu, sal gel wen gónóhu temngel mò gónóhu temngón du yóm deng nmò ye yó?”

16Omin Juda mudél, monen, “Laen kô dù bang kmon me du, Sér. Laen kô dù sabà me kóm. Tedu se tô kmò kehton me du kóm yóm ktahuhen? Deng hegfan Dwata yóm tehe salà me. Là sónen du yóm tau gónóm mton yóm tegayan baling hesek béléem, tódô kdê me ne.”

17Mon Jusif se, “Bê. Là kô nmou du dou yóm yó. Olon yóm tau ma yóm tegayanu mò heseku. Gotu ye mulék ebè mà ye kuy, laen kô dù hemen ye.”

Kehkodu Juda bè Jusif anì huléken Bindyamin

18Omin Juda hloni ebè Jusif ne monen mò du, “Ó Sér, ke yóm hyu béléem, wen tô tulónu kóm. Ne béem abay lenbut ou abay se yóm uu hol lómón se yóm Faro wen kfasangen hmatay tau.

19Tehe snólókem mi, Sér, monem, ‘Tolo wen mà ye kô, duhen ke wen dumu ye setwoli?’ 20Yó balà me kóm, mon me, ‘Tolo wen he mà me, bede deng tey tuha ne wen se twoli me logi, ngaen bè yóm deng ktuhahen. Tehe wen yóm kun twogu yóm ngà tu, okóm deng matay. Bè yóm kul yê, sónen du dù mowil ne tey kbong nawa mà du.’ 21Ne tehe monem mò kum, Sér, ‘Nwit ye edini anì tonu.’ 22Ne yó balà me kóm, mon me, ‘Là kô gtagaken ke mà. Ke gtagaken, tódô matay dilóu mà.’ 23Ne yó bud monem mò kum, ‘Ke là nwit ye du tum twoli ye, hol bê ye abay bud hton béléu.’ 24Bè yóm bud kulék me ebè mà, tulón me du yóm deng monem mò kum yó. 25Sotu kdaw bè yó, bud mon mà mò kum, ‘Bud ye semfulék etu na ye e bud bemli kut ken.’ 26Yó balà me du, mon me, ‘Là kô me mógów etu ne là se kô me hton bè yóm tau tu ke là mungen kum yóm twoli me. Són olo gónó me gógów ke mung kum yóm twoli me.’ 27Yó mon mà mò kum, ‘Tngón ye se tek lewu ngau bè yê huli ye Rakél. 28Yóm sotuhen, deng tnagaken ou. Déke deng senssék tu kem ógóf lóbô lem bnes abay se efet ni là kô bud tonu du. 29Ke tô nwit ye nim sotu dù tagak béléu ne ke wen gfaen, ten-geed ye hmatay dou bè klangagu bè nim deng tey ktuhahu ni.’

30,31Duhen ni, Sér,” mon Juda, “ke semfuléke ebè mà ne là mungen dou yóm twolihu, ke ton mà yóm là kmungen dou tódô mugod matay dilóu. Yóm kun klowil mà hol mogot bè kun klowil yóm ngaen yó. Ke wen gónó me hlangag du bè yóm tey ktuhahen, tódô hatayen dilóu. 32Lelen yó he,” mon Juda, “deng blayu klowilu bè yóm twolihu ni. Deng monu mò ke mà, ‘Ke là nwitu du mulék ebéléem yóm twolihu, ou dnuónem.’ 33Duhen ni, Sér, tódô ou ne nô béléem bè ni mò hesekem mò tles yóm twolihu. Hulékem kun du, hmungem bè yó kem dumu twoguhen. 34Là gbeku du mulék ebè mà ke là mungen dou yóm twoli me. Là gbeku mton du ke wen gfà mà.”

Currently Selected:

Tekang Kbuten 44: tbl

Highlight

Copy